2 Bibie za yel-manɩ 35
35
A Zozɩasɩ maalɛ nɩ a Tɔl-gãw cuw
(Nyɛ̃ 2Na 23:21-23)
1A Zozɩasɩ tɩ maal'ɩ a Tɔl-gãw cuw a Zerizalɛm. A yũon cuw-dãw-niwn sob bibie pie nɩ anaar sob, bɛ tɩ kʋ n a Tɔl-gãw cuw dʋn. 2A Zozɩasɩ tɩ lɛb'a zɩɩlɩ a bàwr-maalbɛ a bɛ tõ-nɛ́ɛ pʋɔ, ɛ́ kpaalɩ bɛ kɛ́ bɛ ƴãw fãw kaarɛ a Sore yir-kpɛ̃ɛ zie. 3Al pùorí, ʋ tɩ ƴɛ̀r'ɩ a levitɩ mɩnɛ zie, bɛl na so a nɩbɛ wulu, ɛ́ ɩ Naaŋmɩn nɩ-sori a. Ʋ tɩ yel bɛ na: «Nyɩ ƴãw a wõ-taa daga a yir-kpɛ̃ɛ pʋɔ, a Daviir bidɛb Salomɔ̃, a Ɩsɩrayɛl nãà, na ŋmãa a. Nyɩ kʋ̃ lɛb tuo ʋ a nyɩ bawŋmamɛ zu ɛ. Ƴɛrɛŋa a, nyɩ tone a Sore nyɩ Naaŋmɩn nɩ a ʋ nɩ-bʋʋrɛ Ɩsɩrayɛl tome. 4Nyɩ bʋ́r bʋ́r tu n a nyɩ yie dɔwlʋ nɩ a nyɩ tome palɛ, tu n a nɛ́ɛ a Ɩsɩrayɛl nãà Daviir nɩ a ʋ bidɛb Salomɔ̃ na sɛb a. 5Kɛ́ yir ŋa za levitɩ mɩnɛ mɩ́ be a Ŋmɩn-yir-kpɛ̃ɛ pʋɔ a Ɩsɩrayɛl nɩbɛ ŋmaarɛ ƴãw, mɛ̃ a lɛ a bɛ dɔwlʋ nɩbɛ na põ põ a. 6Nyɩ kʋ a Tɔl-gãw cuw dʋn, nyɩ so a nyɩ dɛwr bɛr, ɛ́ sõw a nyɩ yɛbr Ɩsɩrayɛl nɩbɛ a yele tʋ̃ɔ́ tu mɛ̃ a lɛ a Sore na ƴãw a Moyiir ƴãw a nʋɔr a.»
7A Zozɩasɩ tɩ nyɔw nɩ a ʋl mɩŋa dʋn pʋɔ péli nɩ bʋli tùr-lɩzɛr'ɩ pie (30 000), nɩ nĩi túr ata (3 000) kʋ̀ a Ɩsɩrayɛl nɩbɛ na tɩ be a be a, bɛ kʋ maal'ɩ a Tɔl-gãw cuw bàwr. 8A ʋ tõ-tõ-bi-bɛrɛ mɩ́ tɩ nɔnɛ na tɩr dʋn a nɩbɛ ƴãw, a bàwr-maalbɛ nɩ a levitɩ mɩnɛ ƴãw. Hɩlkɩa, Zekarɩahu nɩ Yehɩɛl na tɩ kaarɛ a Ŋmɩn-yir-kpɛ̃ɛ zie a tɩ kʋ̀ n a bàwr-maalbɛ péli nɩ bʋli túr-ayi dɔwlɩ kɔbr ayʋɔb (2 600) nɩ nĩi kɔbr ata (300), bɛ kʋ maal'ɩ a Tɔl-gãw cuw bàwr. 9A Konanɩahu nɩ a ʋ yɛbr Semayahu nɩ Netanɛl, de nɩ Hasavɩahu nɩ Yeyɩɛl nɩ Yozavadɩ na tɩ ɩ a levitɩ mɩnɛ nɩ-bɛrɛ a tɩ kʋ̀ n a levitɩ mɩnɛ péli nɩ bʋli túr anũu (5 000) nɩ nĩi kɔbr anũu (500). 10Nyɛ̃ lɛ a puoru na tɩ cɔbrɩ a: a bàwr-maalbɛ tɩ be n a bɛ tome ziir ɛ́ a levitɩ mɩnɛ be a bɛ palɛ pʋɔ, mɛ̃ a lɛ a nãà na tɩ yel a. 11A nɩbɛ tɩ kʋ n a Tɔl-gãw cuw péli nɩ a bʋli. Bɛ tɩ kʋ̀ n a dʋn á ŋá zɩ̃ɩ a bàwr-maalbɛ bɛ cir ƴãw a bàwr-maal-kuur zu, ɛ́ a levitɩ mɩnɛ sɩrɛ a dʋn bɛ na kʋ a. 12A lɛ a Ɩsɩrayɛl dɔwlʋ nɩbɛ na põ põ a, lɛ n'a bɛ tɩ ír a dʋn a mɩnɛ bɛr, báa zuo a za a nadɛɛ a nyɩw-a-za-bagɛ ƴãw, mɛ̃ a lɛ na sɛb a Moyiir sɛbɛ pʋɔ a. 13Mɛ̃ a lɛ a na ɩrɛ a, bɛ tɩ sɛ̃ n a Tɔl-gãw pele vũu zu, ɛ́ dʋw a de-kʋ̀b bome al na cɛ a ziduwli pʋɔ, lali pʋɔ bɩɩ bome a mɩnɛ pʋɔ. A pùorí bɛ ɩ a fɔ̃w cen nɩ tɩ kʋ̀ a Ɩsɩrayɛl nɩbɛ za. 14Al pùorí, a levitɩ mɩnɛ tɩ cɔbr'ɩ a bàwr-maalbɛ nɩ a bɛl mɩŋa dem. Bʋ̃ʋ n'ʋ vɛ̃, a bàwr-maalbɛ na ɩ a Aarɔ̃ bʋʋrɛ a tɩ be n a nyɩw-a-za-bagɛ de tɩrʋ zu, nɩ a bagɛ za nɛn-kãánɩ de tɩrʋ zu tɩ sɔb'ɩ a zie, alɛ so a levitɩ mɩnɛ tɩ ɩ a bɛ bʋ̃-dɩrɩ. 15A yiel-yielbɛ na ɩ a Asafʋ bʋʋrɛ a tɩ tʋ̃ɔ́ na be a bɛ beba zie tu n a lɛ a Daviir nɩ a ʋ yã-wulbɛ Asafʋ, Heman nɩ Yedutun na ƴãw a nʋɔr a. A dɩ̃dɔ-gùrbɛ mɩ̀ tɩ be n a bɛ beba zie. Bɛ kãw za bɛ tɩ bɛr a ʋ tome ɩ, bʋ̃ʋ n'ʋ vɛ̃, a levitɩ mɩnɛ bɛl na cɛ a tɩ ɩrɛ nɩ a bʋ̃-dɩrɩ a bɛ ƴãw. 16À ŋá n'a a yele za tɩ cɔbrɩ a ʋlɩ bibir nɛ a Sore ƴãwfʋ ƴãw: a Tɔl-gãw cuw maalʋ nɩ a bagɛ maalʋ a Sore bàwr-maal-kuur zu tɩ tu na mɛ̃ a lɛ a nãà Zozɩasɩ na tɩ yel a.
17A Tɔl-gãw cuw pùorí, a Ɩsɩrayɛl nɩbɛ na tɩ be a be a tɩ maal'ɩ a dipɛ̃ na bɛ ƴãw dãbɩl a cuw, bibie ayopõi. 18A na tĩ a naaŋmɩn-ƴɛ̀r-manɛ Samɩɛl daar a, Tɔl-gãw cuw ŋa tɔ bɛ lɛb tɩ dãw maalɩ a Ɩsɩrayɛl tẽw pʋɔ ɩ. Ɩsɩrayɛl nãà kãw za bɛ tɩ maalɩ Tɔl-gãw cuw mɛ̃ a lɛ a Zozɩasɩ nɩ a bàwr-maalbɛ, a levitɩ mɩnɛ, a Zuda tẽw dem za nɩ a Ɩsɩrayɛl nɩbɛ bɛl na tɩ be a be a nɩ a Zerizalɛm tẽw dem za na tɩ maalɩ a ɩ. 19A Zozɩasɩ naalʋ-dɩb yome pie nɩ ani sob daar'a a Tɔl-gãw cuw ŋa tɩ maalɩ.
A Zozɩasɩ naalʋ-dɩb baarʋ
(Nyɛ̃ 2Na 23:28-30)
20A Zozɩasɩ na tɩ lɛb maalɩ a Ŋmɩn-yir-kpɛ̃ɛ ƴãw baar'a, bibir kãw, a Eziptɩ tẽw nãà Neko tɩ cen na k'ʋʋ tɩ zɛb'ɩ a Karkemisɩ tẽw, a Efaratɩ man nʋɔr. A Zozɩasɩ tɩ yi na tuor'ʋ. 21A Neko tɩ tõ n nɩbɛ kɛ́ bɛ tɩ yel ʋ à ŋá: «Zuda tẽw nãà a, mãa nɩ fʋ̃ʋ mɩ̀ bʋnʋ? Fʋ̃ʋ bɛ n'ʋ ɩ̃ ŋmaarɛ nɩ a zɛbr a dɩ̃a ɩ, dɔ̃ sob yũo n'ʋ. Ɛ́ Naaŋmɩn yel k'ɩ̃ɩ páwr. Naaŋmɩn lãw nɩ mɛ̃ na, a na ɩ lɛ a, ta cewre nɩ ʋ ɛ, alɛ bɛ ɩ lɛ, ʋ na kʋ b a.» 22Ɛcɛ a Zozɩasɩ bɛ tɩ sàw lɩɛbɩ bɛr ɛ, bʋ̃ʋ n'ʋ vɛ̃, ʋ tɩ bɔbr'ɩ vo-vla ʋ na na zɛb'ɩ ʋ a. Lɛ n'a ʋ bɛ tɩ bɛr wõ a ƴɛ̀rʋ a Naaŋmɩn na tɩ ƴãw a Neko ƴɛ̀r a ɩ, ɛ́ tɩ cen tɩ ŋmãa nɩ ʋ a zɛbr a Megido tɩ̃tal pʋɔ. 23A tã-tɛbrbɛ pime tɩ páw nɩ a nãà Zozɩasɩ a zɛbr pʋɔ, ʋ yel a ʋ tõ-tõ-biir: «Nyɩ tɛr mɛ̃ yi n, ɩ̃ bɛ laar ɛ.» 24A ʋ tõ-tõ-biir tɩ nyɔw ʋ nɩ a ʋ zɛbr-torko pʋɔ siw nɩ tɩ ƴãw zɛbr-torko yũo pʋɔ cen nɩ ʋ a Zerizalɛm. Ʋ tɩ kpi n a be, bɛ ũù ʋ a ʋ sãà mɩnɛ yarʋ pʋɔ, ɛ́ a Zuda nɩ a Zerizalɛm nɩbɛ kõ ʋ.
25A naaŋmɩn-ƴɛ̀r-manɛ Zeremi tɩ kõ n lãw-mʋɔlɛ a Zozɩasɩ ƴãw. A lɛn daar za wa tɩ tɔ a dɩ̃a a, a yiel-yielbɛ dɛbr nɩ pɔwbɛ za, ƴɛ̀rɛ nɩ a Zozɩasɩ ƴɛ̀rʋ a bɛ lãw-mʋɔlɛ pʋɔ. Bʋ̃ʋ n'ʋ vɛ̃, a tɛr'ɩ lɛɛɛ, tɩ ɩ ɩb ɩrɛ a Ɩsɩrayɛl tẽw. A lãw-mʋɔlɛ á ŋá ƴɛ̀r-bie be n a lãw-mʋɔlɛ sɛbɛ#35:25 A Lãw-mʋɔlɛ sɛbɛ na be a Sɛb-sõw pʋɔ a tɩ tɔ̃w na dãw tɛr ƴɛ̀r-pɛ-yaga a koro za. Ɛcɛ a dɩ̃a a, a Lãw-mʋɔlɛ sɛbɛ na be a tɩ Sɛb-sõw pʋɔ a, ƴɛ̀r-bir kãw za bɛ càarɩ a Zozɩasɩ kũu yele towtow ɛ. pʋɔ.
26-27A Zozɩasɩ yele al na cɛ a, a tib daar tɩ ta n a baarʋ daar a, a be n a Ɩsɩrayɛl nɩ a Zuda na-mɩnɛ sɛbɛ pʋɔ. Bɛ man nɩ a sɛbɛ ŋa pʋɔ a lɛ a Zozɩasɩ na tu a lɛ na sɛb ƴãw a Sore wulu pʋɔ bɛ lɛb pùor a.
La Bible en Dagara © Alliance Biblique du Burkina Faso, 2013.