Wulu-ayi-sob 11

A alɩ bome nɛ a Sore na ɩ a ʋ nɩ-bʋʋrɛ ƴãw a

1Nyɩ nɔnɛ a Sore nyɩ Naaŋmɩn, nyɩ sàwr a lɛ ʋ na yere kʋ̀rɛ nyɩ bibir za a, a ʋ wulu, a ʋ tub nɩ a ʋ nɛ-ƴãwnɩ. 2A dɩ̃a bibir a, ɩ̃ bɛ ƴɛ̀rɛ a nyɩ bibiir zie ɩ. Bɛl bɛ nyɛ̃ a alɩ bome nɛ a Sore nyɩ Naaŋmɩn na maalɩ a ɩ. Nyɩɩm zie n'a ɩ̃ ƴɛ̀rɛ, nyɩɩm na nyɛ̃ a lɛ ʋ na ɩ kpɛ̃ɛ a, a ʋ fãw nɩ a ʋ kpãkpã-kpɛ̃w a. 3Nyɩ nyɛ̃ nɩ a ʋ nɔ-ɓãa-yele a Eziptɩ tẽw, a ʋlɩ bom nɛ ʋ na ɩ a Eziptɩ tẽw nãà Faarawɔ̃, nɩ a Eziptɩ tẽw dem za a#11:3 Nyɛ̃ Ety 7.14—12.36. 4Ʋ mɩ̀ tɩ ɩ n a Faarawɔ̃ zɛbr-nɩbɛ bom, a ʋ wie nɩ a ʋ torkori. Bʋ̃ʋ n'ʋ vɛ̃, ʋ ɩ na a Bàa-kɛkɛɛ kʋ̃ɔ-kpɛ̃ɛ kʋ̃ɔ lɛb wa pàw bɛ, a lɛn daar bɛ na tɩ diwr bɩ́ɛrɛ nyɩ a. Ʋ ɩ na bɛ kpi a nʋɔr kʋ. 5Ʋ ɩ n bom a nyɩ maalʋ ƴãw, a wɛja-kpalɛ pʋɔ, kɛ́ nyɩ tʋ̃ɔ́ cen wa ta a ka. 6A Eliyaavʋ bidɛbr, Datan nɩ Abiram, na yi Urubɛn dɔwlʋ pʋɔ a, ʋ ɩ bɛ nɩ bom: a tẽsɔw 'la n gɛ̀lɛ́ vɔl bɛ, lãwnɩ a bɛ yie dem, a bɛ pɛnɛ-sɛwr nɩ a bɛlɩ dem za na tu a bɛ pùor a, a Ɩsɩrayɛl nɩbɛ za niŋé. 7Yel-mɩŋa za, a Sore tõ-bɛrɛ ʋ na tõ a, nyɩ nyɛ̃ a na nɩ mimir. 8A na ɩ à ŋá a, nyɩ sàwr a nɛ-ƴãwnɩ za ɩ̃ na kʋ̀rɛ nyɩ a dɩ̃a a, kɛ́ nyɩ tʋ̃ɔ́ tɛr fãw de nɩ a tẽw nyɩ na na kpɛ a pʋɔ, 9kɛ́ nyɩ tʋ̃ɔ́ kpɛ a be cɛlɩ. A Sore pɔ na yel k'ʋʋ na kʋ̀ n a tẽw ŋa a nyɩ sãàkʋm-kore nɩ a bɛ bʋʋrɛ, a tẽw ŋa bʋ̀rʋ nɩ sɩwr na gbɔlɛ a#11:9 Nyɛ̃ Ety 3.8 nɩ a manʋ..

A tẽw a Sore na kaarɛ a

10A tẽw nyɩ na na so a bɛ ŋmɛ̃ mɛ̃ a Eziptɩ tẽw nyɩ na yi kɛ́ bɛr a ɩ. A be a, nyɩ mɩ́ tɩ bʋ̀r'ɩ a nyɩ póru ɛ́ cɔ́rɛ, mɛ̃ zɛ-vaar zaadɛ̃ a. 11A tẽw nyɩ na na so a ɩ n tan nɩ fʋɔlɩ tẽw, saa na waar ƴãwn a, 12tẽw a Sore nyɩ Naaŋmɩn na kaarɛ a n'ʋ, ʋ jɩ́rɛ ʋ nɩ kʋralɛ, a yũon tib daar tɩ ta a baarʋ daar.

13Nyɩmɛ wa sɩrɩ sàwr a ɩ̃ nɛ-ƴãwnɩ ɩ̃ na kʋ̀rɛ nyɩ a dɩ̃a a, nyɩmɛ wa nɔnɛ a Sore nyɩ Naaŋmɩn nɩ a nyɩ pʋɔ za nɩ a nyɩ sɩ́ɛ za a, 14ʋ na mɩ́ ɩ na a saa wa a ʋ daar ƴãw a nyɩ tẽsɔw, a kpãcãan nɩ a sɩ̃ɛ-kpɛ-paala saa. A lɛn daar a, a nyɩ bʋ̃-dieri na mɩ́ vɩɛl a, a ble, a divɛ̃ nɩ a kãá. 15Ʋ mɩ̀ na mɩ́ ɩ na a mʋ̃ɔ bul a wɛrʋ pʋɔ a nyɩ dʋn ƴãw. Nyɩ na mɩ́ dɩ na tɩw.

16Ɛcɛ nyɩ gù vla! Nyɩ taa bɛrɛ bɛ bɛlɛ nyɩ ɛ, nyɩ taa bɛrɛ a sɔr-vla ɩ, nyɩ taa tuur ŋmɩn-yoru pùor, tone a tome, ɛ́ gbine dume a niŋé ɩ. 17A na ɩ na a Sore suur ìr a nyɩ ƴãw, ʋ na pàw nɩ a salom a saa bɛ cãà waar ɛ, a tẽsɔw kʋ̃ lɛb tɩr bom za ɩ, ɛ́ nyɩ baarɩ fɔ̃wlɛ a tẽ-vla a Sore na kʋ̀rɛ nyɩ a pʋɔ. 18A nɛ-ƴãwnɩ ɩ̃ na kʋ̀rɛ nyɩ a, nyɩ ƴãw a a nyɩ pʋ̃ɔmɩ́, a nyɩ socir pʋɔ. Nyɩ 'lẽ a ƴãw a nyɩ kpãkpãw ƴãw nɩ a nyɩ gbẽé taa yiire a bɛrɛ ɩ. 19Nyɩ na zanɛ nɩ a nɩ a nyɩ bibiir. Nyɩ na ƴɛ̀rɛ nɩ a ƴɛ̀rʋ a bɛ zie, a lɛn daar nyɩ na zɩ̃ a nyɩ yir a, nyɩ na cere a sɔ́r zu a, nyɩ na gã nɩ nyɩ na ìr a. 20Nyɩ na sɛb a na ƴãw a nyɩ yie dɩ̃dɔ-mimie dàar ƴãw, nɩ a nyɩ tẽ-bɛrɛ dɩ̃dɛɛ ƴãw. 21A lɛn daar a, nyɩɩm nɩ a nyɩ bʋʋrɛ na kpɩɛr'ɩ a tẽw a Sore na pɔ yel k'ʋʋ na kʋ̀ n a nyɩ sãàkʋm-kore a, nyɩ na kpɛ ʋ na cɛlɩ lɛn daar za a salom na na be a tẽsɔw zu-sɔw a.

22Nyɩ ƴãw fãw sàwr a Sore nɛ-ƴãwnɩ za ɩ̃ na kʋ̀rɛ nyɩ a, nyɩ nɔnɛ a Sore nyɩ Naaŋmɩn, nyɩ maalɛ a ʋ pʋ-tɩɛrʋ ɛ́ tu ʋ kʋralɛ. 23A lɛn daar a, a Sore na diw nɩ nɩ-bʋʋr-yoru bɛr a nyɩ niŋé, nɩ-bʋʋrɛ na yãwmɛ zuo nyɩ ɛ́ kpɛmɛ zuo nyɩ a, ɛ́ nyɩ na de nɩ a bɛ tẽw. 24Nyɩ na so nɩ a ziir al za a nyɩ gbɛ́ɛ na nɛbr a. A nyɩ tẽw na yi n a wɛja-kpalɛ na be a saa-pɛrɩ́-dʋrʋ-lowr a ɛ́ tɩ tɔ a Libã tan na be a saa-pɛrɩ́-gʋba-lowr a, ɛ́ lɛb yi a Efaratɩ man na be a saa-pɛrɩ́ a, ɛ́ tɩ tɔ a Mediterane kʋ̃ɔ-kpɛ̃ɛ na be a mʋ̃tɔ̃w-kpɛb-lowr a. 25Nɩr za kʋ̃ tʋ̃ɔ́ bà gbɛ́r a nyɩ niŋé ɩ. A tẽw zie za nyɩ na cere a, a Sore nyɩ Naaŋmɩn na ɩ na nyɩ ƴãwnɛ a tẽw dɛ̃bɩ̃ɛ nɩ pʋl-vʋ̃ɔ, mɛ̃ a lɛ ʋ na yel kʋ̀ nyɩ a.

26Nyɩ bɛrɛ wone: a dɩ̃a a, ɩ̃ yel kɛ́ nyɩ kaa ír a maalʋ bɩɩ a ŋmɛ-ƴãw. 27A na ɩ n a maalʋ nyɩmɛ wa sàwr a nɛ-ƴãwnɩ a Sore nyɩ Naaŋmɩn na ƴãw ɩ̃ kʋ̀rɛ nyɩ a dɩ̃a a. 28Ɛcɛ a na ɩ n a ŋmɛ-ƴãw, nyɩmɛ bɛ wa sàwr a ʋ nɛ-ƴãwnɩ a, nyɩmɛ wa bɛr a sɔ́r ɩ̃ na wule nyɩ ɛ́ tuur ŋmɩn-yoru nyɩ na bɛ bãw a.

29A Sore nyɩ Naaŋmɩn wa ɩ nyɩ kpɛ a tẽw nyɩ na na so a pʋɔ a lɛn daar a, nyɩ na ƴɛ̀r'ɩ nɔ-vla ƴɛ̀rʋ a Garizim tãw zu, ɛ́ ƴɛ̀r ŋmɛ-ƴãw ƴɛ̀rʋ a Ebal#11:29 Garizim nɩ Ebal: Tan na tɩ kɛrɩ kɛrɩ be a Sisɛm tẽw saa-pɛrɩ́-dʋrʋ-lowr nɩ saa-pɛrɩ́-gʋba-lowr a n'a. Nyɛ̃ 27.4-7. tãw zu. 30— A tan á ŋá be n a Zurdɛ̃ gãwn, a sɔ́r na be a mʋ̃tɔ̃w-kpɛb-lowr a gãwn, a Kanãa tẽw dem na kpɩɛr a Zurdɛ̃ fʋɔla a, tẽw pʋɔ. A pɩɛl'ɩ a Moore sɛn tɩɩr na tori Gilgal a.— 31Nyɩ kʋ̃ yaa kɛ́ gãw a Zurdɛ̃ cen tɩ de a tẽw a Sore nyɩ Naaŋmɩn na kʋ̀rɛ nyɩ a ɩ. Nyɩ na so ʋ na kpɩɛr. 32Nyɩ na ƴãw nɩ fãw sàwr a wulu nɩ a tub za ɩ̃ na kʋ̀rɛ nyɩ a dɩ̃a a.

Currently Selected:

Wulu-ayi-sob 11: DBDC

Highlight

Compare

Copy