1 Kɔrɛ̃tɩ Sɛbɛ 4
4
A KIRISI NƖ-TƲNƖSƖ
1Ala-ɩ̃-sɔ, nyɩ sɛw na nyɩ ma de sɩ a sɩ ɩ a *Kirisi tʋ̃tʋnbɔ, a bala a Naaŋmɩn na de a ba ɩ a ʋ yel-bɔ̃w-faarsɩ ꞌwoꞌwuorbo. 2Ɩ̃ a ala ba na ma nyɩrɩ̃ bʋɔrɔ a *yel-ꞌwuoro jie ɩ na, ʋ ɩ dẽdẽ. 3A maa jie, a ala ɩ nyɩ guoro na a ɩ̃ ƴɛrɩ̃ mɩɩ a tẽw nɩ-bɛrɛ ɩ̃ guoro, aa ɩ ma bom wa. A maa mɩ̃ɛ, maa mɩ guoro a ɩ̃ ƴɛrɩ̃ wa. 4A ɩ̃ mɩ̃ɛ bɔ̃wfʋ ma miil ma bõ-bier wa; ɩ̃-cɛ maa yel a ɩ̃ torʼã a lɛ wa. A Nɩ-kpɛ̃ɛ ɩ̃ ɩ a ɩ̃ ƴɛr-guoro. 5Ala-ɩ̃-sɔ, nyɩ taa de nĩe guor a ƴɛrɩ̃ ɩ̃-cɛ a ʋ daar ma ta sɛr wa. Ɩ̃-cɛ nyɩ́ bar wa ta nɩ a Nɩ-kpɛ̃ɛ waa. A ʋlɔ na maal a ala na sɔɔlɩ̃ a libe pʋɔ a yi cãa pʋɔ, ɩ̃ mɩ maal a nɩbɛ tɩɛrɩ̃sɩ ala na be a ba pʋʋrɩ̃ a nyɩr cãa pʋɔ. Ɩ̃ a daar ʋlɔ pʋɔ, a nɩbɛ ba jaa bõ-ƴene-ƴene na pɔw na a ba pɛwfʋ a Naaŋmɩn jie.
6Yɛɛr, a nyɩ ɩnɛ ɩ̃ de a ɩ̃ mɩ̃ɛ nɩ a Apolosi miilʼɩ̃ a ana yele a lɛ. Ɩ̃ bʋɔrɔ na nyɩ de sɩ a sɩ ɩ bõ-tɔɔnaa, jaanʼɩ̃ a sʋkpa par ʋlɔ na yel: “Taa gãw a ala ba na sɛb bar wa.” A nyɩ pʋɔ, nɩrɛ kãw ma sɛw na vʋnɔ a ʋ mɩ̃ɛ, ɓã nɩ a ƴen sʋbɔ ɩ̃ kpɛrɛ a kãw wa. 7Ala ɩ̃ ƴɔ̃w fʋ a kpɛ̃ɛ ɩfʋ? Bõ fʋ tɛrɛ ɩ̃ ma ɩ ba kʋ fʋ na wa? Ɩ̃ ala ɩ ba kʋ fʋ na, bõ ɩ a fʋ vʋnɔ a fʋ mɩ̃ɛ wɔ̃ taa nɩ fʋ mɩ̃ɛ bom ʋ?
8Nyɩ gɔrʼã tɛrɛ a yele a jaa ala nyɩ na ƴɔ̃w nyãa! Nyɩ mɩ gɔrʼã le! Nyɩ lɩɛbʼã ɩ jamansɩ nyɩ yẽ, ɩ̃ cɛ sɩ bar! Ɩ̃ tɩɩ na bʋɔrɔ nyɩ sɩrɩ̃ ɩ jamansɩ a sɩ na tʋɔ ɓã taa. 9Ɩ̃ nyɛ na a wɔ̃ taa nɩ a Naaŋmɩn maalʼã a sɩmɩ na ɩ a ʋ *nɩ-tʋnɩsɩ a sɩ ɩ a par-pɔɔrbɔ. Sɩ wɔ̃ na taa nɩ a bala ba na ƴɔ̃w a kũu pʋɔ a sɩ ɩ a bõ-miilaa a ten a jaa nɩbɛ nii-sɔw, nɩ a sɩ-tʋnɩsɩ nii-sɔw mɩ. 10Sɩ ɩ na dãbolo a Kirisi ɩnɛ, ɩ̃-cɛ a nyɩ ɩ a yɛ̃-bɔɔnbɔ a Kirisi pʋɔ. Sɩ balʼã, ɩ̃-cɛ a nyɩ kpɛmɛ. A nɩbɛ ƴɔnɔ nyɩ na, ɩ̃ mɛbɛ sɩ. 11Wa ta nɩ a ƴɛ̃ƴɛrɩ̃, a kɔ nɩ a kʋ̃ɔ-nyuur ma nyɔw sɩ na, a yel-suursɩ ma ɓɔr sɩ, a nɩbɛ ma pɔbɔ sɩ, ɩ̃ a saa mɩ tɛrɛ yir kpɛɛrɛ wa. 12Sɩ tʋnɔ nɩ na a sɩ nur, vɔwrɔ nɩ a sɩ mɩ̃ɛ. A bala tʋ sɩ, Naaŋmɩn sɩ ma sʋɔr ƴɔ̃w ba. A bala kpow sɩ, sɩ ma nyɔw na suur. 13A ala ɩ a jir-kar ba ŋmaa ƴɔ̃w sɩ, sɩ ma laara nɩ ba na. Sɩ lɩɛbʼã wɔ̃ a tẽw saba kaarɩ̃, ɩ̃ mɩ ɩ a nɩbɛ ba jaa tãpuor wa ta nɩ a ƴɛ̃ƴɛrɩ̃ na.
14Maa sɛb nyɩ a asɩmɛ bʋɔrɔ ɩ̃ ƴɔ̃w nyɩ vĩ wa. Ɩ̃-cɛ ɩ̃ bʋɔrɔ na ɩ̃ kpãkpan nyɩ a ɩ̃ bi-nʋnɩsɩ kaarɩ̃. 15A nyɩmɩ saarɩ̃ tɛrɛ tɔtɔɔrbɔ ture pie na tɔwrɔ nyɩ a Kirisi sɔr pʋɔ, ɩ̃ sãa bõ-ƴen tɛw nyɩ tɛrɛ. A Naaŋmɩn ƴɛr-son ɩ̃ na dãa wɩ nɩ ƴɛr kʋ nyɩ ɩnɛ ɩ̃ lɩɛb ɩ a nyɩ sãa a *Jeeju-Kirisi pʋɔ. 16Ala-ɩ̃-sɔ ɩ̃ sʋɔr nyɩ na, nyɩ́ lɩɛb tɔɔnɔ ma. 17A ala ɩnɛ ɩ̃ tʋ a Timote be a nyɩ jie. Ʋ ɩ na a ɩ̃ bi-nʋnaa ɩ̃ mɩ ɩ dẽdẽ a Nɩ-kpɛ̃ɛ jie. Ʋ na jaw nyɩ na a mɩnɛ ɩ̃ na cere a Jeeju-Kirisi sɔr pʋɔ, a mɩnɛ ɩ̃ na ma mɩ jaana a *duo-puorbo a jiir a jaa.
18A nɩŋmɛɛ be na be vʋnɔ maala nɩ wɔ̃ taa nɩ maa wɩɛrɛ be wa. 19Ɩ̃-cɛ a Nɩ-kpɛ̃ɛ wa sɔw, ka nɩ fɩ̃ɩ ɩ̃ na wɩ na be a nyɩ jie. Maa wɩɛrɛ a bana yo-bʋɔrbɔ ƴɛrɩ̃sɩ tɛw bɔ̃wfʋ ɩnɛ wa, ɩ̃-cɛ ɩ̃ na mɩ bɔ̃w a ba kpɛ̃w ʋlɔ ba na tɛrɛ a Kirisi pʋɔ. 20A-na-ɩ a
Naaŋmɩn fãw ma ɩ a nʋɔr ƴɛrɩ̃sɩ tɛw wa, ɩ̃-cɛ tʋɔfʋ ʋ ɩ. 21Bõ nyɩ bʋɔrɔ? Ɩ̃ wɩ nɩ gʋraa, mɩɩ ɩ̃ wɩ nɩ nʋfʋ nɩ su-ɓaar?
Currently Selected:
1 Kɔrɛ̃tɩ Sɛbɛ 4: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
