Orom Sɛbɛ 11
11
A NAAŊMƖN MA JAAR A ƖSƖRAYƐL NƖBƐ BAR WA
1Ala-ɩ̃-sɔ, ɩ̃ sooro na: a Naaŋmɩn jaarʼã a ʋ nɩbɛ bar mɩɩ? Aa tʋɔrɔ ɩrɛ a lɛ wa. A maa mɩ̃ɛ, *Ɩsɩrayɛl nɩrɛ ɩ̃ ɩ. A ɩ̃ sãa-kʋmɔ nɩ a Abʋraham; ɩ̃ ɩ na a Bɛ̃jamɛ bal nɩrɛ. 2A Naaŋmɩn ma jaar a ʋ nɩbɛ bar wa. Ʋ bɔ̃w ba na korĩ-cɛ jaa a ba ɩ a ʋ ben. Má nyɩ bɔ̃w na a ala a Naaŋmɩn Sɛbɛ na yel a Eli ƴɛrɩ̃ pʋɔ, a mɩnɛ ʋ na dãa waala a ala a Ɩsɩrayɛl nɩbɛ na maal a Naaŋmɩn nii-sɔw. 3Ʋ yelʼã: “Nɩ-kpɛ̃ɛ, ba kú na a fʋ ƴɛr-hierbe, wɛlʼɩ̃ a fʋ baar lofʋ jiir bar. Maa ɩ̃ yẽ tɛw ɩ̃ cɛ, a ba mɩ bʋɔrɔ ba kú ma.” 4Ɩ̃ mɩnɛ a Naaŋmɩn dãa kʋ a Eli a sɔwfʋ? Ʋ yel ʋ na: “Ɩ̃ cãa na tɛrɛ nɩbɛ ture anuu-nʼayi na ma gburĩ a dume puor a ba naaŋmɩn na dɩ a Baal wa.” 5A lɛ a mɩ be a ƴɛ̃ƴɛrɩ̃. Nɩbɛ fɩ̃ɩ cãa na be be a Naaŋmɩn na vɛl ir a ʋ su-pɩlaa ɩnɛ. 6Ʋ yɛl ba na ir a yi a ʋ su-pɩlaa jie, ɩ̃ aa yi a ba tʋmɔ ɩnɛ wa. A ala ma ɩ lɛ ʋ wa, a ʋ su-pɩlaa ma tʋɔrɔ ɩrɛ su-pɩlaa wa.
7Ɩ̃ mɩnɛ mɔɔ? A Ɩsɩrayɛl nɩbɛ faa na a ala ba na bʋɔrɔ, ɩ̃-cɛ a bala tɛw a Naaŋmɩn na vɛl ir ɩ̃ pɔw. Ɩ̃ a bala na cɛ, a ba sube kpɛmɛ na. 8A mɩnɛ a na sɛb a Naaŋmɩn Sɛbɛ pʋɔ: “A Naaŋmɩn maal ba na a ba faa a yɛ̃, tɛrɛ a mimie ɩ̃ ma nyɛrɛ wa, ɩ̃ mɩ tɛrɛ a tobo ɩ̃ ma mɩ wono wa, wa ta nɩ a dɩnaa.” 9Ɩ a Davɩtɩ mɩ yelʼã a ʋ sɛbɛ pʋɔ:
“Wɔ̃ taa nɩ a ba fɛtɩsɩ a lɩɛb ɩ cakpo mɩɩ bɛraa,
nyɔɔr ba a ba lo pɔw a kpãafʋ.
10Wɔ̃ taa nɩ a ba mimie a mɩ lɛ jɔ̃w
a baa tʋɔrɔ nyɛrɛ wa.
Wɔ̃ taa nɩ ba mɩ tuoro a toe a daar a jaa
kɔ̃ pɔw pɩɛnfʋ wa.”
11Ɩ̃ lɛ soorʼã go: a Jufisɩ na ŋme a gbɛr lo, daadaa ba faa lo mɩɩ? Aa tʋɔrɔ ɩrɛ a lɛ wa. Ɩ̃-cɛ a ba bɩɛfʋ ɩ̃ saa a faafʋ ta a nɩ-bʋlsɩ jie a mɩnɛ a Jufisɩ na tɛrɛ nɩ ba a nyuur. 12A ala ɩ a Jufisɩ bɩɛfʋ ɩ̃ saa a nɩbɛ ba jaa pɔw a na-yele, ɩ̃ a ba wurfʋ ɩnɛ a na-yele mɩ ta a nɩ-bʋlsɩ, mɩnɛ a na pãa wɔ̃ a lɛdaar ba na lɩɛbɛ ba jaa pɔwrɔ a faafʋ!
A MƖNƐ A NAAŊMƖN NA LƖƐB A NƖ-BƲLSƖ A BA Ɩ A Ʋ BEN
13A ƴɛ̃ƴɛrɩ̃ na, a nyɩmɩ nɩ-bʋlsɩ ɩ̃ bʋrɔ nɩ. A mɩnɛ a Naaŋmɩn na ƴɔ̃w ma ɩ̃ ɩ a *nɩ-tʋnaa a nɩ-bʋlsɩ jie, ɩ̃ cɩlɛ na a ʋna tʋn naa pʋɔ, 14ɩ̃ mɩ maala a bom jaa lɛ bʋɔrɔ nɩ a nyuur a nyɔw a ɩ̃ nɩbɛ, ɩ̃ na tʋɔ faa a nɩŋmɛɛ. 15A ala ɩ a *Ɩsɩrayɛl nɩbɛ lɔb-barfʋ maalʼã a tẽw nɩbɛ nɩ a Naaŋmɩn a ba ɓaalɩ̃ taa, bõ na ta a lɛdaar a Naaŋmɩn na lɔɔ diere ba? A na ɩ na a bala na kpi kũu-pʋɔ-irfʋ! 16A ala ɩ ba de na nĩe ŋmaa a bur-bir ŋmãa kʋ a Naaŋmɩn, a buru ʋ jaa ɩ na a ʋ ben. A ala ɩ a tɩɛ kãw nyɩbɛ ɩ na a Naaŋmɩn ben, a ʋ wulbie mɩ ɩ na a ʋ ben. 17A Ɩsɩrayɛl nɩbɛ wɔ̃ na taa nɩ a olivi tɩɛ ba na sɛl, ɩ̃ cɛ a ʋ wulbie ŋmɛɛr ŋma bar. Ɩ̃ a fʋ̃ʋ na ma ɩ a Jufi nɩrɛ wa, fʋ wɔ̃ na taa nɩ a mɔɔpʋɔ olivi tɩɛ wulbir ba na ŋmaa wa nɩ cow a wulbie ala na cɛ sɔ̃w, a fʋ na mɩ tʋɔ pɔw a sʋmɔ ala na yi a nyɩbɛ pʋɔ ɩ̃ duoro guolo a tɩɛ. 18Ala-ɩ̃-sɔ taa tɩɛr beeka fʋ sa na a wulbie ala ba na ŋma bar wa. A ala ɩ fʋ bʋɔrɔ na fʋ vʋ̃ a fʋ mɩ̃ɛ, a sɛw na fʋ bɔ̃w ka aa ɩ fʋ̃ʋ guolo a nyɩbɛ wa, ɩ̃-cɛ bala ɩ̃ guolo fʋ.
19Fʋ na tʋɔ na yel: “Má a ɩ̃ cowfʋ ɩnɛ ba ŋma a ana wulbie bar!” 20Ɔɔ, a lɛ ʋ. A mɩnɛ ba na ma tɛrɛ a ƴɔ̃w-nyãa wa, a ala ɩnɛ ba ŋma ba bar, ɩ̃-cɛ a-na-ɩ a fʋ̃ʋ, fʋ tɛrɛ na a ƴɔ̃w-nyãa, a ala ɩnɛ fʋ de a ba jie. Ala-ɩ̃-sɔ taa wa bʋɔrɔ a yuor wa, ɩ̃-cɛ bɔ̃w jʋʋrɔ. 21A-na-ɩ a ala ɩ a Naaŋmɩn ma dãa sɔw bar a Jufisɩ na ɩ a tɩɛ mɩ̃ɛ wulbie wa, ʋ kɔ̃ wa mɩ bar fʋ wa. 22Nyɛ a mɩnɛ a Naaŋmɩn na tɛrɛ a yɛ̃-bɔ̃wfʋ nɩ a hierfʋ. Ʋ bierʼã a bala na lo jie, ɩ̃ bɔ̃w a yẽ a fʋ jie, a ala ɩ fʋ cãa na cere a mɩnɛ a ʋ yɛ̃-bɔ̃wfʋ na bʋɔrɔ. A ala ma ɩ lɛ ʋ wa ba na mɩ ŋmaa fʋ na bar, 23ɩ̃ a ala ɩ a Jufisɩ lɩɛbʼã ɩ̃ bar a ba su-kpɛn tɛrɛfʋ, a Naaŋmɩn na lɛ cow ba na ƴɔ̃w a tɩɛ ʋlɔ pʋɔ ba na dãa be. A-na-ɩ a Naaŋmɩn na tʋɔ na lɛ maal a lɛ. 24A fʋ̃ʋ na ma ɩ a Jufi nɩrɛ wa, fʋ ɩ na a mɔɔpʋɔ olivi tɩɛ wulbir, a ba ŋmaa wa nɩ cow ƴɔ̃w a olivi tɩ-sɛlaa pʋɔ fʋ na ma dãa bɔ̃w wa. Ɩ̃-cɛ a Jufisɩ bala, ba ɩ na a tɩ-sɛlaa ʋlɔ mɩ̃ɛ wulbie. Ala-ɩ̃-sɔ a na nyɩrɩ̃ na yɔw a ba na lɛ lɩɛb cow ba ƴɔ̃w a ba mɩ̃ɛ tɩɛ pʋɔ ba na dãa be.
A MƖNƐ A ƖSƖRAYƐL NƖBƐ NA PÃA PƆW A FAAFƲ
25Yɛɛr, maa bʋɔrɔ nyɩ baala a ƴɛr-sɔɔlaa na ɩ̃ na mana nyɩ ɩnɛ wa, a mɩnɛ a nyɩ kɔ̃ɔ de a nyɩ mɩ̃ɛ tɩɛr beeka nɩ-kpaarsɩ nyɩ ɩ wa. A ɩ na a mɩnɛ a *Ɩsɩrayɛl nɩbɛ ŋmɛɛ na lɩɛb kpɛmɛ a sube, ɩ̃-cɛ a ala na cenʼã, wa ta nɩ a lɛdaar a nɩ-bʋrɔ bʋrɔ ba jaa nɔɔ wa kpɛɛrɛ pɔwrɔ a faafʋ. 26Ɩ̃ a nɔhɔ̃ a Ɩsɩrayɛl nɩbɛ ba jaa na pãa pɔw a faafʋ, a mɩnɛ a na sɛb a Naaŋmɩn Sɛbɛ pʋɔ:
“A Fafaara nɔɔ yi na a *Sɩ̃ɔ-tẽw wa,
na ʋ ir a bier maalfʋ a Jakɔb bal nɩbɛ sɔ̃w bar.
27Nyɛ a *pʋlɩ̃-taa ƴɛrɩ̃ ɩ̃ nɔɔ cɔɔrɩ̃ nɩ ba,
a lɛ ɩ̃ nɔɔ ire a ba maal-faar bara.”
28A sɩmɩ ꞌwuor a mɩnɛ a Jufisɩ na jaar a Naaŋmɩn ƴɛr-son bar, ba lɩɛbʼã ɩ a Naaŋmɩn sama-deme a mɩnɛ a nyɩ na pɔw a son. Ɩ̃ a sɩmɩ lɛ ꞌwuor a mɩnɛ a Naaŋmɩn na vɛl ba ir, ba ɩ na a nɩ-nʋnɩsɩ a ba sãa-kʋnbɔ ɩnɛ. 29A-na-ɩ a Naaŋmɩn maa kʋ nɩrɛ bom ɩ̃ lɛ fáa wa. Ʋ maa mɩ lɛ bʋɔl nɩrɛ ɩ̃ lɛ bar ʋ wa. 30A korĩ-cɛ, nyɩ dãa na wõw a toor a Naaŋmɩn jie, ɩ̃-cɛ a ƴɛ̃ƴɛrɩ̃ a Naaŋmɩn nã-bɔ̃wfʋ ta nyɩ na a Jufisɩ to-wõwfʋ ɩnɛ. 31A lɛ ʋ mɩ a Jufisɩ bala, ba wõw na a toor a Naaŋmɩn jie a ƴɛ̃ƴɛrɩ̃ a mɩnɛ a nyɩmɩ na tʋɔ pɔw a Naaŋmɩn nã-bɔ̃wfʋ, ɩ̃-cɛ a na ɩ a mɩnɛ a bala mɩ̃ɛ na mɩ tʋɔ pãa pɔw a ʋna nã-bɔ̃wfʋ naa a ƴɛ̃ƴɛrɩ̃ na. 32A-na-ɩ a Naaŋmɩn pɔw na a nɩbɛ ba jaa a to-wõwfʋ kasu pʋɔ a mɩnɛ ʋ na tʋɔ miil ba ba jaa a ʋ nã-bɔ̃wfʋ.
A NAAŊMƖN FÃW
33Nyɩ́ nyɛ a mɩnɛ a Naaŋmɩn lefʋ na bɛrmɛ! A ʋ kpaarfʋ nɩ a ʋ bɔ̃wfʋ ma tɛrɛ tɛwfʋ wa. Ala na tʋɔ bɔ̃w a ʋ ƴɛrɩ̃ guorfʋ par? Ala na tʋɔ nyɛ a sɔr ʋ na ma de cen? 34A mɩnɛ a Naaŋmɩn Sɛbɛ na yel:
“Ala ɩ̃ dãa bɔ̃w a Nɩ-kpɛ̃ɛ tɩɛrʋ̃?
Ala mɩ dãa ɩ a ʋ yɛ̃-mana?
35Ala ɩ̃ dãa de nĩe kʋ a Naaŋmɩn bom
ʋ na mɩ lɩɛb ya ʋ?”
36A-na-ɩ a ʋ jie a yele a jaa yi, ʋlɔ maal ba jaa, ɩ̃ a ʋlɔ mɩ sɔ ba. Ʋlɔ sɔ a yo-yifʋ a daar a jaa. *Amɛn.
Currently Selected:
Orom Sɛbɛ 11: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
