Orom Sɛbɛ 6
6
A MƖNƐ SƖ NA LÃA KPI NƖ A KIRISI
1Ala-ɩ̃-sɔ, mɩnɛ sɩ na pãa yel? Sɩ́ cãa maala a fãa, a mɩnɛ a Naaŋmɩn yɛ̃-bɔ̃wfʋ na dɔɔlɔ taa a sɩ jie mɩɩ? 2Aa ɩ lɛ ʋ wa. A sɩmɩ na kpi a maal-fãa pʋɔ, mɩnɛ sɩ na lɛ ɩ ɩ̃ cãa maala a ala go? 3A sɩmɩ sɩ jaa ba na mʋr a kʋ̃ɔ a sɩ na ɩ bõ-ƴen nɩ a *Jeeju-Kirisi, nyaa bɔ̃w ka ba mʋr sɩ na, a sɩ na lãa kpi nɩ ʋ a ʋ kũu pʋɔ wa? 4Ala-ɩ̃-sɔ, a mɩnɛ ba na mʋr sɩ a sɩ lãa kpi nɩ ʋ, ba mɩ lãa na ũu sɩ a lɛ. Ɩ̃ a mɩnɛ a Sãa yo-yifʋ nɩ a ʋ kpɛ̃w na maal a *Kirisi ʋ ir a kũu pʋɔ, a sɩmɩ mɩ, sɩ mɩ tɛrɛ na a baafʋ ʋlɔ na ɩ a baa-paalaa.
5A ala ɩ sɩ lɩɛbʼã ɩ nɩ ʋ a bõ-ƴen a kũu pʋɔ a sɩ kʋ̃ɔ mʋrfʋ ɩnɛ, a lɛ sɩ nɔɔ mɩ ɩ nɩ ʋ a bõ-ƴen, mɩ ir a kũu pʋɔ a ʋ kaarɩ̃. 6Nyɩ́ ɩ a sɩ bɔ̃w nɩ a nanɩ: a Kirisi de na a sɩ nɩ-kʋraa a ba kpa nɩ ʋ a nɩ-kʋ-daa juu, a mɩnɛ a sɩ maal-fãa ɩ̃gan kɔ̃ tʋɔ lɛ ɩ a maal-fãa gbãgbaa wa. 7A-na-ɩ a ʋlɔ na kpi pɔw na a faafʋ a maal-fãa ɩnɛ.
8Ɩ̃ a sɩmɩ kpi nɩ a Kirisi, sɩ bɔ̃w na ka sɩ nɔɔ lãa na tɛrɛ nɩ ʋ a baafʋ. 9A-na-ɩ a mɩnɛ a Kirisi na ir a kũu pʋɔ, ꞌwaa lɔɔ kpiire wa; a kũu ma lɛ tɛrɛ fãgã a ʋ jie wa. 10A mɩnɛ ʋ na kpi, a maal-fãa ŋmaa-yifʋ ɩnɛ ʋ kpi a gbɛ-daa, ɩ̃-cɛ a baafʋ ʋlɔ ʋ na tɛrɛ a ƴɛ̃ƴɛrɩ̃ ɩ na a Naaŋmɩn ben. 11A lɛ ʋ, a nyɩmɩ mɩ, nyɩ́ bɔ̃w ka nyɩ sɩrɩ̃ na kpi a maal-fãa ɩnɛ, ɩ̃ mɩ tɛrɛ a baafʋ ʋlɔ na ɩ a Naaŋmɩn ben, a mɩnɛ nyɩ na be a Jeeju-Kirisi pʋɔ.
12Ala-ɩ̃-sɔ, nyɩ taa ɩ a maal-fãa ʋ lɛ tɛrɛ a tʋɔfʋ a nyɩ ɩ̃gan pʋɔ a nyɩ na sɔw maala a ala a nyɩ ɩ̃gan buur na bʋɔrɔ wa. 13Ɩ̃ nyɩ taa mɩ de a nyɩ ɩ̃gan ɓãbie a lɩɛb ɩ gõgolĩfʋ tʋmɔ yele a nyɩ maala nɩ a fãa wa. Ɩ̃-cɛ, a mɩnɛ nyɩ na ɩ a nɩbɛ bala na kpi ɩ̃ lɛ ir a kũu pʋɔ nyɩ́ de a nyɩ mɩ̃ɛ kʋ a Naaŋmɩn, a nyɩ ɩ̃gan ɓãbie mɩ lɩɛb ɩ a tʋ̃-son yele a Naaŋmɩn tʋmɔ pʋɔ. 14A maal-fãa kɔ̃ lɛ ɩ a nyɩ nɩ-kpɛ̃ɛ wa, a-na-ɩ nyaa be a ƴɛr-kpɛn pʋɔ wa, ɩ̃-cɛ a Naaŋmɩn wɩɛfʋ pʋɔ nyɩ be.
A BALA NA Ɩ A NAAŊMƖN GBÃGBAAR
15Mɩnɛ? Sɩ́ maala a fãa a mɩnɛ sɩ na ma be a ƴɛr-kpɛn pʋɔ go wa ɩ̃ be a Naaŋmɩn wɩɛfʋ pʋɔ mɩɩ? Aa ɩ lɛ ʋ wa! 16Nyaa bɔ̃w ka a nyɩmɩ de a nyɩ mɩ̃ɛ ƴɔ̃w a nɩrɛ kãw gbãgba-tʋmɔ pʋɔ, wono nɩ ʋ a toor, nyɩ ɩ na a ʋlɔ nyɩ na wono a toor gbãgbaar wa? A na tʋɔ na ɩ a maal-fãa ʋ, na cere nɩ nyɩ a kũu pʋɔ, mɩɩ a Naaŋmɩn nyɩ na wono a toor, na maala nyɩ a nyɩ toro a ʋ jie. 17Ɩ̃ Naaŋmɩn sɔ puorfʋ, a-na-ɩ a nyɩmɩ na dãa ɩ a maal-fãa gbãgbaar, nyɩ sɔw na de a nyɩ mɩ̃ɛ nɩ a nyɩ suur ʋ jaa ƴɔ̃w a ana maal-bie ba na dãa jaan nyɩ pʋɔ. 18A mɩnɛ nyɩ na faa a nyɩ mɩ̃ɛ a fãa pʋɔ, nyɩ lɩɛbʼã ɩ a son gbãgbaar.
19A nɩbɛ maal-bie ɩ̃ de miile nɩ nyɩ a ƴɛrɩ̃ na, a-na-ɩ a nyɩ ɩ̃gan buur balʼã. A ala ɩ nyɩ dãa na de a nyɩ ɩ̃gan ɓãbie bar a tʋ̃-kpansɩ pʋɔ, maala nɩ a burbur bʋrɔ bʋrɔ, a lɛ ʋ mɩ a ƴɛ̃ƴɛrɩ̃ na, nyɩ́ de a nyɩ ɩ̃gan ɓãbie ƴɔ̃w a ɩ a torfʋ gbãgba-tʋmɔ yele, a nyɩ na tʋɔ ɩ a cɛcɛ a nyɩ maalfʋ pʋɔ.
20A lɛdaar nyɩ na dãa ɩ a maal-fãa gbãgbaar, nyaa dãa be a torfʋ ƴɛr-kpɛ̃w pʋɔ wa. 21Ɩ̃ bõ nyɩ pɔw a ana yele nyɩ na dãa maal pʋɔ, na lɛ lɩɛb ɩ nyɩ a vĩ a dɩnaa? A ba baarfʋ daar ɩ na kũu. 22Ɩ̃-cɛ a ƴɛ̃ƴɛrɩ̃ na, a mɩnɛ nyɩ na fáa a nyɩ mɩ̃ɛ a maal-fãa jie, ɩ̃ lɩɛb ɩ a Naaŋmɩn gbãgbaar, ʋ maala nyɩ na a nyɩ lɩɛbɛ ɩrɛɛ a cɛcɛ, ɩ̃ a baarfʋ daar nyɩ na mɩ pɔw na a baa-kɔ̃-tɛw. 23A-na-ɩ a maal-fãa yar ɩ na a kũu, ɩ̃-cɛ a Naaŋmɩn wɩɛfʋ bom ɩ na a baa-kɔ̃-tɛw ʋlɔ sɩ na pɔw a sɩ Nɩ-kpɛ̃ɛ *Jeeju-Kirisi pʋɔ.
Currently Selected:
Orom Sɛbɛ 6: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
