2 Makabe mɩnɛ 5
5
Zɛbr bãwfʋ yele na sãá a
1A na tɩ man a ʋlɩ daar nɛ a, a Ãtiokisi tɩ cɔbrɛ nɩ a zɛbr ʋ na na zɛb'ɩ a Eziptɩ tẽw a gb'a ayi sob a. 2A tɩ vɩrɩ na na ta bibie lɩz'a ayi, bɛ na mɩ́ tɩ nyɛ̃ a Zerizalɛm tẽ-kpɛ̃ɛ za pʋɔ, wi-zɔmnbɛ na su kpar-bɛrɛ na maw nɩ salm-zɩɛ fomie a, nɩ zɛbr-nɩbɛ na tɛr kafine nɩ zɛbr-sɔ-bɛrɛ a bɛ zɔrɛ a saa-zu a. 3Bɛ tɩ ŋma n gbilegbile, kɔbr ayiri dɔwlɩ lɩz'a ayiri nɩ piir, ɛ́ pɩɛrɩ pɩɛrɩ a zɛbr ƴãw. A lõbowe za, a tɩ ɩ n nɩbɛ na waar a zɛbr ƴãw, nɩ nɩbɛ na tuore a. A zɛbr kur-pãgalɩ tɩ damnɛ na, a kafine tɩ ɩ na mɛ̃ tɩɩr a, a pime tɩ tɛbr'ɩ a ziir za, a salm-zɩɛ zɛbr bʋ̃-suuri nɩ a zɛbr-nyãa-kpalɩ-bʋʋrɛ za tɩ nyɩwrɛ na. 4A nɩbɛ za tɩ puore na k'aa yele á ŋá bɛ na nyɛ̃ a, ɩ yel-vla na waar a bãwfʋ.
A Zazɔ̃ zɛbr'ɩ nɩ a Zerizalɛm
5Bɛ na tɩ ƴɛ̀rɛ k'aa Ãtiokisi kpi na a, a Zazɔ̃ tɩ ɓã n nɩbɛ taa ta nɩbɛ túr (1 000), wa ùr zɛb'ɩ a Zerizalɛm tẽw. Bɛ tɩ tʋ̃ɔ́ nɩ a dacĩ-gùrbɛ, ɛ́ tɛr tɩ de a tẽw, a Menelasɩ zɔ kpɛ a zɛbr-yir-kpɛ̃w na do gãw a Ŋmɩn-yir-kpɛ̃ɛ a pʋɔ. 6A Zazɔ̃ bɛ tɩ tɛr mimi-baalʋ ɛ, ɛ́ kʋ kʋ a ʋ tẽ-bi-taabɛ. Ʋ bɛ tɩ bãw a pɛr k'aa ʋ bʋʋrɛ nɩbɛ ʋ na zɛb tʋ̃ɔ́ a ɩ n zɛb-tʋ̃ɔ́fʋ kpɛ̃ɛ bɛ na zɛb tʋ̃ɔ́ ʋ a ɩ. Ʋ bɛ tɩ tɩɛrɛ k'aa ʋ tẽ-bi-taabɛ nɛbɛ ʋ zɛbr tʋ̃ɔ́nɛ ɩ, ʋ tɩ tɩɛrɛ kɛ́ dɔ̃ dem nɛbɛ. 7Ɛcɛ ʋ bɛ tɩ tʋ̃ɔ́ de a nɩ-kpɛ̃ɛnʋ ɛ. Lɛb waar, vĩ tɩ nyɔw ʋ nɩ a ʋ ɩ-kpaafʋ ŋa pʋɔ, ʋ lɛb zɔ cen a Amam#5:7 Amam tẽw: Nyɛ̃ 4:26. tẽw. 8A ʋ ɩb na bɛ vɩɛl a wa tɩ nyɛ̃ nɩ baarʋ na kpɛ faa a: bɛ tɩ manɩ nɩ a ʋ sãwna a Arabi tẽw nãà, Aretasɩ, zie. Al pùorí, ʋ mɩ́ yi tẽ-kpɛ̃ɛ ŋa zɔ tɩ sãá tẽ-kpɛ̃ɛ ŋa. Bɛ tɩ diwr ʋ nɩ a ziir za, bɛ bɛ tɩ nɔnɛ ʋ towtow ɛ, ɛ́ tɩ ɩrɛ ʋ laar ʋ na tɩ zawrɩ a ʋ nɩ-bʋʋrɛ nɛ́ɛ bɛr, ɛ́ lɛb ŋmɛlɩ ɩ a ʋ tẽ-bi-taabɛ kʋrɛ a ʋ tẽw pʋɔ a. À ŋá n'a bɛ tɩ diw ʋ bɛr ʋ cen Eziptɩ tẽw. 9Ʋ tɩ yi n a be cen Gɩrɛsɩ tẽw, bʋ̃ʋ n'ʋ vɛ̃, ʋ tɩ tɩɛrɛ k'ʋʋ na nyɛ̃ nɩ kpɛb zie a Sɩpartɩ tẽw dem zie na tɩ ɩ a Zifʋ mɩnɛ nɩbɛ#5:9 Zifʋ mɩnɛ nɩbɛ a: Nyɛ̃ 1Ma 12:6-7, 21. a. A nɩr ŋa na tɩ fɛr nɩ-yaga bɛ zɔ kɛ́ bɛr a bɛ tẽw a, ʋl mɩŋa tɩ kpi n tẽ-sãan pʋɔ. 10Ʋl na tɩ bɛr kũuni yaga a tẽw nɩr za bɛ ũù a, nɩr za bɛ tɩ kõ ʋ ɛ: bɛ bɛ tɩ maalɩ a ʋ kuor ɛ, ʋ bɛ tɩ nyɛ̃ zie a ʋ sãàkʋm-kore yaa pʋɔ ɩ.
A Ãtiokisi Epifan wob'ɩ a Zerizalɛm Ŋmɩn-yir-kpɛ̃ɛ bome
11A nãà Ãtiokisi na tɩ wõ a yele na ɩ a Zerizalɛm a, ʋ tɩ tɩɛrɛ k'aa Zude tẽw za zawrɛ nɩ a ʋ nɩ-kpɛ̃ɛnʋ. Lɛ n'a ʋ tɩ yi a Eziptɩ lɛb wa, ɩ suur tɛwr ʋ za mɛ̃ wɛ-dʋ̃-faa a, wa zɛb de a tẽ-kpɛ̃ɛ. 12Al pùorí ʋ yel a ʋ sojarɩ kɛ́ bɛ taa zɔrɛ nɩbaalʋ ɛ, ɛ́ kʋ a bɛlɩ dem za bɛ nãà wa tuore a, ɛ́ ŋmaarɩ a bɛlɩ dem nãà wa zɔ kpɛ a yie pʋɔ a kɔkɛɛ. 13Bɛ tɩ kʋ n a pɔ́lɛ́ nɩ a dɛb-nyamɛ, kʋ a pɔwbɛ nɩ a bibiir pàw pɛr, kʋ kʋ a pɔwsɩrali nɩ a bi-pɩɩlɛ. 14Bibie ata, ɛ́ a Zerizalɛm nɩbɛ tùr-lɩz'a anaar (80 000) bɛ tɩ cãà be ɩ: bɛ tɩ kʋ n tùr-lɩz'a ayi (40 000), ɛ́ kʋɔrɩ bɛ mɩnɛ ta a lɛ, bɛ ɩ gbãgbaar.
15A Ãtiokisi tɩ nyɛ̃ na a cãà bɛ sɛw ʋ ɛ, ʋ kpɛ pʋra kpɛ a Ŋmɩn-yir-kpɛ̃ɛ na ɩ sõw zuo a za a tẽw za zu a pʋɔ, ɛ́ a sob nɛ na tɩ tɛr ʋ kpɛ n a tɩ n'ɩ a Menelasɩ na tɩ zawrɩ a wulu nɩ a ʋ tẽw bɛr a. 16A Ãtiokisi tɩ nyɔw nɩ a bʋ̃-son nɩ a ʋ nuru na tɛr dɛwr#5:16 Nuru na tɛr dɛwr a: Ƴã-gan dɛwr yele bɛ n'a ɩ, ɩb na ciir a yele n'a. a. A de-kʋ̀b bome a na-mɩnɛ bɛ mɩnɛ na tɩ ƴãw a zie ŋa pʋɔ, kɛ́ bɛ ƴãw ʋ, ɛ́ ɩ k'ʋ vɩɛl dɔwlɩ a, ʋ tɩ wob a na nɩ a ʋ nũ-dɛgɛ.
17A Ãtiokisi tɩ ɩrɛ nɩ pɔ̀l-ɩb, ɛ́ bɛ bãw k'aa Sore tɩ nyɛ̃ nɩ suur blãlɛ tɛwr ƴãw, a Zerizalɛm nɩbɛ yel-bebe zũú ɛ, nɩ kɛ́ a alɛ n'a so ʋ bɛ ŋmɛlɛ kaar a Ŋmɩn-yir-kpɛ̃ɛ ɩ. 18A Zerizalɛm tẽw dem bɛ tɩ maalɩ a yel-bebe sɛw a lɛ za a, a Ãtiokisi nãá tarɛ na wa báarɛ ɛ́ nyɛ̃ dɔwrʋ, bɛr a ʋ yãya-ton, mɛ̃ a Eliodɔɔr#5:18 Eliodɔɔr: Nyɛ̃ 3.1-40. a nãà Selekisɩ na tɩ tõ k'ʋʋ tɩ bɛl a Ŋmɩn-yir-kpɛ̃ɛ na-bome binu dĩo bome nyɛ̃ a. 19Ɛcɛ a Sore bɛ kaa ír a ʋ nɩ-bʋʋrɛ a Ŋmɩn-yir-kpɛ̃ɛ zũú ɛ, a ʋ nɩ-bʋʋrɛ zũú n'a a Ŋmɩn-yir-kpɛ̃ɛ be be. 20Alɛ n'a so a Ŋmɩn-yir-kpɛ̃ɛ tɔr za nyɛ̃ a kpɩɛrʋ na páw a nɩ-bʋʋrɛ a. A pùorí a, ʋ mɩ̀ wa nyɛ̃ nɩ a maalʋ a nɩ-bʋʋrɛ na páw a. A Kpɛnʋ-za-sob tɩ zawr'ɩ a Ŋmɩn-yir-kpɛ̃ɛ bɛr a ʋ suur pʋɔ. Ɛcɛ a bome za Zu-sob na wa ɩ ʋlɛ nɩ a ʋ nɩbɛ lɛb kpɛ taa a, a Ŋmɩn-yir-kpɛ̃ɛ tɩ lɛb'a nyɛ̃ a ʋ vɩɛlʋ za.
A Ãtiokisi lɛb'a maal ƴãw bɛ kʋ nɩbɛ a Zerizalɛm
21À ŋá n'a a Ãtiokisi tɩ tuo salm-pla kilo tùr-lɩz'a ayi nɩ ani (48 000) yi n a Ŋmɩn-yir-kpɛ̃ɛ pʋɔ, al pùorí ʋ lɛb kul fɔ̃w fɔ̃w za a Ãtɩɔsɩ. Ʋ na tɩ ɩ pɔ̀lʋ tɛwr nɩ nɩr na bɛ bʋ́nɛ nɩ ʋ tʋɔra a, ʋ tɩ tɩɛrɛ kɛ́ bom za na tʋ̃ɔ́ nɩ ʋ zie, k'ʋʋ na tʋ̃ɔ́ na ɩ gbee duwre a tẽsɔw-kõw zu, ɛ́ sojarɩ cere nɩ gbɛ́ɛ a kʋ̃ɔ-kpɛ̃ɛ zu. 22Ʋ tɩ bɛr'ɩ lɩɛrbɛ a ʋ pùorí, kɛ́ bɛ ɩrɛ a kpɩɛr a Zifʋ mɩnɛ. Filib n'ʋ ʋ tɩ bɛr a Zerizalɛm, nɩr na ɩ Firizi#5:22 Firizi: A Azi mɩnɛɛr tẽw lõbowr kãw tɩ n'ʋ, dɩ̃a ʋ dɩ Tirki. nɩ-bʋʋrɛ nɩr, ɛ́ kpɛ po-tuo zuo a Ãtiokisi tɔr za a. 23Ãdoronikɩ n'ʋ ʋ tɩ bɛr a Garizim tãw zu. Menelasɩ tɩ pʋɔ nɩ a nɩbɛ bɛ ŋa pʋɔ, ɛ́ tɩ dɔwrɛ a ʋ tẽ-bi-taabɛ po-to-dɔwrʋ zuo a bɛ ŋa.
A Ãtiokisi bɛ tɩ nɔnɛ a Zifʋ mɩnɛ towtow ɛ. 24Lɛ n'a ʋ tɩ tõ Mizi#5:24 Mizi: A Azi mɩnɛɛr tẽw lõbowr kãw tɩ n'ʋ, dɩ̃a ʋ dɩ Tirki. tẽw sojarɩ nɩ-kpɛ̃ɛ, Apoloniyisɩ, a Zerizalɛm, nɩ zɛbr-nɩbɛ tùr-lɩzɛr'ɩ ayi (22 000). Ʋ tɩ kʋ̀ ʋ nɩ nʋɔr k'ʋʋ tɩ kʋ a dɛbr za ɛ́ kʋɔrɩ a pɔwbɛ nɩ a bibiir bɛ ɩ gbãgbaar. 25A Apoloniyisɩ na tɩ ta a Zerizalɛm a, ʋ bãw na kɛ́ ɩ mɛ̃ ƴã-ɓaarʋ nɩr'ʋ a. Ʋ tɩ gù na tɩ ta a pɩ̃ɛnʋ-bibir na ɩ bibi-sõw a Zifʋ mɩnɛ zie a. Bɛ na tɩ bɛr ton za a, ʋ tɩ nyɛ̃ na a ɩ vla, ʋ cɔbrɩ sojarɩ-cenu, bɛ na mɩ́ cɔrɩ ɛ́ pɩɛrɩ cere manɛ taa, a ɩ dɛpaalʋ a. 26Ʋ tɩ ƴãw na bɛ kʋ a bɛlɩ dem za na tɩ yi a yel ŋa jɩ́rʋ a. Al pùorí, ʋ zɔ kpɛ n a sojarɩ a tẽ-kpɛ̃ɛ pʋɔ tɩ kʋ nɩbɛ bɛ dɩ vuo ɩ.
27Ɛcɛ, Zuda bɛ mɩ̀ na tɩ bʋɔlɛ Makabe a, nɩ nɩbɛ piwaɩ kãw, tɩ zɔ na kpɛ wɛja-kpalɛ pʋɔ. Bɛ tɩ kpɩɛr'ɩ a tan pʋɔ mɛ̃ wɛ-dʋn a, 'wɔbr a váar tɛwr, kɛ́ bɛ taa wa tɛrɛ dɛwr ɛ.
Currently Selected:
2 Makabe mɩnɛ 5: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.