Nɩ-toni 23
23
1A Pol tɩ jɩ́r'ɩ a Zifʋ mɩnɛ ƴɛ̀rʋ-dɩb-lãw nɩbɛ gbẽgbẽ ɛ́ yel: «Yɛbr i, tɩɛr-vla n'ʋ ɩ̃ tõ n a Naaŋmɩn tome wa tɔ a dɩ̃a.» 2Lɛ n'a a bàwr-maal-kara Ananɩasɩ tɩ ƴãw a bɛlɩ dem na àr pɩɛlɩ a Pol a, bɛ ŋmɛ ʋ a nʋɔrɩ́. 3Lɛ n'a a Pol tɩ yel ʋ: «Dacĩ-pla ŋa#23:3 Nyɛ̃ Mat 23.27.! Naaŋmɩn n'ʋ na ŋmɛ b. Fʋ do na zɩ̃ a ƴɛ̀rʋ-maalʋ dà-kɔw zu kɛ́ fʋ maal'ɩ mɛ̃ a ƴɛ̀rʋ tu n a Naaŋmɩn wulu, ɛ́ nɩ̃ɛ gãw a Wulu ŋa bɛr ɛ́ ƴãw kɛ́ bɛ ŋmɛ m ɩ?» 4A bɛlɩ dem na tɩ àr pɩɛlɩ a Pol a tɩ yel ʋ na: «A Naaŋmɩn bàwr-maal-kara n'ʋ fʋ tʋʋr ɩ?» 5A Pol tɩ sɔw na yel: «Yɛbr i, ɩ̃ bɛ bãw kɛ́ a bàwr-maal-kara n'ʋ ɛ. Alɛ bɛ ɩ lɛ a, a Sɛb-sõw yel'a: “Fʋ kʋ̃ tʋ a fʋ nɩ-bʋʋrɛ nɩ-kpɛ̃ɛ ɩ#23:5 Nyɛ̃ Ety 22.27..”»
6Ʋ na tɩ bãw kɛ́ a ƴɛ̀rʋ-dɩb-lãw nɩbɛ ŋmãa ɩ n Sadiseyɛ̃, ɛ́ a ŋmãa ɩ Faarizɩ̃ɛ mɩnɛ a, ʋ zɛw nɩ kɔkɔr yel a ƴɛ̀rʋ-dɩb-lãw nɩbɛ sɔgɔ: «Yɛbr i, ɩ̃ ɩ n Faarizɩ̃ɛ, ɩ̃ sãà nɩ ɩ̃ mã ɩ Faarizɩ̃ɛ. Tɩ na tɩɛrɛ kɛ́ a kũuni mɩ́ lɛb'a yi a, alɛ so ɩ̃ àr a ka bɛ maalɛ nɩ mɛ̃ a ƴɛ̀rʋ.» 7A ƴɛ̀r-bie á ŋá bɛ tɩ lo tẽw sɛr ɛ, ɛ́ taw-taa gã a Faarizɩ̃ɛ mɩnɛ nɩ a Sadiseyɛ̃ mɩnɛ cará, a lãw nɩbɛ bʋ́r. 8Bʋ̃ʋ n'ʋ vɛ̃, a Sadiseyɛ̃ mɩnɛ yere na kɛ́ kũuni-lɛb-yibu bɛ ka ɩ, kɛ́ malkɩ mɩnɛ nɩ a bome al na ɩ vʋʋrʋ tɛwr'a mɩ̀ bɛ be ɩ. Ɛ́ a Faarizɩ̃ɛ mɩnɛ bɛl sàw de kɛ́ à á ŋá za be na. 9A be za tɩ ɩ n gɔmɛ tɛwr. Naaŋmɩn wulu sɛ-sɛbrbɛ bɛ mɩnɛ kãw na tɩ ɩ Faarizɩ̃ɛ mɩnɛ a, tɩ ìr'a de a ƴɛ̀rʋ tanɩ kpɛ̃w za yel: «Tɩ bɛ nyɛ̃ sãwna kãw za a nɩr ŋa zie ɩ. Ɛ́ vʋʋrʋ kãw bɩɩ malkɩ wa n'ʋ ƴɛ̀r a ʋ zie?» 10A taw-taa tɩ waar'a na ɩ faa, alɛ so a sojarɩ túr (1 000) nɩ-kpɛ̃ɛ ƴãw a ʋ sojarɩ siw tɩ tɛr a Pol lɛb do n a sojarɩ yir pʋɔ. Ʋ tɩ zɔrɛ nɩ dɛ̃bɩ̃ɛ bɛ nãà wa ìr taw a Pol ɓɛl a. 11A ʋlɩ tɩ̃ɩsɔw, a Sore tɩ wa n a Pol zie wa yel ʋ: «Ƴãw fãw! Fʋ dɩ n a ɩ̃ dãsɩɛ a Zerizalɛm ka. Lɛ n'a a fɛr kɛ́ fʋ mɩ̀ dɩ a ɩ̃ dãsɩɛ a Ʋrɔm.»
Zifʋ mɩnɛ bʋ n taa a Pol kʋb ƴãw
12A zie na wa vɩɛ a, a Zifʋ mɩnɛ bʋ n taa ɛ́ pɔ kɛ́ bɛlɛ bɛ wa kʋ a Pol a, bɛ kʋ̃ dɩ bom kʋ̃ nyũ kʋ̃ɔ ɩ. 13Bɛ tɩ ɩ n lɩz'a ayi nɩ dɔwlɛ na tɩ pɔ a pɔb ŋa a. 14Lɛ n'a bɛ tɩ cen tɩ páw a bàwr-maal-nɩ-bɛrɛ nɩ a Zifʋ mɩnɛ nɩ-kore yel: «Tɩ pɔ na kɛ́ tɩɩm bɛ wa kʋ a Pol a, bom bɛ kpɩɛr a tɩ nʋɔrɩ́ ɛ. 15A na ɩ à ŋá a, nyɩ cen tɩ wõ taa nɩ a ƴɛ̀rʋ-dɩb-lãw nɩbɛ, ɛ́ zɛlɩ a sojarɩ túr (1 000) nɩ-kpɛ̃ɛ yel kɛ́ nyɩ bɔbr'a k'ʋʋ tɛr a Pol wa n, nyɩ wa lɛb bãw jɛl a ʋ yele vla kaa a. Tɩɩm ƴãw a, tɩ cɔbr'a baarɩ, tɩ na ŋmɛ ʋ na kʋ a sɔ́r zu, ʋʋ bɛ ta a ka sɛr ɛ.»
16Ɛcɛ a Pol arbile kãw tɩ wõ n a bɛ bʋ-taa ŋa. Ʋ tɩ cen nɩ a sojarɩ yir tɩ kpɛ yel kʋ̀ a Pol. 17A Pol tɩ bʋɔl'ɩ a sojarɩ kʋba (100) nɩ-kpɛ̃ɛ kãw wa yel ʋ: «Tɛr a pɔlbile ŋa cen nɩ a sojarɩ túr (1 000) nɩ-kpɛ̃ɛ zie, ʋ tɛr'ɩ ƴɛ̀rʋ na ƴɛ̀r kʋ̀ ʋ.» 18Lɛ n'a a sojarɩ kʋba (100) nɩ-kpɛ̃ɛ tɩ tɛr ʋ cen nɩ a sojarɩ túr (1 000) nɩ-kpɛ̃ɛ zie tɩ yel ʋ: «A nɩ-pàwra Pol, ʋlɛ n'ʋ bʋɔlɩ mɛ̃ tɩ yel k'ɩ̃ɩ tɛr a pɔlbile ŋa wa n a fʋ zie, k'ʋʋ tɛr'ɩ ƴɛ̀rʋ na ƴɛ̀r kʋ̀ b.» 19A sojarɩ túr (1 000) nɩ-kpɛ̃ɛ tɩ nyɔw ʋ nɩ nũú, taw yi n bɛ tɛwr zie tɩ sowr'ʋ: «Bʋ̃ʋ n'ʋ fʋ bɔbr kɛ́ fʋ yel kʋ̀ m?» 20A pɔlbile tɩ yel'a: «A Zifʋ mɩnɛ wõ n taa, kɛ́ bɛ wa zɛlɩ fʋ tɛr a Pol wa n a ƴɛ̀rʋ-dɩb-lãw nɩbɛ zie a bio, ɛ́ yel k'aa ʋ yele n'a bɛ bɔbr kɛ́ bɛ lɛb bãw jɛl kaa vla. 21Fʋ̃ʋ ʋ, taa wa nanɩ sàwr ɛ. Bɛ zuo nɩ nɩbɛ lɩz'a ayi na na sɔwlɩ gù ʋ a. Bɛ pɔ na kɛ́ bɛlɛ bɛ wa kʋ a Pol a, bom bɛ lɛb kpɩɛr bɛ nʋɔrɩ́ ɛ. Bɛ cɔbr'ɩ a bɛ yele za baarɩ, fʋ̃ʋ yõ n'ʋ bɛ cɛlɛ kɛ́ fʋ sàw.» 22A sojarɩ túr (1 000) nɩ-kpɛ̃ɛ tɩ kpãa nɩ a pɔlbile yel ʋ: «Taa wa manɛ kʋ̀rɛ nɩr kɛ́ fʋ yel'ɩ a bɛ bʋ-taa ŋa kʋ̀ m ɛ!» Al pùorí, ʋ tɩ bɛr ʋ ʋ lɛb kule.
A sojarɩ túr nɩ-kpɛ̃ɛ tɩr'ɩ a Pol kʋ̀ a Ʋrɔm tẽw na-kpɛ̃ɛ-lɩɛrɛ Felisɩ
23Al pùorí, a sojarɩ túr (1 000) nɩ-kpɛ̃ɛ tɩ bʋɔl'ɩ sojarɩ kʋba (100) nɩ-bɛrɛ ayi wa yel bɛ: «Nyɩ cɔbrɩ Sezaare cenu a dɩ̃a tɩ̃ɩsɔw gbele piwaɩ daar. A lɛ ƴãw, nyɩ tɛr sojarɩ kɔbr ayi (200), soja-wi-zɔmnbɛ lɩz'a ata nɩ pie, kafine dem kɔbr ayi (200). 24Nyɩ mɩ̀ cɔbrɩ wie tɛr'ɩ a Pol tɩ ta n a Ʋrɔm tẽw na-kpɛ̃ɛ-lɩɛrɛ Felisɩ zie, ɛ́ bom za ta ɩ ʋ ɛ.» 25Al pùorí, ʋ tɩ sɛb'ɩ a sɛb-tʋɔla ŋa:
26«Mãa Kulodiyisɩ Lɩzɩasɩ, ɩ̃ puore fʋ na, Ʋrɔm tẽw na-kpɛ̃ɛ-lɩɛrɛ Felisɩ i! 27A nɩr ŋa ɩ̃ na tɩrɛ kʋ̀rɛ fʋ a, Zifʋ mɩnɛ nɛbɛ tɩ nyɔw ʋ bɔbr ʋ kʋb. Ɩ̃ na wa wõ kɛ́ Ʋrɔm tẽ-bie n'ʋ a, ɩ̃ ìr'a nɩ a ɩ̃ sojarɩ cen tɩ faa ʋ. 28Ɩ̃ tɩ bɔbr'a k'ɩ̃ɩ bãw a ʋ sãwna a Zifʋ mɩnɛ na yere a, al ƴãw n'a ɩ̃ tɩ tɛr ʋ cen nɩ a bɛ ƴɛ̀rʋ-dɩb zie. 29Ɩ̃ tɩ nyɛ̃ na kɛ́ a ʋ sãwna bɛ na yere a, càar'ɩ nɔkpɛn bɛ na ŋmɩɛr a bɛ Naaŋmɩn wulu ƴãw a, alɛ bɛ ɩ lɛ, sãwna bɛ tɩ ka a ʋ zie sɛwnɩ kũu bɩɩ gaso ɩ. 30Ɩ̃ wa wõ na kɛ́ bɛ cɔbrɛ na kɛ́ bɛ sɔwlɩ kʋ ʋ. Lɛ so ɩ̃ tɩrɛ ʋ kʋ̀rɛ fʋ, ɛ́ mɩ̀ yere kʋ̀rɛ a bɛlɩ dem na tɛr'ɩ ʋ a ƴɛ̀rʋ a, kɛ́ bɛ wa a fʋ niŋé wa manɩ a ʋ sãwna.»
31A sojarɩ tɩ tu n a lɛ a sojarɩ túr (1 000) nɩ-kpɛ̃ɛ na tɩ ƴãw a nʋɔr kʋ̀ bɛ a. Bɛ tɩ yi n tɩ̃ɩsɔw tɛr a Pol tɩ ta n Ãtɩpatirisɩ. 32A bio daarɩ́, bɛ tɩ bɛr'ɩ a soja-wi-zɔmnbɛ bɛ cãà cere, ɛ́ bɛ lɛb wa a sojarɩ yir. 33Bɛ na dɛ tɩ ta a Sezaare a, a soja-wi-zɔmnbɛ ír'ɩ a sɛbɛ kʋ̀ a Ʋrɔm tẽw na-kpɛ̃ɛ-lɩɛrɛ, ɛ́ wul ʋ a Pol. 34A Ʋrɔm tẽw na-kpɛ̃ɛ-lɩɛrɛ tɩ de nɩ a sɛbɛ kanɩ, ɛ́ sowr a Pol kɛ́ tẽ-buor'a ʋ yi. Ʋ na wa tɩ bãw a ɩ Silisi n'a a, 35ʋ yel ʋ na: «A bɛlɩ dem na yere a fʋ sãwna a wa ta a, ɩ̃ na bɛr'a wõ a fʋ ƴɛ̀rʋ.» Ɛ́ tɩ ƴãw kɛ́ bɛ ƴãw ʋ a Erɔdɩ yir, ɛ́ gù ʋ.
Currently Selected:
Nɩ-toni 23: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
