Nɩ-tʋnɩsɩ tʋmɔ Sɛbɛ 22
22
A POL NA ƳƐR A ƳƐRƖ̃ A JUFISƖ NII-SƆW
1“Ɩ̃ yɛɛr nɩ ɩ̃ sãa nunɔ! Nyɩ́ cɛlɛ a ɩ̃ yel-mɩ̃ɛ ɩ̃ na miile nyɩ a ƴɛ̃ƴɛrɩ̃ na.”
2Ɩ̃ a mɩnɛ ba na wõ a Pol ʋ ƴɛrɛ nɩ ba a Eburo ƴɛrɩ̃, ba lɛ nyɩrɩ̃ na sine cɩcɩ. 3Ʋ yel ba:
“Ɩ̃ ɩ na Jufi nɩrɛ ba na dɔw a Tarsɩ a Sɩlɩsɩ wɩɛr, ɩ̃-cɛ a ka a Jerujalɛm ba dãa guol ma. A Gamalɩɛl ɩ̃ dãa ɩ a ɩ̃ jãjaana na v miil ma a sɩ sãa-kʋnbɔ ƴɛr-kpɛn ɩ̃ bɔ̃w vɩlaa. A mɩnɛ a nyɩ jaa na ɓĩɓine a Naaŋmɩn ɩnɛ a ƴɛ̃ƴɛrɩ̃, a maa mɩ, lɛ ɩ̃ mɩ dãa be. 4Ɩ̃ dãa na nyɩrɩ̃ hʋɔlɔ a bala na de a Nɩ-kpɛ̃ɛ sɔr, kúrɔ nɩ a ŋmɛɛ. Ɩ̃ ma nyɔɔrʼã a dabsɩ nɩ a pɔɔbɔ lũ nɩ a bɔ̃jɔrɩ̃sɩ ƴɔ̃w a kasu pʋɔ. 5A *baar-lo-nɩ-kpɛ̃ɛ nɩ a ni-dierbe ba jaa na tʋɔ na yel a yel-mɩ̃ɛ ɩ̃ yel. A ba jie ɩ̃ dãa pɔw a sɛbsɩ bʋɔrɔ ɩ̃ cenʼɩ̃ na kʋ a sɩmɩ Jufisɩ yɛɛr na be a Damasɩ, a mɩnɛ ɩ̃ na tʋɔ nyɔɔr a bala na be a be na de a Nɩ-kpɛ̃ɛ sɔr, lũ nɩ a bɔ̃jɔrɩ̃sɩ wa nɩ a Jerujalɛm a ba kpãa ba.
A POL NA MANA A Ʋ YƐ̃ LƖƐBFƲ
6“Ɩ̃ be na a sɔr pʋɔ cere na ɩ̃ pɩɛlɛ a Damasɩ, ɩ̃ a mɔtɔ̃-tuo daar, a cãa kpɛ̃ɛ yi na a saꞌlon a jie naan ɩ̃ wa pɔw ma, 7ɩ̃ lo a tene ɩ̃ wõ a kɔkɩr na yele ma: ‘Sol, Sol, bõ ɩ̃ ɩ a fʋ hʋɔlɔ ma a lɛ?’ 8Ɩ̃ soor ʋ: ‘Nɩ-kpɛ̃ɛ, ala fʋ ɩ?’ Ʋ yel ma: ‘Ɩ̃ ɩ na a Najarɛtɩ *Jeeju fʋ na hʋɔlɔ.’ 9A bala ɩ̃ na lãa be nɩ, ba nyɛ na a cãa ɩ̃-cɛ baa wõ a ʋlɔ na ƴɛrɛ nɩ ma kɔkɩr wa. 10Ɩ̃ lɛ soor ʋ na: ‘Nɩ-kpɛ̃ɛ! Bõ ɩ̃ sɛw ɩ̃ maal?’ A Nɩ-kpɛ̃ɛ yel ma: ‘Ir cen a Damasɩ. A be, ba na miil fʋ na a ala a jaa a Naaŋmɩn na ƴɔ̃w fʋ a fʋ na maal.’ 11Ɩ̃ a mɩnɛ a cãa ʋlɔ na caarɩ̃ pɔw ma a maa lɛ nyɛrɛ wa, a bala na lãa be nɩ ma nyɔw ma na a nuu taw cenʼɩ̃ na kpɛ nɩ a Damasɩ.
12“Daba be na be ba na bʋɔlɔ a Ananɩya. Ʋ puoro na a Naaŋmɩn ɩ̃ mɩ jɔrɔ a ʋ ƴɛr-kpɛn, a Jufisɩ ba jaa na be a Damasɩ mɩ ƴɔnɔ ʋ na. 13Ʋ wa na a ɩ̃ sɛ̃ na ɩraa a ɩ̃ lõboorɩ̃ ɩ̃ yel ma: ‘Ɩ̃ yɛbɛ Sol, a fʋ mimie a lɛ yuo!’ A jie naan, a mimie lɛ yuo na ɩ̃ nyɛ ʋ. 14Ʋ yel ma: ‘A sɩ sãa-kʋnbɔ Naaŋmɩn de na nĩe vɛl fʋ ir a fʋ na bɔ̃w a ʋ pʋ-tɩɛrɩ̃sɩ, ɩ̃ nyɛ a ʋlɔ na ɩ a Yel-mɩ̃ɛ Sʋbɔ, ɩ̃ wõ a ʋ kɔkɩr. 15A-na-ɩ fʋ sɛw na na ƴɛrɛ a ʋ ƴɛrɩ̃ kʋrɔ a nɩbɛ ba jaa miile nɩ ba a ala fʋ na nyɛ ɩ̃ wõ. 16Ɩ̃ a ƴɛ̃ƴɛrɩ̃ na, bõ ɩ̃ ɩ a fʋ cãa jɛ? Ir a ba mʋr fʋ a kʋ̃ɔ, a fʋ bʋɔlɔ a Nɩ-kpɛ̃ɛ yuor, ʋ pɛw a fʋ maal-faar bar.’
A POL NA MANA A MƖNƐ A NAAŊMƖN NA TƲ̃ Ʋ A NƖ-BƲLSƖ JIE
17-18“Ɩ̃ lɛ lɩɛbʼã cen a Jerujalɛm, ɩ̃ a mɩnɛ ɩ̃ na be a Naaŋmɩn puor-yir kpɛ̃ɛ pʋɔ puoro, a Nɩ-kpɛ̃ɛ nyɩr ma na ɩ̃ yel ma: ‘Ir pɔw yi fɔfɔw a Jerujalɛm a-na-ɩ baa sɔwrɔ a ala fʋ na ƴɛrɛ a ɩ̃ ɩnɛ wa.’ 19Ɩ̃ ɩ̃ yelʼã: ‘Nɩ-kpɛ̃ɛ, ba bɔ̃w na vɩlaa a mɩnɛ ɩ̃ na dãa yʋɔrɔ a ba *puorfʋ yie nyɔwrɔ a bala na sɔw de fʋ ƴɔnɔ a kasu pʋɔ, a ba fɔbɔ ba. 20A daar ʋlɔ ba na dãa kúrɔ a Ɩtɩɛn na mana a nɩbɛ a fʋ yel-mɩ̃ɛ, a maa mɩ̃ɛ mɩ dãa na be be ɩ̃ mɩ sɔw a ba kú ʋ, ɩ̃ gu a bala na kúrɔ ʋ cẽcene.’ 21Ɩ̃-cɛ a Nɩ-kpɛ̃ɛ yel ma na: ‘Cen, a-na-ɩ ɩ̃ tʋ̃ fʋ na a fʋ na cen a nɩdaa a nɩ-bʋlsɩ jie.’ ”
A POL NƖ A SƆDAALSƖ NƖ-KPƐ̃Ɛ
22A nɩbɛ cɛlʼã a Pol wa ta nɩ a ʋna ƴɛr-bir ʋ na ƴɛr. Ɩ̃-cɛ a mɩnɛ ba na wõ a ʋna ƴɛrɩ̃, ba nyɩrɩ̃ na ƴɛrɛ nɔ-kpɛn yele:
“Ɩ a daba na ʋ bɔr ka a tẽw pʋɔ! Aa sɛw ʋ na cãa tɛrɛ mimir wa!” 23A mɩnɛ ba na cãa ƴɛrɛ a nɔ-kpɛn, ɓere nɩ a ba cẽcene#22.23 Cẽcen ɓerfʋ: Nyɩ́ ꞌwuor Mar 14.63, ꞌwɔ̃wnɔ nɩ a tãbuulĩ lɔbɔ bara a saꞌlon, 24a sɔdaalsɩ nɩ-kpɛ̃ɛ ɩ na a ba taw a Pol kpɛ nɩ a sɔdaalsɩ yir. Ʋ ƴɔ̃w na á ba fɔb ʋ ʋ miil ba a ba bɔ̃w a bom na ɩnɛ a nɩ-yaw na nyɩrɩ̃ ƴɛrɛ a nɔ-kpɛn a lɛ ƴɔnɔ ʋ. 25Ɩ̃-cɛ a lɛ ba na lũ a Pol a fɔbfʋ ɩnɛ, ʋ yelʼã a sɔdaal-nɩ-kpɛ̃ɛ na ɩraa a be:
“Nyɩ tɛrɛ na sɔr na fɔb a Orom nɩrɛ a pɔrɔ, ɩ̃-cɛ a baa guor a ʋ ƴɛrɩ̃ wa mɩɩ?” 26A mɩnɛ a sɔdaal-nɩ-kpɛ̃ɛ na wõ a ʋna ƴɛrɩ̃, ʋ cenʼã na yel a ʋ nɩ-kpɛ̃ɛ:
“Mɩnɛ fʋ na ɩ? A-na-ɩ a daba na ɩ na a Orom nɩrɛ.” 27A sɔdaalsɩ nɩ-kpɛ̃ɛ cen a Pol sɛ̃ na soor ʋ:
“A fʋ̃ʋ! A Orom nɩrɛ fʋ ɩ mɩɩ?”
A Pol sɔw. 28A sɔdaalsɩ nɩ-kpɛ̃ɛ yel ʋ:
“A maa, libi-yaw ɩ̃ ir a ba lɩɛbʼɩ̃ ma ɩ̃ ɩ a Orom nɩrɛ.”
Ɩ̃-cɛ a Pol yel ʋ:
“A maa ʋlɔ, a lɛ ba dɔw ma.” 29A jie naan, a bala na dãa bʋɔrɔ ba fɔb ʋ bar ʋ na. A sɔdaalsɩ nɩ-kpɛ̃ɛ mɩ, dãbɩ̃ɛ nyɔw ʋ na a mɩnɛ ʋ na nyɛ bɔ̃w ka a Pol ɩ na a Orom nɩrɛ, ɩ̃-cɛ ʋ dãa ɩ a ba lũ ʋ.
A POL NA ƖRAA A JUFISƖ NI-DIERBE NII-SƆW
30A dɩvɩɛ bio, a mɩnɛ a sɔdaalsɩ nɩ-kpɛ̃ɛ na buɔrɔ ʋ bɔ̃w bɔ̃w a bom na ɩnɛ a Jufisɩ na ƴɔnɔ a Pol a ƴɛrɩ̃sɩ, ʋ ɩ na a ba ꞌlor ʋ bar, ɩ̃ tũ yel a *baar-lo-nɩ-bɛrɛ nɩ a Jufisɩ *ƴɛr-guor-nɩ-bɛrɛ ba jaa a ba duo, ɩ̃-cɛ ʋ pãa taw a Pol suu cenʼɩ̃ a ba nii-sɔw.
Currently Selected:
Nɩ-tʋnɩsɩ tʋmɔ Sɛbɛ 22: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
