2 Samɩɛl 1
1
A Daviir wõ na kɛ́ a Sawul nɩ a Zonatã kpi na
1A Sawul tɩ kpi na baarɩ a lɛn daar#1:1 A Sawul tɩ kpi na baarɩ: Nyɛ̃ 1Sa 31.4-5. a Daviir na tɩ zɛb tʋ̃ɔ́ a Amalesitɩ mɩnɛ, ɛ́ wa zɩ̃ a Sɩkɩlagɩ a. Bibie ayi n'a ʋ tɩ maalɩ a Sɩkɩlagɩ. 2A bibie ata sob a, nɩr kãw tɩ yi n a Sawul zɛbr laɩ pʋɔ wa ta. A ʋ bʋ̃-suuri tɩ cɩɛr cɩɛr'a, ɛ́ a ʋ zu ɩ tanɛ ʋ za. Ʋ na tɩ ta a Daviir zie a, ʋ tɩ lo na gbĩ dume ɛ́ gũu tɩ tɔ tẽw. 3A Daviir tɩ sowr'ʋ na: «Nyɩnɛ n'a fʋ yi waar?» Ʋ sɔw: «A Ɩsɩrayɛl nɩbɛ laɩ pʋɔ n'a ɩ̃ yi zɔrɛ waar.» 4A Daviir tɩ yel ʋ na: «Ŋmɩŋmɩn n'a a yele ɩ? Manɩ ɩ̃ nyɛ̃.» A nɩr nɛ tɩ yel'a: «A Ɩsɩrayɛl nɩbɛ lɩɛb'a zɔ a zɛbr daar. Sojarɩ yaga kpi na. A Sawul nɩ a ʋ bidɛb Zonatã za mɩ̀ kpi na.» 5A Daviir tɩ lɛb'a sowr'ʋ: «Ŋmɩŋmɩn n'a fʋ ɩ bãw k'aa Sawul nɩ a ʋ bidɛb Zonatã kpi na?» 6A pɔ́l tɩ sɔw na: «Ɩ̃ tɩ be n a Gilbowa tãw zu, ɛ́ bɛ bãw ŋmɩŋmɩn za n'a mɩ̀ a ɩ. Ɩ̃ tɩ nyɛ̃ nɩ a Sawul na dĩ a ʋ kafin àr'ɩ a. A dɔ̃ dem zɛbr-torkori nɩ a bɛ wi-zɔmnbɛ tɩ gbʋnɛ ʋ na. 7Ʋ tɩ lɩɛb'a nyɛ̃ m, bʋɔlɩ mɛ̃, ɩ̃ sɔw: “Mãa n'ɩ ŋan!” 8Ʋ sowri mɛ̃: “Ãa nɛ b?” Ɩ̃ sɔw: “Amalesitɩ nɩr nɛ m.” 9Lɛ n'a ʋ yel mɛ̃: “Ɩ̃ zɛlɛ fʋ na, taw ta kʋ m, bʋ̃ʋ n'ʋ vɛ̃, ɩ̃ na saa cãà bãw yã a, a bɛ sàwr mɛ̃ ɩ.” 10Lɛ n'a ɩ̃ tɩ taw ta kʋ ʋ, bʋ̃ʋ n'ʋ vɛ̃, ɩ̃ tɩ bãwnɩ a na ʋ na kʋ̃ cãà vʋʋrɛ bɛlɛ wa zɛb tʋ̃ɔ́ ʋ a. Al pùorí, ɩ̃ tɩ vɔw nɩ a nãà-kpawʋɔ a ʋ zũú, ɛ́ yaa a bãw a ʋ kpãkpãw ƴãw, ɛ́ tɛr a wa n a ka k'ɩ̃ɩ wa kʋ̀ b, ɩ̃ sore e.»
11A Daviir tɩ taw nɩ a ʋ bʋ̃-suuri cɩɛrɩ. A bɛlɩ dem za na tɩ be a ʋ zie a mɩ̀ ɩ a lɛ. 12Bɛ tɩ maal'ɩ a Sawul nɩ a ʋ bidɛb Zonatã nɩ a Sore nɩbɛ bɛl za na tɩ kpi a zɛbr zie a kuor, ɛ́ tɛr mʋta-tuo, kõ n tɩ ta n a zaanʋɔra. 13Al pùorí, a Daviir tɩ sowr'ɩ a pɔ́l nɛ na tɩ wa yel a yel a: «Ãa nɛ b?» Ʋ sɔw: «Amalesitɩ nʋʋra kãw bidɛb nɛ m.» 14A Daviir tɩ yel ʋ na: «Pʋ̀lá bɛ vʋ̃ɔ fʋ, fʋ na kʋ a Sore nɩ-kabra a ɩ?» 15A Daviir tɩ bʋɔl'ɩ a ʋ soja pɔ́l kãw wa yel ʋ à ŋá: «Ŋmɛ ʋ kʋ.» A soja tɩ ŋmɛ n a Amalesitɩ nɩr nɛ kʋ. 16A Daviir tɩ yel ʋ na: «Fʋ̃ʋ n'ʋ so a fʋ kũu, bʋ̃ʋ n'ʋ vɛ̃, fʋ̃ʋ n'ʋ ƴãw fʋ mɩŋa a kũu dɔwrʋ yel: “Mãa n'ʋ kʋ a Sore nɩ-kabra.”»
Lãw-mʋɔlɛ a Daviir na kõ a Sawul nɩ a Zonatã ƴãw a
17Lɛ n'a a Daviir tɩ kõ lãw-mʋɔlɛ ŋa a Sawul nɩ a ʋ bidɛb Zonatã ƴãw. 18Ʋ tɩ yel'a kɛ́ bɛ zanɩ nɩ a Zuda tẽw dem a lãw-mʋɔlɛ ŋa. A «Tam lãw-mʋɔlɛ» n'ʋ, ʋ sɛb'a ƴãw a#1:18 Nɩ-mɩŋa sɛbɛ: Yielu sɛb-kʋra kãw n'ʋ bɛ yere a ka, ɛcɛ a sɛbɛ ʋl bɛ cãà be ɩ. Nɩ-mɩŋa sɛbɛ pʋɔ.
19Ɩsɩrayɛl i, bʋ̃ʋ n'ʋ so
a fʋ gãdaar kpi,
a fʋ zɛbr nɩ-yée yée
gã gã a fʋ tan zu?
20Nyɩ ta mʋɔlɩ a yel ŋa
a Gatɩ#1:20 Gatɩ nɩ Asɩkalon: Nyɛ̃ 1Sa 6.17 nɩ a manʋ tẽw pʋɔ ɩ,
nyɩ ta ɩ ʋ yi
a Asɩkalon tẽw sɛ́ɛ pʋɔ ɩ.
A Filisɩtɛ̃ pɔwbɛ taa cɩlɛ ɩ,
a yɔ-ɓile dem bɛ ŋa
pɔwyaar taa cɩlɛ ƴawr'ɩ ɛ.
21Gilbowa tan i!
A ɓɩɛlʋ nɩ a saa,
a ta lɛb lo a nyɩ zu ɛ,
nɩr ta lɛb nyɛ̃ tẽsɔw na kpɛ a,
a nyɩ sɩɛmɩ́ ɛ.
Bʋ̃ʋ n'ʋ vɛ̃, be n'a
a gãdaar zɛbr-kur-pãgalɩ nyɛ̃ vĩ,
a Sawul zɛbr-kur-pãgala
bɛ na kʋ̃ lɛb sɔ kãá towtow#1:21 Kʋ̃ lɛb sɔ kãá towtow: Bɛ mɩ́ tɩ sɛ n gán pàw a zɛbr-kur-pãgala sʋɔr ʋ kãá, ʋ ta sãw ɛ. a.
22A dɔ̃ dem kʋb ƴãw a,
a dɔ̃ dem na tɛr fãw a
zɛb-tʋ̃ɔ́fʋ ƴãw a,
a Zonatã tam bɛ tɩ nyɩrɛ ɩ,
a Sawul zɛbr-sɔ-kpɛ̃ɛ
mɩ́ tɩ tõ n a ʋ tome kʋralɛ.
23A Sawul nɩ a Zonatã cãafʋ daar a,
bɛ tɩ nɔ̃w nɩ taa yaga za,
a bɛ kũu tɔr za pʋɔ a,
bɛ bɛ bʋ́r taa ɩ,
bɛl na tɩ páwr zuo sɩlɩ a,
ɛ́ kpɛ socir zuo gben a.
24Ɩsɩrayɛl pɔwbɛ ɛ,
nyɩ kone a Sawul!
Ʋ mɩ́ tɩ su nyɩ nɩ kpar-vɩɛlɩ vɩɛlɩ,
a daarʋ na bɛ gbʋ́r a,
ʋ mɩ́ tɩ ƴãw nɩ salm-zɩɛ pɩ̃ɛmɛ
a nyɩ kpar-wowr.
25Bʋ̃ʋ n'ʋ so a gãdaar kpi
a zɛbr zie,
bʋ̃ʋ n'ʋ so a Zonatã
kpi gã a tan zu?
26Zonatã a,
kpɩɛrʋ bɛ n'a tɛr mɛ̃ a fʋ ƴãw ɛ,
fʋ̃ʋ ɩ̃ yɛb, ɩ̃ bá-tuo o.
A fʋ báalʋ a ɩ̃ zie
tɩ nʋmɛ na bɛ dɩ vuo ɩ,
ʋ tɩ nʋmɛ na zuo pɔwbɛ nɔ̃wfʋ.
27Bʋ̃ʋ n'ʋ so a gãdaar kpi,
bʋ̃ʋ n'ʋ so a soja-yée yée bɛ ŋa kpi?
La Bible en Dagara © Alliance Biblique du Burkina Faso, 2013.