Nɩ-tʋnɩsɩ tʋmɔ Sɛbɛ 13

A BANABASƖ NƖ A SOL BA NA IR ƳƆ̃W A NAAŊMƖN TƲMƆ PƲƆ

1A Naaŋmɩn pʋ-tɩɛrʋ̃-bʋʋrbɔ nɩ a jãjaanba dãa na be a Ãtɩyɔsɩ *duo-puorbo pʋɔ: a Banabasɩ nɩ a Sɩmẽw ba na mɩ bʋɔlɔ a Nɩsaa-salaa, nɩ a Lusiisi na yi a Sɩɩrɛn-tẽw, nɩ a Manahɛ̃ ba na, lãa guolʼɩ̃ a jamana *Ɛrɔdɩ, nɩ a Sol. 2A bibir kãw, ba duo na taa a Nɩ-kpɛ̃ɛ puorfʋ ɩ̃ lũ a nʋɔr, a Naaŋmɩn Sɩɛ yel ba:

“Nyɩ́ ir a Banabasɩ nɩ a Sol biin ma kpee a tʋn ʋlɔ ɩnɛ ɩ̃ na bʋɔl ba.” 3Ɩ̃ a mɩnɛ ba na lũ a nʋɔr ɩ̃ sʋɔrɔ a Naaŋmɩn, ba dɔɔl ba na a nur#13.3 A nuu dɔɔlfʋ miilʼã a duo-puorbo ba jaa bõ-yen ɩfʋ nɩ a bala ba na suɔrɔ yɔnɔ., ɩ̃ bar ba a ba cen.

A BANABASƖ NƖ A SOL CENFƲ A SƖPƖR-TẼW

4A mɩnɛ a Naaŋmɩn Sɩɛ na tʋ̃ a Banabasɩ nɩ a Sol, ba cenʼã a Selesi na kpɛ a gbor a be cere a Sɩpɩr. 5Ɩ̃ a lɛ ba na ta a Salamɩn, ba nyɔw na a Naaŋmɩn ƴɛrɩ̃ ɩ̃ ƴɛrɛ a *puorfʋ yie pʋɔ. A Jã Markɩ mɩ be na be sũono ba.

6Ba cʋbɔ na a Sɩpɩr-tẽw tɔlɔ na ta a Pafɔsɩ. A be, ba tuorʼɩ̃ na tɩsɔw nɩrɛ ba na bʋɔlɔ a Bar-Jeeju na ɩ a Jufi nɩrɛ na yel á Naaŋmɩn ƴɛr-hiere ʋ ɩ. 7Ʋ be na a Sɩpɩr tẽ-ꞌwuoro sɛ̃ na dɩ a Sɛrsɩ Polisi na ɩ yɛ̃ sʋbɔ. A tẽ-ꞌwuoro ʋlɔ bʋɔlʼã a Banabasɩ nɩ a Sol a-na-ɩ ʋ bʋɔrɔ na ʋ wõ a Naaŋmɩn ƴɛrɩ̃, 8ɩ̃-cɛ a tɩsɔw nɩrɛ ʋlɔ a Gɩrɛkɩ nɩbɛ na lɩɛb bʋɔlɔ a Elimasɩ bʋɔrɔ na ʋ var ba a sɔr ɩ̃ mɩ lɩɛb a tẽ-ꞌwuoro tɩɛrʋ̃ ʋ kɔ̃ sɔw a puorfʋ ƴɛrɩ̃ wa. 9Ɩ̃ a Sol ba na mɩ bʋɔlɔ a Pol sɛw nɩ na a Naaŋmɩn Sɩɛ ɩ̃ ꞌwuor ʋ kir-kir-kir 10ɩ̃ yel:

“Fʋna Satã bie naa! A fʋ pʋɔ sɛw nɩ na a bɛlɩ̃fʋ nɩ a yel-faar, ɩ̃ fʋ ꞌlaarʼã a yel-sono a jaa. Fʋ maa bar a fʋ jiri fʋ na bʋɔrɔ fʋ sãw nɩ a Nɩ-kpɛ̃ɛ tʋ̃-dẽdẽsɩ wa! 11A ƴɛ̃ƴɛrɩ̃ na, cɛlɛ! A Nɩ-kpɛ̃ɛ na ŋme fʋ na a fʋ jɔ̃w, ma lɔɔ nyɛrɛ a mɔtɔ̃w cãa wa tara nɩ a daar kãw wa.”

A jie naan, a Elimasɩ mimie dé na, ʋ nyɛ a wɩɛr wɔ̃ taa nɩ tɩsɔw, ʋ bẽbene yʋɔrɔ bʋɔrɔ nɩrɛ ʋ na nyɔw ʋ a nuu tawra cere nɩ. 12A mɩnɛ a tẽ-ꞌwuoro na nyɛ a lɛ, ʋ sɔw na de a Jeeju, ɩ̃ a nʋɔr ko ʋ a Nɩ-kpɛ̃ɛ ƴɛrɩ̃ ʋ na wõ ɩnɛ.

A POL NƖ A BANABASƖ A PISIDI WƖƐR

13A Pol nɩ a ʋ lãa-yʋɔrbɔ kpɛ na a gbor kpɛ̃ɛ pʋɔ be a Pafɔsɩ gãw cen a Pɛrjɩ na be a Pãfɩlɩ wɩɛr, a Jã Markɩ bar ba a be ɩ̃ lɩɛb cen a Jerujalɛm. 14Ɩ̃ a bala, ba yi na a Pɛrjɩ, ɩ̃ cen na ta a Ãtɩyɔsɩ na be a Pisidi wɩɛr. A *bibi-ciiraa ta na a ba kpɛ na jɛ a *puorfʋ yir pʋɔ. 15Ɩ̃ a mine ba na ꞌwuor a *Naaŋmɩn ƴɛr-kpɛn sɛbɛ nɩ a ƴɛr-hierbe sɛbɛ baar, a puorfʋ yir ni-dierbe ɩ na a ba yel a Pol nʋmɔ:

“Yɛɛr, a nyɩmɩ tɛrɛ a ƴɛrɩ̃ sũono nɩ sɩ, nyɩ́ man sɩ a ƴɛ̃ƴɛrɩ̃ na.”

16A Pol irʼã tur a nuu ɩ̃ yel ba:

“*Ɩsɩrayɛl nɩbɛ nɩ a nyɩmɩ na mɩ be a ka puoro a Naaŋmɩn, nyɩ cɛlɛ! 17A sɩmɩ Ɩsɩrayɛl nɩbɛ Naaŋmɩn vɛlʼã ir a sɩ sãa-kʋnbɔ, ɩ̃ maal ba a ba paal a lɛdaar ba na cãa ɩ a sáanba a Ejibti-tẽw. Ɩ̃ a ʋ fãw ʋ maalʼɩ̃ ba a ba yi a be, 18ɩ̃ ʋ bɔ̃w na tɛrɛ ba a wɛkar pʋɔ wa tara nɩ yomo lɩjaayi. 19Ʋ wɛlʼã bal-bʋrɔ bʋrɔ anuu-nʼayi bar a Kanãa-tẽw ɩ̃ faa a ba wɩɛr kʋ a Ɩsɩrayɛl nɩbɛ a ba tɛrɛ. 20A na ta na yomo kɔɔr anaan dɔɔl lɩjaayi nɩ pie.

“A ala ɩ̃ baar, ʋ kʋ ba na a tɔtɔɔrbɔ wa ta nɩ a Naaŋmɩn ƴɛr-hiere Samɩɛl daar. 21A ala na yi tɔ, ba lɛ sʋɔrʼã a Naaŋmɩn a ʋ kʋ ba jamana, ʋ kʋ ba a Sayul na ɩ a Kɩsɩ bi-daba na ɩ a Bɛ̃jamɛ bal nɩrɛ, ʋ ɩ a jamana maal yomo lɩjaayi. 22Ɩ̃ a mɩnɛ a Naaŋmɩn na ir a Sayul bar, ʋ kʋ ba na a Davɩtɩ ʋ ɩ a ba jamana. A ʋlɔ ɩnɛ a Naaŋmɩn dãa yel: ‘Ɩ̃ nyɛ na a Jɛsɩ bi-daba Davɩtɩ ʋ ɩ a nɩrɛ ʋlɔ a ʋ ben na nʋmɔ ma. Ʋ na maalʼã a ala a jaa ɩ̃ na bʋɔrɔ ʋ maal.’ 23A ʋlɔ Davɩtɩ bal par pʋɔ a Naaŋmɩn ir a *Jeeju na ɩ a Ɩsɩrayɛl nɩbɛ Fafaara, tu nɩ a mɩnɛ ʋ na dãa pʋlɩ̃. 24A lɛ a Jeeju na ma wa sɛr wa, a Jã-Batii de na nĩe hiere yele a Ɩsɩrayɛl nɩbɛ ba jaa á bá lɩɛb a ba yɛ̃ ɩ̃ a ba mʋr ba a kʋ̃ɔ. 25A lɛ a Jã na pɩɛlɛ a kũu, ʋ yele na: ‘Maa ɩ a ʋlɔ nyɩ na tɩɛrɛ a ɩ̃ ɩ na wa. Ɩ̃-cɛ a ʋlɔ, ʋ cãa na be a ɩ̃ puo-sɔw waara, ɩ̃ a maa, maa sɛw nɩ a ʋ nafaba sɩɩrfʋ wa.’

26“Ɩ̃ yɛɛr Abʋraham bibiir, nɩ a nyɩmɩ na be a ka puoro a Naaŋmɩn, sɩmɩ ba tʋ nɩ a faafʋ ƴɛrɩ̃ na kʋ. 27A-na-ɩ a Jerujalɛm nɩbɛ nɩ a ba ni-dierbe ma dãa bɔ̃w a ʋlɔ a Jeeju na ɩ wa, ɩ̃ a mɩnɛ ba na ƴɔ̃w ʋ a ƴɛrɩ̃, ba maalʼã a ƴɛr-hierbe ƴɛrɩ̃sɩ ala ba na ma ꞌwuoro a bibi-ciirsɩ a jaa. 28A mɩnɛ ba na ma saarɩ̃ nyɛ sãwfʋ a ʋ jie na ƴɔnɔ ʋ a kũu pʋɔ wa, ba sʋɔrʼã a *Pɩlatɩ ʋ ƴɔ̃w a ba kú ʋ. 29Ɩ̃ a mɩnɛ ba na maal a ala a jaa na sɛb a sɛbɛ pʋɔ a ʋ ɩnɛ baar, ba yaw ʋ na a nɩ-kʋ daa juu suu nɩ na ũu. 30Ɩ̃-cɛ a Naaŋmɩn ir ʋ na a kũu pʋɔ. 31Ɩ̃ a bibi-yaw sɔ̃w ʋ nyɩrʼã a bala na dãa yi nɩ ʋ a Galile ɩ̃ cen a Jerujalɛm, ɩ̃ mɩ ɩ a ʋ yel-mɩ̃ɛ ƴɛr-manba a Ɩsɩrayɛl nɩbɛ jie a ƴɛ̃ƴɛrɩ̃ na. 32A sɩmɩ, sɩ ƴɛrɛ na a ƴɛr-son kʋrɔ nyɩ, áa ƴɛrɩ̃ ʋlɔ a Naaŋmɩn na dãa pʋlɩ̃ nɩ a sɩ sãa-kʋnbɔ, 33á ʋ maalʼã baar a sɩmɩ na ɩ a ba bibiir jie, a lɛ ʋ na ir a Jeeju a kũu pʋɔ. A mɩnɛ a na sɛb a Pɛwfʋ sɛbɛ bõ-kpɛ̃ɛ ayi pʋɔ:

‘Fʋ ɩ na a ɩ̃ bi-daba.

Wa nyɔw nɩ a dɩnaa ɩ̃ lɩɛbʼã ɩ a fʋ Sãa.’

34A Naaŋmɩn dãa na yel a ʋ na ir ʋ na a kũu pʋɔ, ʋ kɔ̃ɔ lɛ lɩɛb kpɛ a kũu pʋɔ sãw wa. A-na-ɩ ʋ yelʼã:

‘Ɩ̃ nɔɔ sɩrɩ̃ na kʋ nyɩ a ɩ̃ yel-sono

ala ɩ̃ na dãa pʋlɩ̃ nɩ a Davɩtɩ.’

35Ala-ɩ̃-sɔ a Davɩtɩ yel a ji-kpee:

‘Faa bara a fʋ tʋ̃tʋ̃-son

ʋ kpɛɛrɛ a sãwfʋ pʋɔ wa.’

36A-na-ɩ a lɛ a Davɩtɩ na cãa be ka a tẽw pʋɔ, ʋ maalʼã a ala a Naaŋmɩn na dãa yɔ̃w nyãa ʋ maal ɩ̃ pãa kpi, a ba ũu ʋ a ʋ sãa nʋmɔ jie, a ʋ ɩ̃gan pʋ̃ɔ. 37Ɩ̃-cɛ a ʋlɔ a Naaŋmɩn na ir a kũu pʋɔ, ꞌwaa kpɛ a sãwfʋ pʋɔ wa.

38-39“Yɛɛr, a sɛw na nyɩ bɔ̃w ka a Jeeju yuor sɩ de ƴɛrɛ nɩ kʋrɔ nyɩ áa Naaŋmɩn na tʋɔ na de a nyɩ maal-faar bar kʋ nyɩ. A nɩrɛ lɛ na sɔw de a Naaŋmɩn, ʋ na ir ʋ na a ʋ maal-faar a jaa pʋɔ bar, a ala a jaa pʋɔ a Mowisi ƴɛr-kpɛn na ma dãa tʋɔrɔ ire ʋ wa. 40Nyɩ́ tɛrɛ nyɩ mɩ̃ɛ a mɩnɛ a ala a ƴɛr-hierbe na dãa ƴɛr a kɔ̃ wa ta nyɩ wa. 41A-na-ɩ ba yelʼã:

‘A nyɩmɩ na kpɛrɛ a nɩbɛ, nyɩ́ cɛlɛ!

Nʋɔr na ko nyɩ na a nyɩ bɔr,

a-na-ɩ ɩ̃ na tʋ na tʋmɔ a nyɩ daarʼã pʋɔ,

ɩ̃ a ala ɩ̃ saarɩ̃ ɩ a nɩrɛ man nyɩ na,

nyɩ kɔ̃ sɔw wa.’ ”

42A mɩnɛ a Pol nɩ a Banabasɩ na yire a puorfʋ yir, ba sʋɔr ba na a ba lɛ wa a bibi-ciiraa dayen go na ƴɛr a ʋna ƴɛrɩ̃ kʋ ba. 43A lɛ a nɩbɛ na wɛl baar, a Jufisɩ yaw jie nɩ a bala na kpɛ a Jufisɩ puorfʋ pʋɔ tuure na a Pol nɩ a Banabasɩ, a ba ƴɛrɛ nɩ ba sũono ba a ba bɔ̃w ɩraa cĩcĩ a Naaŋmɩn maal-vɩlaa pʋɔ.

44A bibi-ciiraa ʋlɔ na tu, a tẽw nɩbɛ yaw jie duo na cɛlɛ a Nɩ-kpɛ̃ɛ Jeeju ƴɛrɩ̃. 45A mɩnɛ a Jufisɩ na nyɛ a nɩ-yaw bala, nyuur nyɩrɩ̃ na nyɔw ba a ba cɩɩrɛ a ala a Pol na ƴɛrɛ, tʋrɔ nɩ ʋ. 46A Pol nɩ a Banabasɩ barʼã nyãa ɩ̃ yel ba:

“A dãa na sɛw sɩ de nĩe ƴɛr a Naaŋmɩn ƴɛrɩ̃ kʋ a nyɩmɩ Jufisɩ baar, ɩ̃-cɛ a mɩnɛ nyɩ na jaar, a nyɩ mɩ̃ɛ nyɩ ƴɔ̃w a ƴɛrɩ̃ ɩ̃ ma sɛw nɩ a baa-kɔ̃-tɛw wa. A na be a lɛ, sɩ na lɩɛbʼã cen a nɩ-bʋlsɩ jie a ƴɛ̃ƴɛrɩ̃ na. 47A-na-ɩ a Nɩ-kpɛ̃ɛ yel sɩ na:

‘Ɩ̃ biin fʋ na a fʋ na ɩ cãa a nɩ-bʋlsɩ jie,

a fʋ na de a faafʋ ƴɛrɩ̃ cen

na ta nɩ a ten nɩbɛ ba jaa jie.’ ”

48A mɩnɛ a bala na ma ɩ a Jufisɩ wa na wõ a ʋna ƴɛrɩ̃, ba cɩlɛ na yele nɩ áa Nɩ-kpɛ̃ɛ ƴɛrɩ̃ ɩ na bõ-son. A lɛ, a bala a Naaŋmɩn na vɛl ir a ba na tɛrɛ a baa-kɔ̃-tɛw sɔw na de a Jeeju.

49A Nɩ-kpɛ̃ɛ ƴɛrɩ̃ yɛrʼã pɔw a ʋna wɩɛr ʋ jaa. 50Ɩ̃-cɛ a Jufisɩ damʼã a pɔɔ-naabsɩ bala na puoro, nɩ a tẽw nɩ-bɛrɛ ƴɔ̃w a ba hʋɔl a Pol nɩ a Banabasɩ ɩ̃ diw ba bar a ba yi a ba wɩɛr pʋɔ. 51A lɛ, a nɩbɛ ayi bala tɛbʼã a ba gbɛɛ tãbuulĩ #13.51 Gbɛɛ tãbuulĩ tɛb barfʋ: Nyɩ́ ꞌwuor Mat 10.14. ƴɔ̃w ba, ɩ̃ cen a Ɩkɔnɩyɔ̃. 52A *par-tuurbe bala na be a Ãtɩyɔsɩ sɛw nɩ na a nʋɔ nɩ a Naaŋmɩn Sɩɛ.

Currently Selected:

Nɩ-tʋnɩsɩ tʋmɔ Sɛbɛ 13: BNT93

Highlight

Copy

Compare