2 Na-mɩnɛ 8
8
A Ɩsɩrayɛl tẽw nãà dɩ n a ƴɛ̀rʋ kʋ̀ a Sunɛm tẽw pɔw
1Bibir kãw, a Elize tɩ ƴɛ̀r'ɩ a pɔw ʋl ʋ na tɩ ɩ a bidɛb ʋ lɛb vʋʋrɛ a zie#8:1 Nyɛ̃ 4.8-37.. Ʋ tɩ yel ʋ na: «Nyɩ yi a ka, fʋ̃ʋ nɩ a fʋ nɩbɛ, cen tɩ kpɩɛr be nyɩ na na tʋ̃ɔ́ a. Bʋ̃ʋ n'ʋ vɛ̃, a Sore na ɩ na kɔ̃ lo a Ɩsɩrayɛl tẽw yome ayopõi.» 2A pɔw tɩ ɩ n a lɛ a Naaŋmɩn nɩr na yel kʋ̀ ʋ a: ʋ tɩ cen nɩ daadaalɛ, ʋlɛ nɩ a ʋ yir dem, tɩ be a Filisɩtɛ̃ mɩnɛ tẽw yome ayopõi. 3A yome ayopõi na wa tɔl a, ʋlɛ nɩ a ʋ yir dem yi n a Filisɩtɛ̃ mɩnɛ tẽw lɛb wa, ʋ wa cen a nãà zie k'ʋʋ tɩ ƴãw bɛ lɛb kʋ̀ ʋ a ʋ yir nɩ a ʋ púo.
4A nãà tɩ ƴɛ̀rɛ nɩ nɩ a Elize tõ-tõ-bie, Gehazi, a lɛn daar. Ʋ tɩ yel ʋ na k'ʋʋ manɩ a nɔ-ɓãa-yele al za a Elize na maalɩ a. 5A Gehazi tɩ manɛ nɩ a bi-kũu a Elize na ɩ k'ʋ lɛb vʋʋrɛ a yele kʋ̀rɛ a nãà. A bie mã, na tɩ wa a nãà zie, k'ʋʋ wa ƴãw bɛ lɛb kʋ̀ ʋ a ʋ yir nɩ a ʋ púo a, wa kpɛ na man taa nɩ. Lɛ n'a a Gehazi tɩ yel: «Nãà a, a pɔw ʋl n'ɩ ŋan, nɩ a ʋ bidɛb a Elize na ɩ ʋ lɛb vʋʋrɛ a.» 6A nãà tɩ sowr'ɩ a pɔw, ʋ manɩ a za kʋ̀ ʋ. Daadaalɛ, a nãà tɩ yel'ɩ a ʋ nɩr kãw ƴãw ʋ na ƴãw a ʋ tɩɛrʋ a, k'ʋʋ tu a yel ŋa pùor. Ʋ tɩ yel ʋ na: «Ɩ̃ bɔbr'a kɛ́ bɛ lɛb kʋ̀ a pɔw ŋa a ʋ bom za, lãwnɩ a ʋ púo bʋ̃-kʋ́ɔrɩ na maalɩ a libie, a ʋlɩ bibir ʋ na bɛr a tẽw, wa tɩ ta a dɩ̃a a.»
A Elize nɩ a Hazayɛl
7Bibir kãw, a Elize tɩ cen nɩ Damasɩ. Zɩ̃ k'aa Siiri tẽw nãà, Bɛn-Hadadɩ, tɩ ɩ n bàal. Ʋ na tɩ wõ k'aa Naaŋmɩn nɩr be n a tẽw pʋɔ a, 8ʋ yel'ɩ a Hazayɛl#8:8 Nyɛ̃ 1Na 19.15.: «De bʋ̃-kãw tɩ kʋ̀ a Naaŋmɩn nɩr Elize. Al pùorí, zɛlɩ ʋ k'ʋʋ sowri a Sore nyɛ̃, a ɩ̃ bàalʋ ŋa na sanɩ na a.»
9A Hazayɛl tɩ cen na tɩ páw a Elize. Ʋ tɩ tɛr'ɩ a Damasɩ tẽw bʋ̃-vɩɛlɩ zie, ƴãw nyɔ̃wmɩ lɩz'a ayi tuo, ʋ cen nɩ k'ʋʋ tɩ kʋ̀ a Elize. Ʋ tɩ ta na àr a Elize niŋé, ɛ́ yel ʋ: «A fʋ tõ-tõ-bie Siiri tẽw nãà, Bɛn-Hadadɩ, n'ʋ tõ m k'ɩ̃ɩ wa sowri fʋ nyɛ̃, a ʋ bàalʋ na sanɩ na a?» 10A Elize tɩ sɔw na: «Cen tɩ yel ʋ: “A bɛ tɛr à ŋá ɩ, fʋ na sanɩ na!” Ɛcɛ a Sore tɩ wul mɛ̃ na, k'ʋʋ na kpi na.»
11Al pùorí, a Naaŋmɩn nɩr tɩ jɩ́rɛ nɩ gbẽgbẽ, ɛ́ a niwn kʋ̃ dam ɛ, ɛ́ wa bere ʋ kone. 12A Hazayɛl tɩ sowr'a: «Ɩ̃ sore e, bʋ̃ʋ n'ʋ so fʋ kone?» A Elize sɔw: «Ɩ̃ na bãw a dɔwrʋ fʋ na na dɔwrɩ a Ɩsɩrayɛl nɩbɛ a, alɛ n'a so ɩ̃ kone. Fʋ na nyɩw nɩ a bɛ zɛbr-yir-kpɛn kpɛn bɛr, fʋ na kʋ n a bɛ pɔ́lɛ́ a zɛbr zie, fʋ na ƴɛ́r'ɩ a bɛ bibi-pʋrpʋr ŋmɛr, ɛ́ wɛr a bɛ pɔw-pée.» 13A Hazayɛl tɩ yel'a: «Ŋmɩŋmɩn n'a ɩ̃ na tʋ̃ɔ́ maalɩ a yel-bɛrɛ bɛrɛ á ŋa, mãa na bɛ tɛr fãw kãw za a?» A Elize sɔw: «A Sore ɩ na k'ɩ̃ nyɛ̃ kɛ́ fʋ na ɩ n a Siiri tẽw nãà.»
14A Hazayɛl tɩ yi n a Elize zie, lɛb cen a ʋ nɩ-kpɛ̃ɛ zie, ʋ tɩ sowr'ʋ: «A Elize yel a kɛ́ bʋnʋ kʋ̀ b?» A Hazayɛl sɔw: «Ʋ yel'a kʋ̀ m, k'aa bɛ tɛr à ŋá ɩ, kɛ́ fʋ na sanɩ na.» 15Ɛcɛ a bio daarɩ́ a, a Hazayɛl tɩ de nɩ gãw 'lɔr kʋ̃ɔmɩ́, ɛ́ ír pàw a nãà niwn k'ʋʋ ta tʋ́ɔr vʋʋrɛ ɩ. A nãà tɩ kpi na, ɛ́ a Hazayɛl lɩɛr'ʋ dɩ a naalʋ.
A Zuda tẽw nãà Yoram
(Nyɛ̃ 2Bi-yel 21:2-20)
16A Akab bidɛb, Yoram na ɩ a Ɩsɩrayɛl tẽw nãà a naalʋ-dɩb yome anũu sob'a a Zozafatɩ bidɛb, Yoram, tɩ lɩɛbɩ a Zuda tẽw nãà. 17Ʋ tɩ tɛr'ɩ yome lɩzɛr'ɩ pie nɩ ayi, ɛ́ dɩ a naalʋ yome ani a Zerizalɛm. 18Ʋ tɩ kul'ɩ a Akab pɔwyaa kãw#8:18 A Atali wa n'ʋ a, nyɛ̃ 8.26., ɛ́ tu a Ɩsɩrayɛl na-mɩnɛ nɩ a Akab yir dem sɔ́r, ɩ a lɛ na bɛ vɩɛl a, a Sore zie. 19Ɛcɛ a Sore bɛ tɩ sàw sãw a Zuda naalʋ-tẽw bɛr ɛ, bʋ̃ʋ n'ʋ vɛ̃, ʋ tɩ yel'ɩ a ʋ tõ-tõ-bie Daviir k'aa ʋ bʋʋrɛ na dɩrɛ nɩ naalʋ kʋralɛ a Zerizalɛm#8:19 Nyɛ̃ 2Sa 7.12-16, 1Na 11.36..
20A Yoram naalʋ-dɩb daar a, a Edɔm tẽw dem bɛ tɩ cãà sàwr a Zuda tẽw nɩ-kpɛ̃ɛnʋ a bɛ zu ɛ, ɛ́ tɩ kaa ír nãà tɛr#8:20 Nyɛ̃ Yzt 27.40.. 21Lɛ n'a a Yoram tɩ cen Sayiir, ʋlɛ nɩ a ʋ zɛbr-torkori za. Tɩ̃ɩsɔw-bɩ̃ɩn kãw, a nãà nɩ a ʋ zɛbr-torkori nɩ-bɛrɛ tɩ zɛb'a tʋ̃ɔ́ a Edɔm tẽw dem na tɩ ŋmãa jil bɛ a. Ɛcɛ a Zuda tẽw sojarɩ tɩ lɛb'a zɔ kul. 22A lɛ n'a a Edɔm tẽw zawrɩ a Zuda nɩ-kpɛ̃ɛnʋ a bɛ zu, wa tɔ a dɩ̃a.
A ʋlɩ vuo nɛ pʋɔ n'a a Livina tẽ-kpɛ̃ɛ mɩ̀ tɩ zawrɩ a Zuda tẽw nɩ-kpɛ̃ɛnʋ a ʋ zu.
23A Yoram yele al na cɛ a, a za sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ. 24Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a ʋ sãàkʋm-kore ũufʋ zie, a «Daviir Tẽ-kpɛ̃ɛ» pʋɔ. A ʋ bidɛb Akazɩasɩ n'ʋ tɩ lɩɛr'ʋ dɩ a naalʋ.
A Zuda tẽw nãà Akazɩasɩ
(Nyɛ̃ 2Bi-yel 22:1-6)
25A Akab bidɛb Yoram na ɩ a Ɩsɩrayɛl tẽw nãà a naalʋ-dɩb yome pie nɩ ayi sob'a, a Yoram bidɛb, Akazɩasɩ, tɩ lɩɛbɩ a Zuda tẽw nãà. 26Ʋ tɩ tɛr'ɩ yome lɩzɛr'ɩ ayi, ɛ́ dɩ a naalʋ yũon-been a Zerizalɛm. A mã tɩ dɩ na kɛ́ Atali, ɛ́ ɩ a Ɩsɩrayɛl tẽw nãà, Omiri, yir nɩr. 27A Akazɩasɩ tɩ tu n a Akab yir dem ɩ-ɩrɩ, ɩrɛ a lɛ na bɛ vɩɛl a, a Sore zie. Ʋ tɩ ɩrɛ na mɛ̃ a Akab yir dem a, bɛ na tɩ lãw taa a kul-taa lowr a ƴãw.
28Ʋlɛ nɩ a Akab bidɛb, Yoram, tɩ cen na tɩ zɛb'ɩ a Siiri tẽw nãà Hazayɛl, Aramɔtɩ tẽw na be Galaadɩ a. A Siiri tẽw dem tɩ ƴãw nɩ a nãà Yoram bàalʋ, a zɛbr pʋɔ. 29A Yoram tɩ lɛb'a cen Izireyɛl, k'ʋʋ tɩ sanɩ a ʋ natɩɛ. Lɛ n'a a Akazɩasɩ tɩ cen a Izireyɛl k'ʋʋ tɩ nyɛ̃ ʋ, ʋ na bɛ tɩ laar a ƴãw.
La Bible en Dagara © Alliance Biblique du Burkina Faso, 2013.