2 Korɛ̃tɩ 10
10
A Pol manɛ nɩ a ʋ tome pɛr
1A mãa Pol bɛ na yel k'ɩ̃ɩ mɩ́ siwre nɩ ɩ̃ tʋɔra yaga za mãa wa be a nyɩ sɔgɔ a, ɛ́ kpɛ pʋra a lɛn daar ɩ̃ na mɩ́ wa zãá a, mãa tɔr za n'ʋ kpaalɛ nyɩ a Kɩrɩta su-baalʋ nɩ a ʋ vɩɛlʋ zũú: 2ɩ̃ zɛlɛ nyɩ na, nyɩ ta sàw ɩ̃ wa wul nyɩ k'ɩ̃ɩ kpɛ n pʋra mãa wa wa a nyɩ zie a ɩ. Bʋ̃ʋ n'ʋ vɛ̃, ɩ̃ bɛ tɩɛr k'ɩ̃ɩ na bɛr'ɩ a bɛlɩ dem na yere k'aa tɩ ɩ-ɩrɩ tu n nɩsaalʋ tɛwr a ɩ. 3Tɩ na saa ɩ nɩsaalbɛ a, tɩ bɛ zɛbr a zɛbr mɛ̃ a lɛ tɛwr nɩsaalbɛ na mɩ́ zɛbr a ɩ. 4A tɩ zɛbr bome bɛ yi nɩsaalbɛ zie ɩ, Naaŋmɩn zie n'a a tɩ zɛbr bome fãw yi, k'aa tʋ̃ɔ́ mɩ́ ŋmɛ a yir-kpɛn lɔb. Tɩ mɩ́ ŋmɛ n a tɩɛrʋ na bɛ tu yel-mɩŋa a lɔb, 5tɩ mɩ́ tʋ̃ɔ́ nɩ fãw za na zɛwr ʋ tʋɔra bɛ sàwr kɛ́ bɛ bãw a Naaŋmɩn a ɩ. Tɩ mɩ́ tʋ̃ɔ́ nɩ nɩsaal tɩɛrʋ za, a ɩ mɛ̃ gaso pʋɔ n'a tɩ nyɔw ʋ ƴãw a, kɛ́ tɩ ɩ ʋ sàwr a Kɩrɩta nʋɔr. 6Ɛ́ nyɩmɛ dɛ wa sàwr nʋɔr tɩ ɓɩɩlɩ a, tɩ cɔbr'a baarɩ gù kɛ́ tɩ dɔwrɩ nʋɔr-zawrʋ za.
7Nyɩ jɩ́rɛ a lɛ a yele na sɩrɩ ŋmɛ̃ a: nɩr wa bãw k'aa Kɩrɩta so ʋ a, ʋ páw bãwnɩ a: a Kɩrɩta wa so ʋ a, a Kɩrɩta mɩ̀ so tɩ. 8Bʋ̃ʋ n'ʋ vɛ̃, vĩ bɛ ɩrɛ mɛ̃ mãa saa pɔrɛ nɩ a fãw a Sore na kʋ̀ tɩ a ɩ, ʋ kʋ̀ tɩ nɩ a fãw ŋa a nyɩ vla ƴãw, a nyɩ loba ƴãw bɛ n'a ɩ. 9Ɩ̃ bɛ bɔbr k'ɩ̃ɩ ɩ mɛ̃ ɩ̃ ƴãwnɛ nyɩ nɩ dɛ̃bɩ̃ɛ nɩ a ɩ̃ sɛbr ɛ. 10Bʋ̃ʋ n'ʋ vɛ̃, bɛ yere na: «A Pol sɛbr ƴɛ̀r-bie mɩ́ tɩbrɛ na ɛ́ kpɛmɛ, ɛcɛ a ʋl tɔr za wa be a tɩ sɔgɔ a, ʋ bɛ mɩ́ tɛr fãw ɛ, a ʋ ƴɛ̀rʋ bɛ mɩ́ tɛr pɛr ɛ.» 11A sob nɛ na yere à à ŋá a, ʋ páw bãwnɩ a: a lɛ tɩ na ƴɛ̀rɛ a tɩ sɛbr pʋɔ tɩ na zãá a, lɛ tɔr za n'a tɩ na ŋmɛ̃ a tɩ ɩ-ɩrɩ pʋɔ, tɩmɛ wa be a nyɩ sɔgɔ a.
12Tɩ kʋ̃ kpɛ pʋra yel kɛ́ tɩɩm nɩ a nɩbɛ bɛ mɩnɛ kãw, na mɩ́ manɛ a bɛ tʋɔra ɩ-vɩɛlɩ a, sɛw nɩ taa a ɩ, bɩɩ tɩ kʋ̃ de tɩ tʋɔra manɛ nɩ bɛ ɩ. Dãbole nɛbɛ, bɛ na de bɛ tʋɔra bɛ lɩɛbɩ bʋ̃-mána bɛ manɛ nɩ bɛ tʋɔra a ƴãw. 13Tɩɩm a, tɩ kʋ̃ pɔrɛ tɩ col'ɩ ɛ. Tɩ na mɩ́ pɔ na tɩ ta n a be a Naaŋmɩn na ƴãw a tɩ tome zie tɩ tɩɛ a, ʋ na sàw tɩ wa ta a nyɩ zie a ƴãw. 14Bʋ̃ʋ n'ʋ vɛ̃, tɩ bɛ zuore a tɩ tʋr-bɔw bɛrɛ ɩ, mɛ̃ a lɛ nãá tɩ n'a, tɩmɛ bɛ tɩ wa a nyɩ zie a ɩ. Tɩmɛ nɛbɛ sɩrɩ de niwn ta a nyɩ zie kʋ̀ nyɩ a Kɩrɩta Yel-nʋ̃ɔ̀. 15Tɩ bɛ de tome nɩ-yoru na tõ a, pɔrɛ nɩ yaga za zuo ɩ. Ɛcɛ, tɩ nɩ̃ɛ na tɩɛrɛ k'aa nyɩ naaŋmɩn-sàwfʋ na kɛrɛ na dɔwlɛ, nɩ kɛ́ tɩ na tʋ̃ɔ́ na tõ tõ-kpɛ̃ɛ zuo lɛ a nyɩ sɔgɔ, ɛcɛ a cãà ɩ a tɩ tome tʋr-bɔw pʋɔ#10:15 Nyɛ̃ Ʋr 15.17-21.. 16Al pùorí, tɩ na tʋ̃ɔ́ na hieri yel a Yel-nʋ̃ɔ̀ ten na be a nyɩ tẽw nidaa pʋɔ, ɛ́ kʋ̃ pɔrɛ nɩ tome nɩ-yoru na tõ a bɛl mɩŋa tome púo pʋɔ a ɩ.
17Mɛ̃ a lɛ a Sɛb-sõw na yel a: «Ʋlɩ sob wa zɛwr ʋ tʋɔra a, ʋ zɛwr ʋ tʋɔra a Sore ƴãw#10:17 Nyɛ̃ 1Ko 1.31..» 18A sob nɛ na nyɛ̃ ʋ tʋɔra ʋ ɩ nɩ-vla a, a ʋ yele bɛ n'a bɛ mɩ́ de ɩ, sob nɛ a Sore na yel k'ʋʋ ɩ n nɩ-vla a n'ʋ.
Currently Selected:
2 Korɛ̃tɩ 10: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
