1 Zã 3
3
Tɩ ɩ n Naaŋmɩn bibiir
1Nyɩ nyɛ̃ a Naaŋmɩn Sãà na nɔ̃w tɩ sɛw, tɩ ƴãw bɛ bʋɔlɛ tɩ Naaŋmɩn bibiir a! Ɛ́ tɩ ɩ ʋ na! A lɛ n'a so a tẽ-daa bɛ bãw tɩ ɛ, ʋ na bɛ bãw a Naaŋmɩn a ƴãw. 2Ɩ̃ bá mɩnɛ ɛ, a ƴɛrɛŋa, tɩ ɩ n Naaŋmɩn bibiir, ɛcɛ a lɛ tɩ nãà ŋmɛ̃ a n'a bɛ sãá sɛr ɛ. Tɩ bãwnɩ a n'a k'aa Kɩrɩta wa sãá a lɛn daar a, tɩ na ŋmɛ̃ na taa nɩ ʋ, tɩ na na nyɛ̃ ʋ mɛ̃ a lɛ ʋ na ŋmɛ̃ a ƴãw. 3Ɛ́ nɩsaal za na ƴãw a tɩɛrʋ ŋa tɔ a ʋ ƴãw a, mɩ́ ƴãw nɩ fãw vɩɛl mɛ̃ a Kɩrɩta na vɩɛl a.
4Nɩr za na maalɛ yel-bier a mɩ́ zawr'ɩ Naaŋmɩn nʋɔr, bʋ̃ʋ n'ʋ vɛ̃, a yel-bier ɩ n Naaŋmɩn nʋɔr zawrʋ. 5Ɛcɛ nyɩ bãwnɩ a na, a Kɩrɩta wa na k'ʋʋ wa ír a yel-bebe bɛr, ɛcɛ ʋl bɛ maalɩ yel-bier ɛ. 6Nɩsaal za na maalɛ yel-bier a bɛ nyɛ̃ ʋ ɛ, ɛ́ bɛ bãw ʋ ɛ.
7Ɩ̃ bibiir i, nyɩ ta sàw nɩr za tuli nyɩ ɛ. Sob nɛ na tuur a yel-mɩŋa a ɩ n nɩ-mɩŋa mɛ̃ a Kɩrɩta na ɩ nɩ-mɩŋa a. 8Sob nɛ na maalɛ a yel-bier a, Gɛgɛra so ʋ. A Gɛgɛra na ɩ yel-bier-maalɛ a pɛr-tib daar za a ƴãw. Yel ŋa ƴãw n'a a Naaŋmɩn Bie wa: k'ʋʋ wa sãw a Gɛgɛra tome bɛr.
9Nɩsaal za na ɩ Naaŋmɩn bʋ̃-dɔwra a, ʋ bɛ cãà maalɛ yel-bier ɛ, a nyɔ-vʋʋrʋ fãw na yi a Naaŋmɩn zie a na be a ʋ pʋɔ a ƴãw, ɛ́ a Naaŋmɩn na n'ʋ dɔw ʋ a, ʋ kʋ̃ tʋ̃ɔ́ cãà maalɛ yel-bier ɛ. 10À ŋá n'a bɛ mɩ́ bãw a Naaŋmɩn bibiir nɩ a Gɛgɛra bibiir: sob nɛ za na bɛ tuur a yel-mɩŋa ɛ́ mɩ̀ bɛ lɛb nɔnɛ a ʋ yɛb a bɛ ɩ Naaŋmɩn bie ɩ.
Nyɩ ɩ tɩ nɔnɛ taa
11Yel ŋa n'ʋ nyɩ wõ a pɛr-tib daar za: kɛ́ tɩ nɔnɛ taa. 12A bɛ sɛw kɛ́ tɩ ŋmɛ̃ mɛ̃ a Kayɛ̃ a ɩ: ʋ na tɩ ɩ a Faalʋ sob nɩr a n'a so ʋ kʋ a ʋ yɛb. Ɛ́ bʋ̃ʋ ƴãw n'a ʋ tɩ kʋ ʋ? A ʋ ɩ-ɩrɩ bɛ tɩ vɩɛl ɛ, ɛ́ a ʋ yɛb dem tu a yel-mɩnʋ.
13Yɛbr i, a tẽ-daa ŋa nɩbɛ wa hɩ̃ɛn nyɩ a, a ta ɩ mɛ̃ a ùr nyɩ na ɩ. 14Tɩɩm a, tɩ bãw na kɛ́ tɩ yi n a kũu pʋɔ kpɛ nyɔ-vʋʋrʋ pʋɔ, tɩ na nɔnɛ a tɩ yɛbr a ƴãw. Sob nɛ na bɛ tɛr a nɔ̃wfʋ a cãà na be a kũu pʋɔ. 15Nɩr za na hɩ̃ɛn a ʋ yɛb a, nɩ-kʋrɛ n'ʋ, ɛ́ nyɩ bãwnɩ a na nɩ-kʋrɛ kãw za na bɛ mɩ́ tɛr a nyɔ-vʋʋrʋ na be kʋralɛ a. 16Yel ŋa pʋɔ n'a tɩ bãw ʋlɩ bom nɛ na n'ɩ a nɔ̃wfʋ a: a Yeezu de nɩ a ʋ nyɔ-vʋʋrʋ tɩr a tɩ ƴãw. A na ɩ lɛ a, a tɩɩm mɩ̀, a fɛr'a kɛ́ tɩ mɩ̀ mɩ́ de a tɩ nyɔ-vʋʋrʋ tɩr a tɩ yɛbr ƴãw. 17Nɩr wa tɛr a a tẽw zu, ɛ́ nyɛ̃ a fɛrɛ a ʋ yɛb, ʋʋ bɛ zɔ ʋ nɩbaalʋ a, ŋmɩŋmɩn n'a ʋ na tʋ̃ɔ́ yel k'ʋʋ nɔnɛ nɩ a Naaŋmɩn? 18Ɩ̃ bibiir i, nyɩ ta ɩ tɩ nɔnɛ nɩ nʋɔr nɩ ƴɛ̀r-vɩɛlɩ tɛwr ɛ, nyɩ ɩ a tɩ nɔ̃wfʋ sãá a tɩ ɩ-ɩrɩ pʋɔ ɛ́ tu a yel-mɩŋa.
Tɩ mɩ́ bɛr'ɩ dɛ̃bɩ̃ɛ a Naaŋmɩn niŋé
19À ŋá n'a tɩ na bãw kɛ́ tɩ ɩ n yel-mɩŋa nɩbɛ, ɛ́ mɩ́ ɓãá ƴãw bɛr tɩɛrʋ a Naaŋmɩn niŋé. 20Bʋ̃ʋ n'ʋ vɛ̃, a tɩ tɩɛrʋ wa yel kɛ́ tɩ sãw na a, Naaŋmɩn ɩ n kpɛ̃ɛ zuo a tɩ tɩɛrʋ, ʋʋ bãw nɩ bom za. 21Ɩ̃ bá mɩnɛ ɛ, a tɩ tɩɛrʋ bɛ wa yel kɛ́ tɩ sãw na a, tɩ mɩ́ bɛr'ɩ dɛ̃bɩ̃ɛ a Naaŋmɩn niŋé. 22Ɛ́ bom za tɩ na zɛlɛ a, tɩ mɩ́ páw ʋ nɩ a ʋ zie, tɩ na sàwr a ʋ nɛ-ƴãwnɩ ɛ́ ɩrɛ a lɛ na pɛlɩ a ʋ pʋɔ a ƴãw. 23Ɛ́ a nʋɔr ʋ na ƴãw kʋ̀ tɩ a n'ɩ ŋa: kɛ́ tɩ sàw de a ʋ Bie Yeezu Kɩrɩta, ɛ́ nɔnɛ taa mɛ̃ a lɛ a Kɩrɩta na ƴãw a nʋɔr kʋ̀ tɩ a. 24Sob nɛ na sàwr a Naaŋmɩn nɛ-ƴãwnɩ a, ʋ lãw nɩ nɩ a Naaŋmɩn ɛ́ a Naaŋmɩn mɩ̀ lãw nɩ ʋ. À ŋá n'a tɩ bãw k'aa Naaŋmɩn lãw nɩ tɩ na, a Vʋʋrʋ Sõw ʋ na kʋ̀ tɩ a.
Currently Selected:
1 Zã 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
