2 Kɔrɛ̃tɩ Sɛbɛ 9
9
A NÃW DEME SŨOFƲ
1A na ɩ na pɔrɔ a ala ɩ ɩ̃ sɛb nyɩ na a tʋn ʋlɔ ba na tʋ̃ sũo nɩ a Jude wɩɛr popuorbo ɩnɛ. 2A-na-ɩ ɩ̃ bɔ̃w na a mɩnɛ nyɩ na sɔw a ba sũofʋ. Ɩ̃, ɩ̃ mɩ dãa na sʋ̃ɔ nyɩ a Masɛdɔn *duo-puorbo jie, na ɩ̃ yel: “A yɛɛr bala na be a Akayi wɩɛr gbɛɛrɩ̃ na dɩ̃ɛw jaa a ba sũofʋ ɩnɛ.” Ala-ɩ̃-sɔ a nyɩmɩ Kɔrɛ̃tɩ deme ɓĩɓinfʋ jaw na a yaw jie a ba sɔ̃w. 3Ɩ̃-cɛ sɩ tʋnɔ na a yɛɛr basɩmɛ be a nyɩ jie, a mɩnɛ a ƴɛrɩ̃ ʋlɔ ɩnɛ ɩ̃ na dãa sʋ̃ɔ nyɩ kɔ̃ ɩ pɔrɔ wa. Ɩ̃ ɩ̃ bʋɔrɔ na nyɩ sɩrɩ̃ gbɛɛrɩ̃ baar a mɩnɛ ɩ̃ na dãa yel. 4A-na-ɩ a ala ɩ a Masɛdɔn nɩbɛ dãa na pɔw ma wɩɛrɛ nɩ a be, ɩ̃ ma nyɛ a nyɩ sɩrɩ̃ gbɛɛrɩ̃ baar wa, a naa dãa ɩ sɩ vĩ, ɩ̃ wa pãa yele nɩ a nyɩmɩ, a mɩnɛ sɩ na nyɩrɩ̃ barʼɩ̃ nyɩ a nyãa a lɛ. 5Ala-ɩ̃-sɔ, ɩ̃ nyɛ na a ɩ son ɩ̃ sʋɔr ɩ̃ yɛɛr a ba na de ma nĩe cen, na gbɛɛrɩ̃ a bõ-son ʋlɔ nyɩ na dãa pʋlɩ̃ nɩ. A nɔhɔ̃, a maa wa wɩɛrɛ, a na miil sɩ na a nyɩ tɩɩrʼã nɩ pʋ-pɩlaa, ɩ̃ fɛrfʋ ma be tɔ wa.
6Nyɩ́ tɩɛrʼɩ̃ a ƴɛr-birʼãa na yel: a ʋlɔ na kɔ a fɩ̃ɩ, a fɩ̃ɩ ʋ na ŋma, ɩ̃ a ʋlɔ na kɔ a yaw, a yaw ʋ na mɩ ŋma. 7Ala-ɩ̃-sɔ, a nɩrɛ ʋ̃ bɔ̃w tɩɛr ɩ̃ pãa tɩɩr, a mɩnɛ ʋ kɔ̃ wa waala, mɩɩ ba fɛr ʋ na wa. A-na-ɩ a Naaŋmɩn nʋnɔ na a ʋlɔ na tɩɩrʼɩ̃ a nʋ̃ɔ. 8A Naaŋmɩn na tʋɔ na kʋ nyɩ a yel-vɛlɛ bʋrɔ bʋrɔ a jaa, ɩ̃ lɛ cãa dɔɔl nyɩ, a mɩnɛ a nyɩ na tʋɔ tɛrɛ a ala na sɛw nyɩ a daar a jaa, ɩ̃ lɛ cãa tɛrɛ sũono nɩ a tʋ̃-vɛlɛ a jaa. 9A mɩnɛ a Naaŋmɩn Sɛbɛ na yel:
“Ʋ ma yara na bara kʋrɔ a nãw deme.
A ʋ yɛ̃-bɔ̃wfʋ ma tɛrɛ bɛwfʋ daar wa.”
10A Naaŋmɩn ʋlɔ na ma kʋ a kʋɔraa a ci-bʋrɔ, nɩ a nɩrɛ a dɩb, ʋ na mɩ kʋ nyɩ na a yel-bʋrɔ ala na sɛw nyɩ, ɩ̃ lɛ maal a dɔɔl, a mɩnɛ a nyɩ yɛ̃-bɔ̃wfʋ na tɛrɛ a wɔmɔ yaw. 11Ʋ na maal nyɩ na a nyɩ nyɩrɩ̃ le, a mɩnɛ nyɩ na tʋɔ miil a nyɩ yɛ̃-bɔ̃wfʋ a jiir a jaa, ɩ̃ a Naaŋmɩn na mɩ pɔw na a pɛwfʋ a nɩ-yaw jie a sɩ tʋmɔ ɩnɛ. 12A-na-ɩ a ʋna tʋ̃-son nyɩ na maala, aa ɩ a Naaŋmɩn-puorbo won tɛw a sũo wa, ɩ̃-cɛ a mɩ maalʼã a nɩ-yaw a ba nyɩrɩ̃ pɛwrɛ a Naaŋmɩn. 13A ʋna tʋn naa na miil ba na a mɩnɛ nyɩ na wɔ̃, a ba pɛwrɛ a Naaŋmɩn. A-na-ɩ aa ɩ a nʋɔr pʋɔ tɛw nyɩ sɔw de a *Kirisi ƴɛr-son wa, ɩ̃-cɛ nyɩ wono ʋ na a toor, a mɩnɛ nyɩ na bɔ̃w a yɛ̃ ɩ̃ sũo ba, lãa nɩ a nɩbɛ jaa. 14Ba na sʋɔrɔ na a Naaŋmɩn ƴɔnɔ nyɩ, a mɩnɛ nyɩ na kpɛ ba a nyãa, a-na-ɩ ba na nyɛ na a Naaŋmɩn sũofʋ na nyɩrɩ̃ be nɩ nyɩ. 15Naaŋmɩn sɔ pɛwfʋ a ʋ Bie ʋ na kʋ sɩ ɩnɛ na gãw a yele a jaa.
Currently Selected:
2 Kɔrɛ̃tɩ Sɛbɛ 9: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
