Nɩ-tʋnɩsɩ tʋmɔ Sɛbɛ 18
18
A POL A KƆRƐ̃TƖ-TẼW
1A ala ɩ̃ baar, a Pol yi na a Atɛn, ɩ̃ cen a Kɔrɛ̃tɩ. 2A be, ʋ tuorʼɩ̃ na a Jufi nɩrɛ na dɩ a Akɩlasɩ na ɩ a Pɔ̃-tẽw nɩrɛ. A Ɩtalɩ ʋ yi ɩ̃ cãa wa ta a jie naan nɩ a ʋ pɔw Pɩrɩsɩl, a-na-ɩ a jamana Kilodi yelʼã a Jufisɩ ba jaa, a ba yi a Orom-tẽw. A Pol cenʼã na nyɛ ba, 3ɩ̃ jɛ be a ba jie a ba lãa tʋnɔ a tʋn, a-na-ɩ tʋ̃-bõ-ƴen ba lãa tɛrɛ na ɩ a gana tʋmɔ. 4A bibi-ciirsɩ a jaa, a Pol ma kpɛ na a *puorfʋ yir ƴɛrɛ a ƴɛrɩ̃sɩ bʋɔrɔ ʋ lɩɛbʼɩ̃ a Jufisɩ nɩ a Gɩrɛkɩsɩ tɩɛrɩ̃sɩ.
5Ɩ̃ a lɛ a Sɩlasɩ nɩ a Timote na yi a Masɛdɔn ɩ̃ wɩ ta, a Pol de na a ʋ mɩ̃ɛ tɔr jaa bar ƴɔ̃w a Naaŋmɩn ƴɛrɩ̃ pʋɔ, yele a Jufisɩ áa *Jeeju ɩ̃ ɩ a *Kirisi. 6Ɩ̃-cɛ a mɩnɛ a Jufisɩ na var a Pol ɩ̃ kpɛrɛ ʋ, ʋ pĩ na a ʋ cẽcen ƴɔ̃w ba ɩ̃ yel ba:
“A nyɩmɩ bɔr, nyɩ jie a yi. Aa lɛ ɩ ɩ̃ ƴɛrɩ̃ ʋ wa. Wa nyɔw nɩ a ƴɛ̃ƴɛrɩ̃, ɩ̃ cere na a nɩ-bʋlsɩ jie.”
7Ʋ yi na a be cen a popuoro kãw sɛ̃ na dɩ a Titiw Jusitisi, a ʋ yir na be a puorfʋ yir lõboorɩ̃. 8A Kirisipi na ɩ a ʋna puorfʋ yir ni-diere nɩ a ʋ yir deme ba jaa sɔw na de a Nɩ-kpɛ̃ɛ. Ɩ̃ a
Kɔrɛ̃tɩ nɩbɛ yaw jie na wõ a Pol ƴɛrɩ̃, mɩ sɔw na ɩ̃ ɩ a ba mʋr ba a pʋɔ.
9A tɩsɔw kãw, a Pol nyɛ na sɩɛ bom, ɩ̃ a Nɩ-kpɛ̃ɛ yel ʋ:
“Taa jɔrɔ dãbɩ̃ɛ wa. Ɩ̃-cɛ, ƴɛrɛ. Taa wa sine wa. 10A-na-ɩ ɩ̃ be nɩ fʋ na. Nɩrɛ ma tʋɔrɔ nyɔwrɔ fʋ maala fãa wa, a-na-ɩ a bala na ɩ a ɩ̃ nɩbɛ a ka a tẽw na pʋɔ, ba waa na.” 11A Pol jɛ na be a Kɔrɛ̃tɩ maal yõ-bõ-ƴen nɩ bõ-ŋmãa, jaana a nɩbɛ a Naaŋmɩn ƴɛrɩ̃.
12A ʋna daarʼãa a Orom fãgã deme na ƴɔ̃w a Galɩ̃yɔ ʋ ꞌwuoro a Akayi wɩɛr, a Jufisɩ guorʼã taa ɩ̃ nyɔw a Pol cen nɩ a ƴɛrɩ̃ guorfʋ jie, 13ɩ̃ yel:
“A daba na bʋɔrɔ na ʋ lɩɛb a nɩbɛ tɩɛrɩ̃sɩ a ba puoro a Naaŋmɩn a na be kpee nɩ a ala a ʋ ƴɛr-kpɛn na yele.”
14A Pol dãa na bʋɔrɔ ʋ ƴɛr ƴɛrɩ̃, ɩ̃-cɛ a Galɩ̃yɔ yel a Jufisɩ:
“A ala ɩ̃ dãa ɩ maal-fãa ɩnɛ ʋ, mɩɩ tʋ̃-bier ɩnɛ ʋ, ɩ̃ naa sɔw na cɛl a nyɩ ƴɛrɩ̃, Jufisɩ. 15Ɩ̃-cɛ a-na-ɩ a ƴɛrɩ̃sɩ, nɩ a yoe nɩ a nyɩ mɩ̃ɛ ƴɛr-kpɛn nyɩ cɩɩrɛ nɩ taa, a nyɩ ƴɛrɩ̃ a ɩ. Maa bʋɔrɔ ɩ̃ ɩ a ana yele ƴɛr-guoro wa.” 16Ɩ̃ ʋ diw ba na bar a be a ƴɛrɩ̃ guorfʋ jie. 17A ba jaa nyɔw na a Sɔsɩten na ɩ a puorfʋ yir ni-diere ɩ̃ fɔb ʋ a be a ƴɛrɩ̃ guorfʋ jie nʋɔr, ɩ̃-cɛ aa dãa ba a Galɩ̃yɔ wa.
A POL NA LƖƐB CEN A ÃTƖYƆSƖ
18A Pol jɛ na a Kɔrɛ̃tɩ kam, ɩ̃ pãa yi a be a yɛɛr sɛ̃ ɩ̃ kpɛ a gbor cen a Sɩrɩ, ʋlɔ nɩ a Pɩrɩsɩl nɩ a Akɩlasɩ. Á lɛ ba na cãa bʋɔrɔ a cenfʋ, ʋ ɩ na a ba pũo ʋ a juu a Sãkire-tẽw, a-na-ɩ ʋ dãa na ƴɛr nʋɔr a Naaŋmɩn jie. 19Ba ta na a Ɛfɛɛsɩ a Pol bar ba a be. Ʋ cenʼã a *puorfʋ yir a ba mana taa nɩ a Jufisɩ. 20Ba sʋɔrɔ ʋ na a ʋ jɛ a ba sɛ̃ ɩ̃-cɛ ꞌwaa dãa sɔw wa. 21Ɩ̃ a lɛ ʋ na yire a ba sɔ̃w, ʋ yel ba na:
“A Naaŋmɩn wa sɔw, ɩ̃ na lɛ lɩɛbʼã wa a nyɩ sɛ̃.”
Ɩ̃ na ʋ yi a Ɛfɛɛsɩ-tẽw, ɩ̃ kpɛ a gbor pʋɔ cen. 22A lɛ ʋ na ta a Sejare, ʋ yi na cen a Jerujalɛm, na puor a *duo-puorbo a be, ɩ̃ pãa cen a Ãtɩyɔsɩ. 23Ʋ jɛ na a be fɩ̃ɩ, ɩ̃ lɛ lɩɛb Cen na cʋbɔ a Galatɩ nɩ a Fɩrɩjɩ ten bõ-ƴene-ƴene sũono a *par-tuurbe ba jaa a ba nyɩrɛ cere a nii-sɔw.
A APOLOSI ƳƐRƖ̃
24A Jufi nɩrɛ na dɩ a Apolosi na yi a Alɛsãdiri dãa na wɩ a ɛfɛɛsɩ. A ʋ nʋɔr ƴɛrɩ̃sɩ nʋmɔ na a nɩbɛ, ɩ̃ ʋ mɩ nyɩrɩ̃ bɔ̃w a Naaŋmɩn Sɛbɛ vɩlaa. 25Ʋ dãa na jaan a Nɩ-kpɛ̃ɛ sɔr defʋ. Ʋ ɓĩɓine na ƴɛrɛ nɩ cɛcɛ mana nɩ a ala na tor a *Jeeju. Ɩ̃-cɛ a Jã-Batii kʋ̃ɔ mʋrfʋ tɛw ʋ dãa bɔ̃w. 26A daba ʋlɔ nyɔw na a ƴɛrɩ̃sɩ ɩ̃ ƴɛrɛ nɩ ꞌlafʋ a *puorfʋ yir. A lɛ a Pɩrɩsɩl nɩ a Akɩlasɩ na wõ ʋ ƴɛrɛ, ba tɛrɛ ʋ na kulʼɩ̃ na ba bɔ̃w miil ʋ a Naaŋmɩn sɔr.
27A ɩ na fɩ̃ɩ, a Apolosi bʋɔrɔ ʋ cen a Akayi, a yɛɛr ƴɔ̃w ʋ a sɔr vɩlaa, ɩ̃ sɛb sɛbɛ tɩɩr kʋ a popuorbo a ʋna tẽw naa pʋɔ, á ba de ʋ vɩlaa. A mɩnɛ ʋ na ta a be, ʋ nyɩrɩ̃ na sũo a bala a Naaŋmɩn maal-vɩlaa na saa a ba sɔw de a Jeeju. 28A-na-ɩ a ʋ ƴɛrɩ̃sɩ ʋ na mana, a nyɩrɩ̃ na tɛrɛ kpɛ̃w, ala-ɩ̃-sɔ ʋ gãw a Jufisɩ a nɩbɛ nii-sɔw. A Naaŋmɩn Sɛbɛ ƴɛrɩ̃sɩ ʋ de miile nɩ ba áa Jeeju ɩ̃ ɩ a *Kirisi.
Currently Selected:
Nɩ-tʋnɩsɩ tʋmɔ Sɛbɛ 18: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
