Wulu-ayi-sob 15
15
Alɛ mɩ́ wa maalɩ yome ayopõi a, a samɛ za na mɩ́ lɛb'a bɛr
1Alɛ mɩ́ wa cen maalɩ yome ayopõi a, nyɩ na mɩ́ lɛb'a bɛr a nyɩ samɛ dem za a bɛ samɛ. 2Nyɛ̃ a lɛ nyɩ na na mɩ́ tu a: Bɛlɛ wa hieri yel a samɛ lɛb-bɛrʋ yũon a Sore ƴãw a, bɛlɩ dem za na pɛ̃w libie Ɩsɩrayɛl nɩr kãw a, a sɔ́r bɛ na tɛr nãá ƴãw ʋ ya a, bɛ na bɛr'a ʋ lo. Bɛ bɛ tɛr sɔ́r na fɛr a bɛ yɛb Ɩsɩrayɛl nɩr kãw, ʋ ya a ʋ san ɛ. 3Nyɩ na tʋ̃ɔ́ na fɛr nɩ-sãan ʋ ya nyɩ, ɛcɛ a fɛr'a kɛ́ nyɩ lɛb bɛr a nyɩ yɛbr a bɛ samɛ.
4Alɛ ɩrɛ mɛ̃ bom'ʋ a, nã́w sob bɛ bere a nyɩ pʋɔ ɩ. Bʋ̃ʋ n'ʋ vɛ̃, a Sore na maalɩ nyɩ nɩ yaga a tẽw ʋl pʋɔ ʋ na na kʋ̀ nyɩ nyɩ so a. 5Ɛcɛ a na ɩ n nyɩmɛ wa maal bɛrɛ wone a Sore nyɩ Naaŋmɩn, ɛ́ ƴãw fãw sàwr a nɛ-ƴãwnɩ za ɩ̃ na kʋ̀rɛ nyɩ a dɩ̃a a. 6A Sore nyɩ Naaŋmɩn na sɩrɩ na maalɩ nyɩ, mɛ̃ a lɛ ʋ na yel a. Nyɩ na mɩ́ pɛ̃w nɩ libie kʋ̀ nɩ-bʋʋr-yaga, ɛ́ kʋ̃ tɛr libie pɛ̃wfʋ yel-ɩra nɩr zie ɩ. Nyɩ na so nɩ nɩ-bʋʋr-yaga, ɛ́ a kãw za kʋ̃ so nyɩ ɛ.
7Ɛcɛ nã́w sob wa vɩrɩ cãà be a nyɩ yɛbr pʋɔ, a tẽw ʋl, a Sore nyɩ Naaŋmɩn na na kʋ̀ nyɩ a tẽ-kpɛ̃ɛ kãw pʋɔ a, nyɩ kʋ̃ kpawlɩ socir, ɛ́ ũù a nyɩ nũu tɛr a nyɩ yɛb-nã́w sob zie ɩ. 8Nyɩ na nɩ̃ɛ na mɩ́ tur ʋ nũu, ɛ́ pɛ̃w ʋ a alɩ bome nɛ za ʋ na bɔbr a. 9Ɛcɛ nyɩ gù vla taa wa tɛrɛ tɩɛr-faar yere à ŋá ɩ: «A yome ayopõi sob kʋ̃ yaa kɛ́ ta ɩ, a samɛ lɛb-bɛrʋ yũon.» Nyɩ taa wa kpɛ mimi-kõw a nyɩ yɛb-nã́w sob zie a al ƴãw, ɛ́ bɛ kʋ̀ ʋ bom za ɩ. Alɛ bɛ ɩ lɛ, ʋ nãà mab'a bʋɔlɩ a Sore ƴãw nyɩ, nyɩ ɩ sãwna dem. 10Nyɩ mɩ́ pɛlɩ pʋɔ kʋ̀ ʋ dẽdele. A lɛ pʋɔ a, a Sore nyɩ Naaŋmɩn na mɩ́ maalɩ nyɩ nɩ a nyɩ tome za nɩ a nyɩ yele za pʋɔ. 11Nan dem na be n a nyɩ tẽw pʋɔ kʋralɛ, alɛ so ɩ̃ kʋ̀rɛ nyɩ a nɔ-ƴãwna ŋa: a nyɩ yɛbr na ɩ bãbàalbɛ nɩ nan dem be a nyɩ tẽw pʋɔ a, nyɩ mɩ́ tur bɛ nũu dẽdele.
A gbãgbaa na ɩ ebre a lɛb-bɛrʋ
12A nyɩ yɛbr nɩ a nyɩ yeepuuli na ɩ ebre a pʋɔ a, dɛb bɩɩ pɔw wa kʋɔrɩ ʋ tʋɔra kʋ̀ nyɩ, ɛ́ tõ a nyɩ tome mɛ̃ gbãgbaa yome ayʋɔb a, a yome ayopõi sob a, nyɩ na bɛr ʋ na ʋ so ʋ tʋɔra. 13Ɛcɛ nyɩ kʋ̃ bɛr ʋ nũ-zawl ʋ cen ɛ. 14A maalʋ a Sore nyɩ Naaŋmɩn na kʋ̀ nyɩ a, a al pʋɔ n'a nyɩ na ír bome kʋ̀ ʋ: píir nɩ bʋʋr, ble nɩ divɛ̃. 15Nyɩ bãwnɩ a nyɩ na tɩ ɩ gbãgbaar a Eziptɩ, ɛ́ a Sore nyɩ Naaŋmɩn ɩ nyɩ yi so nyɩ tʋɔra a. Alɛ so ɩ̃ kʋ̀rɛ nyɩ a nɔ-ƴãwna ŋa a dɩ̃a.
16Ɛcɛ gbãgbaa na tʋ̃ɔ́ na yel nyɩ: «Ɩ̃ bɛ bɔbr k'ɩ̃ɩ yi kɛ́ bɛr nyɩ ɛ.» Bʋ̃ʋ n'ʋ vɛ̃, ʋ nɔnɛ nyɩ na, nyɩɩm nɩ a nyɩ yir dem, ɛ́ nʋ̃ɔ̀ ɩrɛ ʋ ʋ na kpɩɛr a nyɩ zie a. 17A lɛ pʋɔ a, nyɩ de pĩi-bir cɔr'ɩ ʋ a tobr puo a yir pan ƴãw, ʋʋ na ɩ n gbãgbaa kʋralɛ a nyɩ zie. Gbãgba-pɔw wa n'ʋ a, a lɛ n'a nyɩ mɩ̀ na ɩ.
18Nyɩ ta nyɛ̃ a gbãgbaa lɛb-bɛrʋ a kpɛmɛ zuo a nyɩ zie ɩ, bʋ̃ʋ n'ʋ vɛ̃, a yome ayʋɔb ʋ na tõ nyɩ a, ʋ ɩ na nyɩ páw gb'a ayi zuo tõ-tõ-bie na dier sã-ya a. A na ɩ à ŋá a, nyɩ bɛr ʋ, ʋ lɛb so ʋ tʋɔra, ɛ́ a Sore nyɩ Naaŋmɩn na maalɩ nyɩ nɩ a nyɩ yele za pʋɔ.
A dʋn bil-dãw-dɔwrɩ
19A nyɩ nĩi, a nyɩ píir nɩ a nyɩ bʋʋr bil-dãw-dɔwra za na ɩ bʋ̃-daa a, nyɩ na de ʋ na kʋ̀ a Sore nyɩ Naaŋmɩn. A na ɩ à ŋá a, nyɩ bɛ tone nɩ a nyɩ nadɛr-dãw-dɔwra ɩ, nyɩ bɛ ŋmarɛ a nyɩ pʋr-dãw-dɔwra kɔblʋ ɛ. 20A nyɩ yir dem na mɩ́ 'wɔb a nɩ yũon za, a zie ʋl a Sore nyɩ Naaŋmɩn na na kaa ír a. 21A dʋn á ŋá kãw ƴã-gan zie kãw wa sãw a, ʋlɛ wa lore wɔblʋ bɩɩ zɔ̃w a, bɩɩ ʋlɛ wa tɛr ƴã-gan zi-sãwna kãw za a, nyɩ taa maalɛ nɩ ʋ bàwr kʋ̀rɛ a Sore nyɩ Naaŋmɩn ɛ. 22Nyɩ na 'wɔb ʋ nɩ a nyɩ yir. Bɛlɩ dem za na tɛr dɛwr a, nɩ a bɛl na bɛ tɛr dɛwr a na tʋ̃ɔ́ na lãw 'wɔb ʋ, mɛ̃ mɔlʋ bɩɩ wal-daa n'ʋ a. 23Ɛcɛ nyɩ bɛ 'wɔbr a dʋ̃w zɩ̃ɩ ɛ: nyɩ na cir a na bɛr tẽw, mɛ̃ kʋ̃ɔ a.
Currently Selected:
Wulu-ayi-sob 15: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
