Nɩ-toni 28

A Pol ta n Maltɩ

1Tɩ na wa cɩ̃ɛ baar'a, tɩ wõ na kɛ́ a kʋ̃ɔ-kpɛ̃ɛ-sɔgɔ-tẽw nɛ dɩ na kɛ́ Maltɩ. 2A tẽ-biir tɩ tɛr tɩ nɩ vla. Saa na tɩ waar ɛ́ ƴawr ɩrɛ a, bɛ gbɔw nɩ vũu-kpɛ̃ɛ ɛ́ ƴãw tɩ za taw ta. 3A Pol tɩ wob'ɩ dali-kon k'ʋʋ tɩ ƴãw a vũumí. Ɛcɛ a tʋlʋ tɩ ɩ na dɔpan yi dʋ̃ mɛr a Pol nũu. 4A tẽ-biir na wa nyɛ̃ a waab ŋa ʋ mɛr a Pol nũu ƴãw a, bɛ yere na kʋ̀rɛ taa: «Nɩ-kʋrɛ n'ɩ a nɩr ŋa, a kʋ̃ɔ-kpɛ̃ɛ bɛr ʋ na ʋ cɩ̃ɛ, ɛcɛ a Naaŋmɩn na tuur yel-mɩnʋ a, bɛ sàw ʋ na vʋʋrɛ ɩ.» 5Ɛcɛ a Pol tɩ mɩr'ɩ a waab ƴãw a vũumí ɛ́ bɛ wõ bom za ɩ. 6Bɛl tɩ tɩɛrɛ na k'ʋʋ na mɔr'ɩ a pɛr nɛ pʋɔ, bɩɩ k'ʋʋ na lo na kpi. Ɛcɛ a tɩ kɔwrɩ na, ɛ́ bɛ nyɛ̃ bom za bɛ ɩrɛ a Pol ɛ. A lɛ n'a a bɛ tɩɛrʋ tɩ lɩɛbɩ bɛ yel: «Ŋmɩn kãw n'ʋ!»

7Zie kãw tɩ pɩɛl'ɩ a be, bɛ yel kɛ́ a kʋ̃ɔ-kpɛ̃ɛ-sɔgɔ-tẽw nɩ-kpɛ̃ɛ za na dɩ Pibiliyisɩ a, ɛ́ ʋlɛ so ʋ. Ʋ tɩ tɛr tɩ na mɛ̃ ʋ bárɩ a, ɛ̀ tɩ kpɛ a be bibie ata. 8Ƴã-tʋlʋ nɩ bin-zɩ̃ɩ tɩ gaal'ɩ a ʋ sãà. A Pol tɩ cen na tɩ puori ƴãw ʋ, ɛ́ ír nuru dɔwlɩ ʋ sanɩ ʋ. 9Al pùorí, a kʋ̃ɔ-kpɛ̃ɛ-sɔgɔ-ten nɩbɛ za na tɩ ɩ bàalbɛ a, tɩ waar'ɩ a ʋ zie ʋ wa sanɛ bɛ. 10Bɛ tɩ wul'ɩ ƴãwfʋ bɛ tɛr vuo ɩ, a tɩ zie. Ɛ́ tɩ na wa yi lɛb kpɩɛr a gbor a, bɛ kʋ̀ tɩ nɩ bom za a tɩ sɔ́r ƴãw.

A Pol ta n a Ʋrɔm

11Tɩ tɩ kpɛ n a be tɩ maalɩ cuwr ata, ɛ́ bãw yi de gbor kãw na tɩ gã a be cɛlɛ kɛ́ a sɩ̃ɔ tɔl baar'a. Alɛsãdiri n'a a gbor ʋl tɩ yi, ɛ́ bɛ bʋɔlɛ kɛ́ Dɩɔsɩkiir. 12Tɩ tɩ tɛw na àr Sɩrakiizi maalɩ bibie ata. 13Tɩ tɩ yi n a be, ɛ́ lanɩ a tẽw kõkowr tɩ ta Erezio. A bio daarɩ́, a saa-pɛrɩ́-dʋrʋ-lowr sɛsɛb tɩ cɛ̀r'a, tɩ maalɩ bibie ayi ɛ́ ta Puzɔl. 14Tɩ tɩ nyɛ̃ nɩ yɛbr a be, bɛ bʋɔlɩ tɩ kɛ́ tɩ wa kpɛ a bɛ zie tɩ ta kɔsɩɛra. À à ŋá n'a tɩ cen a Ʋrɔm. 15A yɛbr na tɩ be a Ʋrɔm a na wa wõ a tɩ yele a, bɛ tuori tɩ nɩ a Apiyisi Dàa pʋɔ, nɩ a be bɛ na bʋɔlɛ: Sãanbɛ-yie-ata a. A Pol na wa nyɛ̃ bɛ a, ʋ puor'ɩ a Naaŋmɩn yãanɩ. Ʋ tɩ lɛb'a nyɛ̃ ʋ tʋɔra. 16Tɩ na wa ta a Ʋrɔm a, a Pol zɛlɩ na bɛ sàw ʋ tɛr ʋ tʋɔra yir, ɛ́ soja gùre ʋ.

A Pol hiere nɩ a Yel-nʋ̃ɔ̀ a Ʋrɔm

17Bibie ata pùorí, a Pol tɩ bʋɔl'ɩ a Zifʋ mɩnɛ nɩ-kore a ʋ yir. Bɛ na wa ɓã taa a, ʋ yel bɛ na: «Yɛbr i, ɩ̃ bɛ sãw a tɩ nɩ-bʋʋrɛ ɩ, ɛ́ bɛ lɛb tuli a tɩ sãàkʋm-kore nɛ́ɛ ƴãw ɛ, ɛcɛ mãa n'ɩ ŋa ɩ nɩ-pàwra, a lɛn daar za a Zifʋ mɩnɛ na nyɔw mɛ̃ a Zerizalɛm ƴãw a Ʋrɔm tẽw nɩbɛ nuru pʋɔ a. 18Bɛ na tɩ sowri mɛ̃ bãw a yel-mɩŋa a, a Ʋrɔm tẽw nɩbɛ bɛl tɩ bɔbr'a kɛ́ bɛ lɛb bɛr mɛ̃. Bɛl zie a, bɛ bɛ tɩ nyɛ̃ bom na sɛwnɩ kũu a ɩ. 19Ɛcɛ, a Zifʋ mɩnɛ bɛ tɩ sàw ɛ. Lɛ so a tɩ fɛr mɛ̃ ɩ̃ ta n a ɩ̃ yele a na-kpɛ̃ɛ zie. Ɛcɛ a ɩ̃ tɩɛrʋ bɛ tɩ n'ɩ k'ɩ̃ɩ tɛr'ɩ a ɩ̃ nɩ-bʋʋrɛ ƴɛ̀rʋ ɛ. 20Alɛ so ɩ̃ bɔbr k'ɩ̃ɩ nyɛ̃ nyɩ tɩ ƴɛ̀r sɔw taa. Alɛ ɩrɛ mɛ̃ bom a, a ʋlɩ bom nɛ a Ɩsɩrayɛl nɩbɛ na tɩɛrɛ a, ʋl zũú n'a ɩ̃ ƴãw a bamɛ á ŋá.» 21Bɛ tɩ sɔw na yel ʋ: «Tɩ bɛ páw sɛbɛ za ʋ yi a Zude wa manɛ a fʋ yele ɩ, ɛ́ tɩ yɛb kãw mɩ̀ bɛ yi a be wa ta manɩ yel kʋ̀ tɩ a fʋ ƴãw, bɩɩ manɩ yel-faa ʋ na wõ a fʋ ƴãw a ɩ. 22Ɛcɛ tɩ bɔbr'a kɛ́ fʋ̃ʋ tɔr za manɩ a fʋ tɩɛrʋ tɩ wõ. Bʋ̃ʋ n'ʋ vɛ̃, tɩ bãwnɩ a na a nɩbɛ na bɛ dier a fʋ puoru sɔ́r ŋa a ziir za a.»

23Bɛ tɩ wõ n taa ƴãw bibir. A bibir na wa vɩɛ a, bɛ wa n yaga dɔwlɩ wa páw a Pol a ʋ yir nɛ pʋɔ. A ʋ manʋ pʋɔ a, a Pol tɩ dɩrɛ nɩ a Naaŋmɩn Naalʋ dãsɩɛ, ɛ́ a biɓaara tɩ ta n a zaanʋɔra a, ʋ mɩ́ tɩ de nɩ a Moyiir wulu sɛbɛ nɩ a naaŋmɩn-ƴɛ̀r-manbɛ sɛbr manɛ nɩ a Yeezu yele, ɛ́ ƴãw fãw bɔbr k'ʋʋ ƴɛ̀r tʋ̃ɔ́ bɛ. 24Bɛ mɩnɛ tɩ sàw na de, ɛ́ bɛ mɩnɛ zawrɩ. 25Bɛ na tɩ lɛbr kule a, bɛ cãà bɛ tɩ wõ taa a ɩ. A lɛ n'a a Pol tɩ yel à ŋá tɛwr kʋ̀ bɛ: «A Vʋʋrʋ Sõw tɛr'ɩ yel-mɩŋa, a lɛn daar ʋ na tɩ ƴɛ̀r a nyɩ sãàkʋm-kore zie nɩ a naaŋmɩn-ƴɛ̀r-manɛ Ɩzayi nʋɔr a. Ʋ tɩ yel a:

26“Cen tɩ páw a nɩ-bʋʋrɛ bɛ ŋa yel bɛ:

nyɩ na mɩ́ wone na ɛ́ kʋ̃ bãw a pɛr ɛ.

Nyɩ na mɩ́ jɩ́rɛ na ɛ́ kʋ̃ nyɛ̃ bom ɛ.

27Bʋ̃ʋ n'ʋ vɛ̃,

a nɩbɛ bɛ ŋa kpɛ n mimi-kõw,

bɛ fur'ɩ a bɛ tobe,

bɛ pàw nɩ a bɛ mimie

kɛ́ bɛ taa nyɛrɛ nɩ a bɛ mimie ɩ,

kɛ́ bɛ taa wone nɩ a bɛ tobe ɩ,

kɛ́ a bɛ yã taa nyɛrɛ ɩ,

kɛ́ bɛ taa lɩɛbɛ a bɛ ɩb ɛ,

alɛ bɛ ɩ lɛ, ɩ̃ nãà sanɩ bɛ na#28:27 Nyɛ̃ Ɩza 6.9-10..”

28Lɛ so nyɩ bãwnɩ a, nɩ-bʋʋr-yoru nɛbɛ a Naaŋmɩn tɩr a faafʋ ŋa kʋ̀. Bɛl na bɛr'a wõ.»

[ 29Bɛ na tɩ wõ a Pol ƴɛ̀r-bie á ŋá a, a Zifʋ mɩnɛ tɩ ŋmɩɛr'ɩ nɔkpɛn yaga kule nɩ.]

30A Pol tɩ kpɛ n a yir nɛ pʋɔ yũo-ɓile ayi, yarɛ a yir. A bɛlɩ dem za na mɩ́ tɩ wa a ʋ zie a, ʋ mɩ́ tɛr bɛ na 31hiere a Naaŋmɩn Naalʋ kʋ̀rɛ bɛ, ɛ́ ɓãá ƴãw bɛr bom za ɛ́ manɛ a Sore Yeezu Kɩrɩta yele kʋ̀rɛ bɛ, ɛ́ bom za bɛ piw ʋ sɔ́r ɛ.

Currently Selected:

Nɩ-toni 28: DBDC

Highlight

Copy

Compare