2 Na-mɩnɛ 13
13
A Ɩsɩrayɛl tẽw nãà Yoakaazɩ
1A Zuda tẽw nãà Akazɩasɩ bidɛb, Zowasɩ, naalʋ-dɩb yome lɩzɛr'ɩ ata sob daar'a a Yehu bidɛb, Yoakaazɩ, tɩ lɩɛbɩ a Ɩsɩrayɛl tẽw nãà a Samaari, dɩ a naalʋ yome pie nɩ ayopõi. 2Ʋ tɩ ɩ n a lɛ na bɛ vɩɛl a, a Sore zie. Ʋ tɩ cɔwr'ɩ a Nevatɩ bidɛb, Zerobowam, yel-bebe ʋ na tɩ ƴãw a Ɩsɩrayɛl nɩbɛ maalɩ a, ʋ bɛ tɩ bɛr a yel-bebe á ŋá maalʋ ɛ. 3Lɛ n'a a Sore tɩ nyɛ̃ nɩ a Ɩsɩrayɛl nɩbɛ suur, ɛ́ bɛr bɛ kʋ̀ a Siiri tẽw nãà, Hazayɛl, nɩ a ʋ bidɛb, Bɛn-Hadadɩ, a tɩ cɛlɩ.
4Ɛcɛ a Yoakaazɩ tɩ zɛlɩ nɩ a Sore k'ʋʋ ɓãá suur, ʋ bɛr wõ. Bʋ̃ʋ n'ʋ vɛ̃, ʋ tɩ nyɛ̃ nɩ a kpɩɛrʋ al za a Siiri tẽw nãà na tɩ ɩrɛ a kpɩɛr a Ɩsɩrayɛl nɩbɛ a. 5A Sore tɩ kʋ̀ n faarɛ a Ɩsɩrayɛl nɩbɛ, ʋ faa bɛ a Siiri tẽw dem nuru pʋɔ. Lɛ n'a a Ɩsɩrayɛl nɩbɛ tɩ tɛr ƴã-ɓaarʋ mɛ̃ a dãwdãw a. 6Ɛcɛ bɛ tɩ cãà na maalɛ a Zerobowam yir dem yel-bebe, a Zerobowam na tɩ ƴãw a Ɩsɩrayɛl nɩbɛ za maalɩ a yel-bier a. A Asera dà-bara tɔr za tɩ cãà na àr a Samaari.
7Wi-zɔmnbɛ lɩz'a ayi nɩ pie, zɛbr-torkori pie nɩ soja-gbɛ́ɛ dem tùr-pie (10 000) nɛbɛ wa tɩ cɛ a Yoakaazɩ. Bʋ̃ʋ n'ʋ vɛ̃, a Siiri tẽw nãà tɩ kʋ n a bɛl na cɛ a, ʋ tɩ ɩ bɛ na mɛ̃ tanɛ bɛ na nɛbr a.
8A Yoakaazɩ yele al na cɛ a, a alɩ bome nɛ za ʋ na ɩ a, a ʋ gãda-tome, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ. 9Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a Samaari. A ʋ bidɛb, Zowasɩ, tɩ lɩɛr'ʋ na dɩ a naalʋ.
A Ɩsɩrayɛl tẽw nãà Zowasɩ
10A Zuda tẽw nãà, Zowasɩ, naalʋ-dɩb yome lɩzɛr'ɩ pie nɩ ayopõi sob daar'a a Yoakaazɩ bidɛb, Zowasɩ, tɩ dɩ a naalʋ a Ɩsɩrayɛl nɩbɛ zu a Samaari, yome pie nɩ ayʋɔb. 11Ʋ tɩ ɩ n a lɛ na bɛ vɩɛl a, a Sore zie. Ʋ bɛ tɩ bɛr a Nevatɩ bidɛb, Zerobowam, yel-bier kãw za maalʋ ɛ, a yel-bebe a Zerobowam na tɩ ƴãw a Ɩsɩrayɛl nɩbɛ maalɩ a, ʋ tɩ tu n a pùor.
12A Zowasɩ yele al na cɛ a, a alɩ bome nɛ za ʋ na ɩ a, a ʋ gãda-tome, a zɛbr ʋ na zɛb'ɩ a Zuda tẽw nãà Amazɩasɩ#13:12 Amazɩasɩ: Nyɛ̃ 2Na 14.8-14. a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ. 13Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a Samaari, a Ɩsɩrayɛl tẽw na-mɩnɛ ũufʋ zie, ɛ́ Zerobowam#13:13 Zerobowam: A Zerobowam ayi sob'ʋ bɛ yere a ka. lɩɛr'ʋ dɩ a naalʋ.
A Elize yel'a k'aa Ɩsɩrayɛl nɩbɛ na zɛb'a tʋ̃ɔ́ a Siiri tẽw dem
14A Elize na tɩ ìr, ɩ bàal, ɛ́ a ɩ a ʋ kũu-kʋra bàalʋ a, a Ɩsɩrayɛl tẽw nãà, Zowasɩ, tɩ cen nɩ a ʋ zie. Ʋ tɩ gũu na cɔw ʋ, ɛ́ kone yere nɩ: «Ɩ̃ sãà a! Ɩ̃ sãà a! Fʋ zɛ̃ na mɛ̃ a Ɩsɩrayɛl zɛbr-torkori za, nɩ a wi-zɔmnbɛ za a!» 15A Elize tɩ yel ʋ na: «De tam nɩ pime.» A Zowasɩ de a tam nɩ a pime. 16-17A Elize yel ʋ: «Yuo a tokoro vʋɔr a saa-pɛrɩ́ lowr.» A nãà yuo a tokoro vʋɔr. A Elize cãà lɛb yel ʋ: «De a fʋ tam dúori.»
A nãà de a tam. A Elize tɩ dɔwl'ɩ a ʋ nuru a nãà nuru zu, ɛ́ yel ʋ k'ʋʋ tɛ. A nãà na tɩ tɛbr wa báarɛ a, a Elize yel'a: «A Sore na na ɩ fʋ zɛb tʋ̃ɔ́ a pĩi n'ɩ á ŋá, a Siiri tẽw dem fʋ na na zɛb tʋ̃ɔ́ a. Fʋ na zɛb'a tʋ̃ɔ́ bɛ pẽlẽpẽlẽ Afɛkɩ.» 18Al pùorí, a Elize tɩ lɛb'a yel a Zowasɩ: «De a pime al na cɛ a.» Ʋ de. A Elize yel ʋ: «Tɛ a tẽsɔw!» Ʋ tɛ gb'a ata ɛ́ bɛr. 19A Naaŋmɩn nɩr tɩ nyɛ̃ nɩ ʋ nɩ suur, ɛ́ yel: «Fʋ̃ʋ tɩ tɛ a tẽsɔw gb'a anũu bɩɩ gb'a ayʋɔb a, fʋ nãá tʋ̃ɔ́ nɩ a Siiri tẽw dem a nʋɔr kʋ, ɛcɛ ƴɛrɛŋa a, gb'a ata tɛwr'a fʋ na zɛb tʋ̃ɔ́ bɛ.»
20A Elize tɩ kpi na bɛ ũú.
Yũon za a, Mowab tẽw dem na ɩ nɩ-farbɛ a, mɩ́ wa n a Ɩsɩrayɛl tẽw pʋɔ. 21Bibir kãw, nɩbɛ na tɩ cere nɩ kũu kɛ́ bɛ tɩ ũù a, tɩ nyɛ̃ nɩ a nɩ-farbɛ bɛ ŋa. Bɛ tɩ lɔb'ɩ a kũu ƴãw a Elize bɔw pʋɔ ɛ́ zɔ. A kũu tɩ tɔ n a Elize kɔbɛ lɛb vʋʋrɛ, ɛ́ ìr àr.
A Ɩsɩrayɛl nɩbɛ zɛb'a tʋ̃ɔ́ a Siiri tẽw dem
22A Siiri tẽw nãà, Hazayɛl, tɩ ɩ na a kpɛ a Ɩsɩrayɛl nɩbɛ a Yoakaazɩ naalʋ-dɩb daar za. 23Ɛcɛ a Sore wa zɔ n bɛ nɩbaalʋ, ʋ wa dɩ n suur kʋ̀ bɛ, a wõ-taa ʋ na maal'ɩ a Abraham, a Ɩzaakɩ nɩ a Zakɔb a ƴãw. Ʋ bɛ tɩ sàw kʋ bɛ pàw pɛr ɛ, ɛ́ bɛ tɩ diw bɛ bɛr zãá nɩ ʋ sɛr ɛ.
24A Siiri tẽw nãà, Hazayɛl, wa kpi na, ɛ́ a ʋ bidɛb, Bɛn-Hadadɩ, lɩɛr'ʋ dɩ a naalʋ. 25Lɛ n'a a Zowasɩ tɩ lɛb zɛb de a Ɩsɩrayɛl tẽ-bɛrɛ a Bɛn-Hadadɩ zie, a tẽ-bɛrɛ a Hazayɛl na tɩ faa a Zowasɩ sãà, Yoakaazɩ, zie a. A Zowasɩ tɩ zɛb'a tʋ̃ɔ́ a Bɛn-Hadadɩ gb'a ata, ɛ́ lɛb de a Ɩsɩrayɛl tẽ-bɛrɛ.
La Bible en Dagara © Alliance Biblique du Burkina Faso, 2013.