Kɔlɔsɩ Sɛbɛ 2
2
1Ɩ̃ bʋɔrɔ na nyɩ bɔ̃w a mɩnɛ a jɛb ʋlɔ ɩ̃ na jɛbɛ a nyɩmɩ nɩ a Lawdise nɩbɛ nɩ a bala na ma mɩ nyɛ ma sɛr wa ɩnɛ na kpɛmɛ. 2A ɩ̃ jɛb par ɩ na a ba na tɛrɛ ꞌlafʋ, mɩ tɛrɛ nɩ nɔ-bõ-ƴen nʋnɔ nɩ taa, a mɩnɛ ba na bɔ̃wnɔ a Naaŋmɩn ƴɛrɩ̃ ma tɛrɛɛ baalɩ̃fʋ wa, na ba mɩ nyɩrɩ̃ tɛrɛɛ a yɛ̃ wa bɔ̃wnɔ nɩ a Naaŋmɩn bõ-sɔɔlaa na ɩ a *Kirisi mɩ̃ɛ. 3A ʋ pʋɔ a Naaŋmɩn na-yele na ɩ a kpaarfʋ nɩ a bɔ̃wfʋ a jaa sɔɔlɩ̃.
4Ɩ̃ ƴɛrɛ nɩ nyɩ na a lɛ a mɩnɛ a nyɩ kɔ̃ wa bar nɩrɛ ʋ wa bɛlɛ nyɩ nɩ a ʋ nɔ-kãa ƴɛrɩ̃sɩ wa. 5A mɩnɛ ɩ̃ na saarɩ̃ jãa taa nɩ nyɩ a ɩ̃gan buur pʋɔ ɩ̃-cɛ ɩ̃ cãa na be nɩ nyɩ a sɩɛ pʋɔ, ɩ̃ a nʋmɔ ma na ɩ̃ na wõ a mɩnɛ nyɩ na ɩraa cĩcĩ bɔ̃w nyɔw nɩ taa a ƴɔ̃w-nyãa pʋɔ nyɩ na tɛrɛ nɩ a Kirisi.
A BAAFƲ ƲLƆ SƖ NA PƆW A KIRISI PƲƆ
6Ala-ɩ̃-sɔ, a mɩnɛ nyɩ na sɔw de a *Jeeju-Kirisi ʋ ɩ a Nɩ-kpɛ̃ɛ, nyɩ́ tuure a ʋ gbɛ-pɛlɛ. 7Nyɩ́ bɔ̃w bá ɩraa a ʋ pʋɔ, mɩ de nɩ a nyɩ mɩ̃ɛ dɔɔl a ʋ juu, nʋ̃ɔnɔ nɩ a daar a jaa a ƴɔ̃w-nyãa pʋɔ tuure nɩ a ala ba na dãa jaan nyɩ, mɩ pɛwrɛ nɩ a Naaŋmɩn a daar a jaa.
8Nyɩ́ tɛrɛ nyɩ mɩ̃ɛ a nɩrɛ kɔ̃ wa bɛlɩ̃ nyɩ pɔw nɩ a nɩbɛ yɛ̃ ƴɛrɩ̃sɩ nɩ a bɛlɩ̃fʋ ƴɛrɩ̃sɩ na ma tɛrɛ par wa. A ƴɛrɩ̃sɩ ala ma yi a *Kirisi jie wa, ɩ̃ a yi na a nyɩ sãa-kʋnbɔ jaanfʋ, nɩ a tẽw na pʋɔ sɩ-bʋrɔ bʋrɔ pʋɔ. 9A-na-ɩ a Naaŋmɩn mɩ̃ɛ ʋ jaa be na a Kirisi ɩ̃gan pʋɔ, 10ɩ̃ a nyɩmɩ, nyɩ pɔw na a yele a jaa a sɛw nyɩ, a mɩnɛ nyɩ na be a Kirisi pʋɔ na ɩ a kpɛ̃ɛ gãw a sɩ-bʋrɔ bʋrɔ tʋɔfʋ nɩ a ba fãgã ʋ jaa.
11A ʋ jie mɩ, nyɩ mɩ pɔw na a yʋɔr ŋmaafʋ ʋlɔ na ma yi nɩrɛ jie wa, ɩ̃ a yi na a Kirisi jie, na ɩ a ʋ faafʋ ʋ na faa nyɩ a nyɩ nɩrɛ wãa ɩfʋ pʋɔ. 12A mɩnɛ ba na mʋr nyɩ á kʋ̃ɔ, ba lãa na ũu nɩ nyɩ a Kirisi, ɩ̃ a nyɩ mɩ lãa irʼɩ̃ ʋ a kũu pʋɔ a-na-ɩ nyɩ sɔw na áa Naaŋmɩn tɛrɛ na fãgã maalʼɩ̃ ʋ ʋ ir a kũu pʋɔ. 13Nyɩ dãa na ɩ a kũusɩ a nyɩ maal-bebe ɩnɛ, nɩ a mɩnɛ nyɩ na ɩ a nɩ-bʋlsɩ bala ba na ma dãa ŋmaa a yʋɔr wa, ɩ̃ a Naaŋmɩn maal nyɩ na a nyɩ lãa irʼɩ̃ a Kirisi a kũu pʋɔ, ɩ̃ ʋ mɩ de a sɩ maal-bebe a jaa bar kʋ sɩ. 14Ʋ de na a sɛbɛ ʋlɔ na miile a sɩ bɩɛfʋ jie na dãa ƴɔnɔ sɩ a ƴɛrɩ̃sɩ nɩ a ƴɛr-kpɛn kpa a nɩ-kʋ-daa juu. 15A nɔhɔ̃ ʋ sãw a sɩ-bʋrɔ bʋrɔ tʋɔfʋ nɩ a ba fãgã bar. Ʋ yi nɩ ba na cãa pʋɔ, a nɩbɛ nyɛ ba a ba ɩ a gbãgbaar bala a Kirisi na tʋɔ.
16Ala-ɩ̃-sɔ, nyɩ taa ɩ nɩrɛ ʋ wa ƴɔnɔ nyɩ ƴɛrɩ̃ a ala nyɩ na dɩrɛ nɩ a ala nyɩ na nyuure wa, mɩɩ a ala nyɩ na sɛw nyɩ maala a fɛtɩ bibir nɩ a cuu paalaa yifʋ dayen, mɩɩ a bibi-ciirsɩ bibie jɔfʋ wa. 17A ala a jaa ɩ na a yele ala na dãa sɛw a ɩ dãadiile, ɩ̃ a tɔr jaa ɩ a Kirisi. 18Nɩŋmɛɛ be na be na nʋ a ba mɩ̃ɛ lɔb-barfʋ. A ŋmɛɛ mɩ ma puoro a sɩ-tʋnɩsɩ, ma mɩ cɛ̃pɛrɛ a sɩɛ yele ala ba na ma nyɛ. A maal-bi-lɛ ɩ na yo-bɔb na yi a ɩ̃gan buur tɩɛrɩ̃sɩ pʋɔ na ma tɛrɛ par wa. Nyɩ taa wa sɔwrɔ a nɩ-lɛ nʋmɔ ƴɛrɩ̃sɩ ba na ƴɛrɛ ƴɔnɔ nyɩ wa. 19A nɩbɛ bala ŋmaa na kpee nɩ a Kirisi na ɩ a juu. A ʋ pʋɔ, a ɩ̃gan ʋ jaa pɔwrɔ a fãgã, tɛrɛ nɩ a jile nɩ a cow-taa jiir bɔ̃w cow nɩ taa, mɩ karɛɛ nɩ a mɩnɛ a Naaŋmɩn na bʋɔrɔ.
A MƖNƐ SƖ NA LÃA KPI Ɩ̃ MƖ IRʼƖ̃ A KIRISI A KŨU PƲƆ
20Nyɩ lãa na kpi nɩ a *Kirisi ŋmaa yi a tẽw na pʋɔ sɩ-bʋrɔ bʋrɔ pʋɔ. Ɩ̃ bõ ɩnɛ nyɩ ma maala wɔ̃ taa nɩ a tẽw na nɩbɛ nyɩ cãa ɩ? A-na-ɩ nyɩ ma cãa na sɔw a ba ƴɔnɔ nyɩ a ba ƴɛr-kpɛn a nɔhɔ̃: 21“A fʋ taa wa diere a nanɩ wa,” “A fʋ taa wa ꞌlɛmɛ kãana wa,” “A fʋ taa wa sɩɩrɛ wa.” 22A ana yele a jaa ma baarʼã a lɛdaar ba na ma dɩ ba baar. A ɩ na a nɩbɛ ƴɛr-kpɛn nɩ a ba jaanfʋ. 23A wɔ̃ na taa nɩ a kpaarfʋ sɩrɩ̃ na be tɔ a ana yele jɔfʋ pʋɔ a mɩnɛ ba na tɛrɛ a puorfʋ na yi a ba mɩ̃ɛ jie ɩ̃ mɩ tɛrɛ a ba mɩ̃ɛ lɔb-barfʋ nɩ a ba mɩ̃ɛ kpowfʋ, ɩ̃-cɛ aa ɩ bom, na tʋɔ sũo ba a ba mɩ̃ɛ tɛrɛfʋ pʋɔ fɩ̃ɩ wa.
Currently Selected:
Kɔlɔsɩ Sɛbɛ 2: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
