1 Timote Sɛbɛ 6
6
A BALA NA TƲNƆ A GBÃGBAAR TƲMƆ
1A bala ba jaa na be a gbãgbaar tʋmɔ pʋɔ, a sɛw na ba bɔ̃w ka a ba nɩ-bɛrɛ sɛw nɩ na a ƴɔ̃wfʋ a jaa, a mɩnɛ a nɩrɛ kɔ̃ wa kpɛrɛ a Naaŋmɩn yuor, nɩ a sɩ jaanfʋ wa. 2A bala na tɛrɛ a nɩ-bɛrɛ a ba ɩ a popuorbo ma sɛw na wõw toor a ba jie a-na-ɩ yɛɛr ba ɩ wa. Ɩ̃-cɛ a sɛw na a ba ɛ̃ɛ ƴɔ̃w fãgã ɩ̃ tʋnɔ a ba tʋmɔ, a-na-ɩ a bala ba na tʋnɔ kʋrɔ ɩ na a popuorbo ba na mɩ nʋnɔ.
A BALA NA BƆR A NAAŊMƖN SƆR PƲƆ
Nyɛ a ala na sɛw fʋ jaana mɩ kpãkpana nɩ ba. 3A ala ɩ a nɩrɛ wa jaana na a jaan-kpee, ɩ̃ ma sɔw de a sɩ Nɩ-kpɛ̃ɛ *Jeeju-Kirisi ƴɛr-sono nɩ a Naaŋmɩn sɔr jaanfʋ wa, 4ju-kpɛ̃ɛ ʋ bʋɔrɔ. ꞌWaa bɔ̃w bom wa, ɩ̃-cɛ a ƴɛr-soorsɩ nɩ a ƴɛrɩ̃ cɩɩrɩ̃fʋ sãw ʋ na bar. A be jie a nyuur ma yi, nɩ a faa-taa, a kpɛfʋ, nɩ a tɩɛrʋ̃-fãa ba na tɩɛrɛ ƴɔnɔ taa. 5Ba ɩ na nɩ-giemsɩ na ma cɩɩrɛ taa a daar a jaa, ɩ̃ ma lɛ cãa bɔ̃w a yel-mɩ̃ɛ wa. Ba tɩɛrʼã bɔ̃w ka a Naaŋmɩn sɔr tufʋ na le ba na.
6A Naaŋmɩn sɔr tufʋ sɩrɩ̃ na ɩ a lefʋ bom a ʋlɔ jie na bɔ̃w ka a ala ʋ na tɛrɛ sɛw nɩ ʋ na. 7A-na-ɩ saa dãa tɛrɛ bom wa nɩ ka a tẽw pʋɔ wa, ɩ̃ saa mɩ lɛ tʋɔrɔ diere bom cere nɩ wa. 8Ɩ̃ a sɩmɩ tɛrɛ a bõ-dɩraa nɩ a cẽcene, a na sɛw sɩ na. 9A bala na bʋɔrɔ a lefʋ, ba ma lo na a bɩɩrfʋ pʋɔ kpɛ a cakpo pʋɔ, a-na-ɩ a yel-yaw vɩláa na nyɔw ba na, a yele na ɩ a dãbol yele nɔɔ ƴɔnɔ ba a fãa pʋɔ. A yele ala ma gãw na a nɩbɛ, taw ba kpɛ nɩ a sãwfʋ nɩ a wɛfʋ pʋɔ. 10A-na-ɩ a libie nʋfʋ ɩ na a fãa bʋrɔ bʋrɔ juu. A nɩŋmɛɛ dãa na nyɩrɩ̃ bʋɔrɔ ʋ, ɩ̃ bɔr jãa taa nɩ a Naaŋmɩn ƴɛrɩ̃, ɩ̃ woor a won a sɛw a ba sube.
A POL ƳƐR-BAARAA
11Ɩ̃-cɛ a fʋ̃ʋ na ɩ a Naaŋmɩn tʋ̃tʋnɔ, ŋmaa yi a ala a jaa pʋɔ, ɩ̃ bɔ̃w tuure a torfʋ ƴɔnɔ nɩ a Naaŋmɩn, bʋɔrɔ nɩ a ƴɔ̃w-nyãa nɩ a nʋfʋ, mɩ ɩ nɩ a nɩ-hɛlɛlɛ. 12Jɛbɛ a ƴɔ̃w-nyãa jɛb na ɩ a jɛb-son. Bɔ̃w tɛrɛ a baa-kɔ̃-tɛw, a-na-ɩ a ʋlɔ ɩnɛ a Naaŋmɩn dãa bʋɔl fʋ a lɛdaar fʋ na dãa man a fʋ yel-mɩ̃ɛ ƴɛrɩ̃ a nɩ-yaw nii-sɔw. 13Ɩ̃ kpãkpana fʋ na nɩ a Naaŋmɩn ʋlɔ na kʋrɔ a yele a jaa a baafʋ, nɩ a *Jeeju-Kirisi ʋlɔ na dãa man a ʋ yel-mɩ̃ɛ ƴɛrɩ̃ a Pɔ̃sɩ *Pɩlatɩ nii-sɔw, 14bɔ̃w gu a Naaŋmɩn ƴɛrɩ̃sɩ ala fʋ na dãa pɔw, a kɔ̃ tɛrɛ cɛfʋ jie, wa ta nɩ a lɛdaar a sɩ Nɩ-kpɛ̃ɛ Jeeju-Kirisi na nyɩrɛ. 15A Naaŋmɩn na miilĩ ʋ na a daar ʋlɔ pʋɔ ʋ na ƴɔ̃w, a Naaŋmɩn ʋlɔ na ɩ a fãw nɩ a maal-vɩlaa Sʋbɔ yẽ tẽtẽ, na mɩ ɩ a jamansɩ Jamana, nɩ a nɩ-bɛrɛ Nɩ-kpɛ̃ɛ. 16Ʋlɔ tɛw ma tɛrɛ a kũu daar wa, ɩ̃ mɩ be a cãa ʋlɔ pʋɔ a nɩrɛ na ma tʋɔrɔ pɩɛlɛ wa. Nɩrɛ kãw ma dãa nyɛ ʋ sɛr wa, ɩ̃ nɩrɛ ma mɩ tʋɔrɔ nyɛrɛ ʋ wa. Ʋlɔ ɩ̃ sɛw nɩ a ju-kpɛ̃ɛ nɩ a fãw na ma tɛrɛ a bɛwfʋ daar wa. *Amɛn.
17Yel a bala na ɩ a ka a tẽw na pʋɔ naabsɩ a ba taa bʋɔrɔ yuor wa, a ba taa mɩ ƴɔ̃w a ba tɩɛrɩ̃sɩ a na-yele pʋɔ wa, a-na-ɩ saa bɔ̃w a ana yele baarfʋ daar wa. Ɩ̃-cɛ a ba ƴɔ̃w a ba tɩɛrɩ̃sɩ a Naaŋmɩn jie, a ʋlɔ na kʋrɔ sɩ a yel-bʋrɔ bʋrɔ a jaa a na ƴɔ sɩ a sɩ na tʋɔ tɛrɛ a nʋ̃ɔ. 18Yel ba á bá maala a ala na vɩɛlɛ, tʋnɔ nɩ a tʋ̃-vɛlɛ bʋrɔ bʋrɔ, ɩ nɩ a yɛ̃-bɔɔnbɔ, kɔ̃ bɛlɩ̃ puor wa. 19A lɛ, ba na kaala na a na-yele yaw biine a daar ʋlɔ nɔɔ waara ɩnɛ, a mɩnɛ a ba na tʋɔ bɔ̃w tɛrɛ a yel-mɩ̃ɛ baafʋ.
20Ɩ̃ Timote, bɔ̃w gu a ala ba na kʋ fʋ, ɩ̃ ŋmaa yi a ana ƴɛr-pɔrsɩ pʋɔ na ma tɛrɛ par wa, nɩ a bala jie na tɛrɛ a jiri-bɔ̃wfʋ cɩɩrɛ nɩ, 21a bɔ̃wfʋ ala a nɩŋmɛɛ na dãa de yɔ nɩ wa faa, ɩ̃ ŋmaa yi a sɩ puorfʋ pʋɔ.
A Naaŋmɩn sũofʋ ú be a nyɩ jie.
Currently Selected:
1 Timote Sɛbɛ 6: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
