2 Na-mɩnɛ 5
5
A Elize sanɩ nɩ Naaman kɔnʋ
1A Siiri tẽw nãà sojarɩ nɩ-kpɛ̃ɛ tɩ dɩ na kɛ́ Naaman. A ʋ nɩ-kpɛ̃ɛ tɩ nɔnɛ ʋ nɩ yaga, ɛ́ maalɛ ʋ vla, bʋ̃ʋ n'ʋ vɛ̃, ʋlɛ n'ʋ a Sore tɩ tu, ɩ a Siiri tẽw dem zɛb tʋ̃ɔ́. Ɛcɛ a nɩr ŋa na tɩ ɩ gãdaa tɔr za a tɩ ɩ n kɔ̃w. 2Zɩ̃ kɛ́ Siiri tẽw dem bɛ mɩnɛ kãw na tɩ yi a nɩbɛ fáb a tɩ kpɛ n a Ɩsɩrayɛl tẽw pʋɔ nyɔw powle kãw wa n, ʋ wa ɩ a Naaman pɔw tõ-tõ-bi-pɔwle. 3A powle tɩ yel'ɩ a ʋ pɔw-nɩ-kpɛ̃ɛ bibir kãw: «Bʋ̃ʋ pãa ɩ! A ɩ̃ nɩ-kpɛ̃ɛ tɩ ɩ mɛ̃ ʋ cen nɩ a naaŋmɩn-ƴɛ̀r-manɛ na be a Samaari tẽw a zie a, ʋ nãá tɩ sanɩ nɩ a ʋ kɔnʋ.»
4A Naaman tɩ cen na tɩ manɩ a lɛ a Ɩsɩrayɛl tẽw powle na yel a kʋ̀ a nãà. 5A nãà yel ʋ: «Cen a be. Ɩ̃ na kʋ̀ b'ɩ sɛb-tʋɔla fʋ tɩ kʋ̀ a Ɩsɩrayɛl tẽw nãà.» Lɛ n'a a Naaman tɩ yi, tɛr ta salm-pla kilo#5:5 Kilo: A kilogɩram'ʋ bɛ pʋ̃ɔ bʋɔlɛ a kilo a ka. A kilogɩram been ɩ n gɩram túr. A kilo ɩ n tɩbrʋ bʋ̃-mána. Nyɛ̃ 1Na 10.16. kɔbr ata (300), salm-zɩɛ kilo lɩz'a ata nɩ cuw kparɩ pie cen nɩ. 6Ʋ tɩ kʋ̀ n a Ɩsɩrayɛl tẽw nãà a sɛb-tʋɔla na tɩ yere à ŋá a: «Ɩ̃ tone nɩ a ɩ̃ sojarɩ nɩ-kpɛ̃ɛ, Naaman, nɩ a sɛb-tʋɔla ŋa, kɛ́ fʋ sanɩ a ʋ kɔnʋ.» 7A Ɩsɩrayɛl tẽw nãà na dɛ tɩ kanɩ a sɛb-tʋɔla baar'a, ʋ taw nɩ a ʋ kparɩ cɩɛrɩ ɛ́ yel: «Naaŋmɩn nɛ m na mɩ́ tʋ̃ɔ́ ɩ nɩr ʋ kpi bɩɩ ɩ ʋ lɛb vʋʋrɛ bɩɩ? A Siiri tẽw nãà n'ɩ ŋan tõ nɩr k'ɩ̃ɩ sanɩ a ʋ kɔnʋ! Nyɩ nyɛ̃ a na, nɔhaarʋ n'a ʋ bɔbr mɛ̃!»
8A Naaŋmɩn nɩr, Elize, na tɩ wõ k'aa Ɩsɩrayɛl tẽw nãà taw nɩ a ʋ kparɩ cɩɛrɩ a, ʋ ƴãw na bɛ tɩ yel ʋ à ŋá: «Bʋ̃ʋ n'ʋ so fʋ taw a fʋ kparɩ cɩɛrɩ? A Naaman, ʋ wa páw mɛ̃, ʋʋ na bãw na kɛ́ naaŋmɩn-ƴɛ̀r-manɛ be n a Ɩsɩrayɛl tẽw.»
9A Naaman tɩ wa n nɩ a ʋ zɛbr-torko nɩ a ʋ wie wa àr'ɩ a Elize yir dɩ̃dɔr nʋɔr. 10A Elize tɩ tõ n nɩr k'ʋʋ tɩ yel ʋ à ŋá: «Cen tɩ so kʋ̃ɔ gb'a ayopõi a Zurdɛ̃ manɩ́, ɛ́ fʋ na sanɩ na lɛb vɩɛl.» 11A Naaman tɩ nyɛ̃ nɩ suur tɔl cen nɩ. Ʋ tɩ yere na: «Ɩ̃ tɩ tɩ́ɛrɛ k'aa naaŋmɩn-ƴɛ̀r-manɛ na yi n a ʋ yir wa àr a ɩ̃ niŋé, puori a Sore ʋ Naaŋmɩn, ír a ʋ nũu tɔ n a zi-bàal, ɛ́ sanɩ a ɩ̃ kɔnʋ. 12A Damasɩ tẽw mamɛ, a Abana nɩ a Parpaar, bɛ zuo a Ɩsɩrayɛl tẽw kʋ̃ɔnɩ za ɩ? Ɩ̃ kʋ̃ʋ tʋ̃ɔ́ so a kʋ̃ɔ a be lɛb vɩɛl bɩɩ?»
Lɛ n'a a Naaman tɩ cɛ̀ lɩɛbɩ, nyɛ̃ suur ʋ za, tɔl cen nɩ. 13Ɛcɛ a ʋ tõ-tõ-biir tɩ taw na ta yel ʋ: «Nɩ-kpɛ̃ɛ ɛ, a naaŋmɩn-ƴɛ̀r-manɛ tɩ yel kɛ́ fʋ ɩ bom na kpɛmɛ a, fʋ kʋ̃ʋ ɩ bɩɩ? Nɩ ʋ na yel fʋ: “Cen tɩ so kʋ̃ɔ, ɛ́ fʋ na lɛb'a vɩɛl a.”» 14A lɛ n'a a Naaman tɩ siw a Zurdɛ̃ manɩ́, tɩ kpɛ mʋr a kʋ̃ɔmɩ́ gb'a ayopõi, mɛ̃ a lɛ a Elize na yel a. A ʋ ƴã-gan tɩ lɛb'a ɩ mɛ̃ bibi-cãpile ƴã-gan a, ʋʋ lɛb vɩɛl. 15Ʋ tɩ lɛb'a wa daadaalɛ a Naaŋmɩn nɩr zie, ʋlɛ nɩ a ʋ pùor-dem za, wa kpɛ àr a ʋ niŋé ɛ́ yel à ŋá: «Ƴɛrɛŋa a, ɩ̃ pãa bãw na k'aa tẽw za zu a, Naaŋmɩn bɛ lɛb ka be a bɛ ɩ a ʋl na be a Ɩsɩrayɛl tẽw a ɩ. A lɛ pʋɔ a, sàw de a bom ɩ̃ na kʋ̀rɛ fʋ a.» 16A Elize tɩ sɔw na: «A Sore na vʋʋrɛ a zũú, a ʋl ɩ̃ na tone a zũú, ɩ̃ bɛ dier bom za ɩ.» A Naaman tɩ ɩ na gù, a Elize zawrɩ.
17Lɛ n'a a Naaman tɩ yel à ŋá: «Fʋ na zawrɩ bom za deb a, fʋ̃ʋ sàw ɩ̃ ɩ a fʋ tẽw tanɛ blã, man mílɛ̀#5:17 Mílɛ̀: Ʋ ɩ n bõw daa na do wur nyãw ʋ dɔw a. A mílɛ̀ bɛ dɔwr ɛ, dʋ̃-ãan n'ʋ. Nyɛ̃ 1Na 10.25. ayi tuofʋ, kul'ɩ: bʋ̃ʋ n'ʋ vɛ̃, ɩ̃ bɛ bɔbr k'ɩ̃ɩ lɛb maalɩ nyɩw-a-za-bagɛ nɩ lãw-taa bagɛ kʋ̀ ŋmɩn yoru, a bɛ ɩ a Sore ɩ. 18Ɛcɛ ɩ̃ de nɩ niwn zɛlɛ a Sore, k'ʋʋ dɩ suur kʋ̀ m yel ŋa ƴãw: a ɩ̃ nɩ-kpɛ̃ɛ, a Siiri tẽw nãà, na mɩ́ wa kpɛ a ʋ ŋmɩn Irimon yir k'ʋʋ tɩ puori a, a mɩ́ fɛr'a ɩ̃ mɩ̀ gbĩ dume gũu tɩ tɔ tẽw, a ɩ̃ kpãkpãw na n'ʋ ʋ mɩ́ nyɔw a ƴãw. A Sore, ʋ sàw mɩ́ dɩ suur kʋ̀ m a ɩb ŋa ƴãw.» 19A Elize tɩ sɔw ʋ na: «Fʋ na tʋ̃ɔ́ na cere nɩ ƴã-ɓaarʋ.» A Naaman tɔl cen.
A Gehazi sãwna
A Naaman bɛ tɩ cen zãá sɛr ɛ, 20ɛ́ a Naaŋmɩn nɩr Elize tõ-tõ-bie, Gehazi, tɩɛr ʋ pʋɔ: «A ɩ̃ nɩ-kpɛ̃ɛ bɛr'ɩ a Naaman, a Siiri tẽw dem nɩr ŋa, ʋ zawr'ɩ a bome ʋ na wa n a. A Sore na vʋʋrɛ a zũú, mãa na diw na bɩɛrɩ ʋ, tɩ páw bʋ̃-kãw a ʋ zie!» 21Lɛ n'a a Gehazi tɩ ìr diwr bɩ́ɛrɛ a Naaman. A Naaman na tɩ nyɛ̃ ʋ, ʋ diwr bɩ́ɛrɛ ʋ a, ʋ siw nɩ a ʋ zɛbr-torko zu fɔ̃wlɛ k'ʋʋ tuori ʋ. Ʋ tɩ sowr'ɩ a Gehazi: «Ɓaarʋ ʋ?» 22Ʋ sɔw: «Ɓaarʋ n'a! Tob'a, a ɩ̃ nɩ-kpɛ̃ɛ tõ m, k'ɩ̃ɩ wa yel fʋ, k'aa naaŋmɩn-ƴɛ̀r-manbɛ lãw kãw nɩbɛ ayi ta n a ʋ zie a ƴɛrɛŋa, ɛ́ yi a Efarayim tan vuo pʋɔ. Ʋ zɛlɛ na kɛ́ fʋ tɩr salm-pla kilo lɩzɛr'ɩ pie, nɩ cuw kparɩ ayi a bɛ ƴãw.» 23A Naaman tɩ yel ʋ na: «Sàw de salm-pla kilo lɩz'a ata.» Ɛ́ tɩ fɛr ʋ, ʋ sàw, ʋ ƴãw a salm-pla vʋɔrɩ ayi pʋɔ ɛ́ 'lẽ. Ʋ mɩ̀ tɩ cɔbr'ɩ kparɩ ayi, ɛ́ de a za kʋ̀ a ʋ tõ-tõ-biir ayi bɛ bɩɛlɩ nɩ a Gehazi. 24Bɛ na tɩ ta a zie ʋl bɛ na bʋɔlɛ Ofɛl a, a Gehazi de nɩ a vʋɔrɩ nɩ a kparɩ bin a ʋ yir, ɛ́ bɛr a Naaman tõ-tõ-biir bɛ lɛb cen.
25A Gehazi ʋl tɩ lɛb'a cen a ʋ nɩ-kpɛ̃ɛ zie. A Elize tɩ sowr'ʋ na: «Gehazi i, nyɩnɛ n'a fʋ yi waar?» Ʋ sɔw: «Ɩ̃ bɛ cen zie za ɩ.» 26A Elize yel ʋ: «A ɩ̃ tɩɛrʋ pʋɔ a, ɩ̃ bɛ nyɛ̃ nɩr na ƴaw siw a ʋ zɛbr-torko pʋɔ tuori fʋ a ɩ? Ɛcɛ kpar-vɩɛlɩ sàw-deb daar bɛ n'a ɩ, bɛ nãà yere libie, kɛ́ fʋ dà n olivʋ tɩɩr nɩ divɛ̃ tɩɩr, nĩi nɩ píir, tõ-tõ-bi-dɛbr nɩ tõ-tõ-bi-pɔwbɛ ɩ. 27Bʋ̃ʋ n'ʋ vɛ̃, a Naaman kɔnʋ na páw fʋ na, fʋ̃ʋ nɩ a fʋ bʋʋrɛ, kʋralɛ!» A Gehazi na tɩ yi a Elize zie a, ʋ tɩ kɔ̃w na, ɛ́ a ƴã-gan pɛlɩ parpar#5:27 Ƴã-gan pɛlɩ parpar: A nɩ-pɛlɛ zie a, a ƴãw-zɩɛ mɩ́ ɩ n ƴãw-pla..
La Bible en Dagara © Alliance Biblique du Burkina Faso, 2013.