Kɔlɔsɩ 1
1
A Pol puore nɩ a Kɔlɔsɩ tẽw kɩrɩta-nɩbɛ
1A mãa Pol, Naaŋmɩn na nɔ̃w yã ƴãw ɩ̃ ɩ Yeezu Kɩrɩta nɩ-tona a, nɩ a tɩ yɛb Timote, 2tɩmɛ nɛbɛ kʋ̀rɛ a sɛbɛ ŋa a nyɩɩm Kɔlɔsɩ tẽw kɩrɩta-biir na ɩ a tɩ yɛbr na lãw nɩ a Kɩrɩta bɛ lɛbr pùor a. A Naaŋmɩn tɩ Sãà, ʋ kʋ̀ nyɩ maalʋ nɩ ƴã-ɓaarʋ.
A Kɔlɔsɩ tẽw kɩrɩta-biir naaŋmɩn-sàw-deb
3A puoru tɩ na mɩ́ puore kʋ̀rɛ nyɩ a kʋralɛ a, tɩ mɩ́ puor'ɩ a Naaŋmɩn, a tɩ Sore Yeezu Kɩrɩta Sãà, yãanɩ. 4Tɩ wõ n a lɛ nyɩ na sàw de a Yeezu Kɩrɩta a, nɩ a nɔ̃wfʋ nyɩ na tɛr a kɩrɩta-biir za ƴãw a, 5ɛ́ a ɩ nyɩ na tɩɛrɛ a ʋlɩ bom nɛ na gùre nyɩ a tẽ-vla pʋɔ a ƴãw n'a a. A Yel-nʋ̃ɔ̀ na ɩ yel-mɩŋa ƴɛ̀rʋ a, ʋl na lʋɔrɩ wa ta nyɩ a, ʋl pʋɔ n'a nyɩ páw a tɩɛrʋ ŋa. 6A Yel-nʋ̃ɔ̀ manɛ na yaarɛ ɛ́ wɔnɛ wɔmɛ a tẽ-daa za zu, mɛ̃ a lɛ ʋ na tɩ ɩ a nyɩ sɔgɔ a ʋlɩ bibir nɛ za nyɩ na wõ bɛ ƴɛ̀r a Naaŋmɩn maalʋ ƴɛ̀rʋ, ɛ́ nyɩ nyɛ̃ lɛ ʋ na sɩrɩ ŋmɛ̃ a. 7A tɩ bá Epafarasɩ, na ɩ a tɩ lãw-tõ-tɔ a, ʋlɛ n'ʋ wul nyɩ à á ŋá. Ʋ lɩɛrɩ tɩ na tone a nyɩ ƴãw, mɛ̃ Kɩrɩta tõ-tone na bɛ lɛbr pùor towtow a. 8Ʋlɛ n'ʋ manɩ kʋ̀ tɩ a nɔ̃wfʋ a Vʋʋrʋ Sõw na ɩ nyɩ tɛr a.
9Alɛ n'a so a ʋlɩ bibir za tɩ na wõ a nyɩ yele wa tɩ tɔ a dɩ̃a a, tɩ mɩ̀ bɛ bɛr a nyɩ puor-kʋ̀b ɛ. Tɩ zɛlɛ na kɛ́ a Naaŋmɩn ɩ nyɩ bãw a ʋ pʋ-tɩɛrʋ za. Al ƴãw n'a a Vʋʋrʋ Sõw kʋ̀rɛ nyɩ a yã-bãwfʋ nɩ a yã. 10À ŋá n'a nyɩ na maalɛ a Naaŋmɩn yã-nɔn za, ɛ́ vʋʋrɛ nyɔ-vʋʋrʋ na sɛw taa nɩ ʋ a. Nyɩ na maalɛ nɩ ɩ-vɩɛlɩ bʋʋrɛ bʋʋrɛ za, ɛ́ lɛb bãwnɛ a Naaŋmɩn dɔwlɛ. 11A Naaŋmɩn na ɩ n a ʋ yúor-vɩɛlʋ-danʋ fãw nyuwli nyɩ a yele za ƴãw, nyɩ mɩ́ dɩ kanyir sàw de bom za. 12Nyɩ puore a Naaŋmɩn Sãà yãanɩ nɩ nʋ̃ɔ̀, ʋl na ɩ nyɩ na tʋ̃ɔ́ páw a na-bʋ̃-vɩɛlɩ ʋ na cɔbrɩ bin a tẽ-vla cãà pʋɔ cɛlɛ nɩ a ʋ nɩ-sori a. 13Ʋ faa tɩ nɩ a lige kpɛnʋ pʋɔ tɩ ƴãw a ʋ Bi-nɔna naalʋ pʋɔ. 14Ʋl zũú n'a a Naaŋmɩn faa tɩ ɛ́ dɩ a tɩ yel-bebe suur kʋ̀ tɩ.
A Kɩrɩta dɩ n naalʋ bom za zu
15A Kɩrɩta n'ɩ a Naaŋmɩn
tɩ na bɛ nyɛrɛ a ŋmɛ̃-ta-tɔ,
ɛ́ lɛb ɩ a Naaŋmɩn bi-dãw-dɔwra
na de niwn a ʋ bʋ̃-íri za pʋɔ a.
16Bʋ̃ʋ n'ʋ vɛ̃, ʋlɛ n'ʋ
a Naaŋmɩn ƴãw k'ʋ ír a bome za,
a saa-zu nɩ a tẽw zu,
a bʋ̃-nyɛrɩ nɩ a bʋ̃-bɛ-nyɛrɩ,
a al na zɩnɛ naalʋ-dà-kɔwr zuru a,
nɩ a al na so a ziir a,
a naalʋ-dɩb bʋʋrɛ nɩ fãw bʋʋrɛ za.
Ʋlɛ n'ʋ Naaŋmɩn ƴãw
ʋ ír a za a ʋl mɩŋa ƴãw.
17Ʋ de nɩ niwn be bom za ƴãw,
ɛ́ ʋlɛ n'ʋ ɩ a bome za a àr.
18Ʋlɛ n'ʋ ɩ a ʋ Lãw-yir ƴã-gan zu,
ʋlɛ n'ɩ a bome za pɛr-tib zie,
a bi-dãw-dɔwra
na de niwn lɛb yi a kũuni pʋɔ,
k'ʋʋ tʋ̃ɔ́ ɩ a niw-diere a yele za pʋɔ a.
19Bʋ̃ʋ n'ʋ vɛ̃, a Naaŋmɩn nɔ̃w na
paalɩ ʋ nɩ a naaŋmɩnʋ za,
20k'aa ʋl zũú, Naaŋmɩn ɩ
ʋlɛ nɩ bom za lɛb kpɛ taa,
a tẽw zu nɩ a saa-zu.
A ʋ Bie zɩ̃ɩ na cir
a da-gara zu a ƴãw n'a,
a Naaŋmɩn ɩ a ƴã-ɓaarʋ be.
21Ɛ́ nyɩɩm na tɩ dãw zãá nɩ a Naaŋmɩn a, nyɩɩm na tɩ dãw ɩ a ʋ dɔ̃ nɩbɛ a nyɩ ɩ-faar zũú a, 22ƴɛrɛŋa a, a kũu a ʋ Bie nɩsaal ƴã-gan na kpi a zũú n'a a Naaŋmɩn ɩ nyɩɩm nɩ ʋl lɛb kpɛ taa, k'ʋʋ tʋ̃ɔ́ ɩ nyɩ àr a ʋ niŋé ɩ nɩ-son na bɛ tɛr dɛwr kãw za, ɛ́ bɛ tɛr sãwna nɩr yere a. 23Ɛcɛ a fɛr'a kɛ́ a nyɩ naaŋmɩn-sàwfʋ ɩ nyɩ kpɛmɛ, bà gbɛ́r àr, ta sàw bom za taw nyɩ zãá nɩ a nyɩ tɩɛrʋ ʋl nyɩ na tɛr a ɩ, a lɛn daar za nyɩ na tɩ wõ a Yel-nʋ̃ɔ̀ a. A Yel-nʋ̃ɔ̀ ŋa hier'a ta bʋ̃-íra za a tẽw zu, ɛ́ a mãa Pol, ɩ̃ lɩɛb'ɩ a Yel-nʋ̃ɔ̀ ŋa tõ-tone.
A Pol tõ-nʋɔr a Lãw-yir ƴãw
24A ƴɛrɛŋa a, ɩ̃ cɩlɛ na ɩ̃ na be a tuo pʋɔ a nyɩɩm ƴãw a. A Kɩrɩta tuo al na cɛ a, ɩ̃ nyɛrɛ a na a mãa mɩŋa ƴã-gan pʋɔ, a Kɩrɩta ƴã-gan na ɩ a Lãw-yir a ƴãw. 25Ɩ̃ lɩɛb'ɩ a Lãw-yir tõ-tõ-bie, a tõ-nʋɔr a Naaŋmɩn na kʋ̀ m a nyɩ ƴãw a zũú. Ɛ́ a tõ-nʋɔr ŋa n'ɩ k'ɩ̃ɩ hieri a Naaŋmɩn ƴɛ̀rʋ ʋ za kʋ̀ nyɩ, 26a pɛr lɛ kɛ́ a yel na sɔwlɩ a dɩta-pɛ-yome za a nɩbɛ na dɔwr lɩɛrɛ taa zie a, ɛ́ a ƴɛrɛŋa a Naaŋmɩn wul ʋ sãá a ʋ nɩ-sori zie a. 27Naaŋmɩn sàw na ɩ bɛ bãw a tɩbɛ dem sɔgɔ a naalʋ nɩ a yúor-vɩɛlʋ-danʋ na bɛ tɛr tɔ a yel ŋa na waar'ɩ a: a Kɩrɩta be n a nyɩ sɔgɔ, ʋl na só nyɩ tɩɛrɛ a yúor-vɩɛlʋ-danʋ a. 28A Kɩrɩta ŋa yele n'a tɩ manɛ, kpaalɛ nɩ nɩr za, wule nɩ nɩr za nɩ yã-bãwfʋ, kɛ́ tɩ tʋ̃ɔ́ ɩ nɩr za vɩɛl ʋ za lãwnɩ a Kɩrɩta. 29À á ŋá ƴãw n'a ɩ̃ tone ɛ́ mʋɔr nɩ a fãw ɩ̃ na páw a Yeezu Kɩrɩta zie, ɛ́ a fãw ŋa tone a ɩ̃ pʋɔ kpɛ̃w kpɛ̃w za a.
Currently Selected:
Kɔlɔsɩ 1: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
