MATAYO 2
2
Bareanoodiga leabu heeda ghayeawa
1Damanda sijiila Yesu aba Betlehemeeda Yudeya, damanda waseewa Herode sugoocheanda. Ng'ula, ghwahidu Yerusalemu weaghoodiga leabu heeda ghayeawa nea gwayi, 2“Gwanda yeenu baleanda siji was sugoocheanda Yahudi? Aba gideaba geadeaksi miing'weandaanyi#2:2 Miing'weanda: Fuga hees bea Yahudi gaba siisi mideawa miing'weandaanyi. heeda ghayeawa, ak geapkaanyi eaghadoawana.” 3Iiy sugoocheanda siyi Herode ng'asheesu, gwahirbaban sea Yerusalemooda sean. 4Gaguursa ashoohoodiga hees sean ea ng'oorshoodiga buuneeda ak ghoanyaash heeda jea eejiilsa Gristo. 5Geeyeesha, “Jeeda Betlehemeeda Yudeya aba gideaba gidaghayi ng'oarda sibaneeda,
6‘Nea ang'iing'i, Ea Betlehemeeda ng'eanyiida Yuda,
ang'iing'i muwoosi mwanang'eawa earahay sugoodiga ng'eanyiida Yuda;
aba gideaba headaang'u gaygwarina sugoocheanda,
jea ghoahaaghwa buuneedeanyu was Israeli.’”
7Gaguursa Herode aba makcheameeda weaghoodigiga ak ghoanyaash damanda daaha miing'weandideani; 8ak goojeakta Betlehemu nea gwayeesha, “Aweayeena ak ghoanyaashti muuchi iita baleanda, ama oanyaschi gooyeanean iita, abeeda gaydawa eara aniini daghadoawan.” 9Hean iiy ng'asheega sugoocheanda ghoang'waay naweeda; asi ng'ula, miing'weandida sideaksa heeda ghayeawaan, goosheedeawa ea gawa ghamiinaadawa deascheeda mida baleanda. 10Iidaah fugiga miing'weandida gang'weela ng'weelooda haw muuchi; 11weay gah ghwadaah baleanda ea Mariyayda was ghaamwat ak goobeedeayi ak ghaghadoawan. Ng'ata, gootin shageeniga nyaawa ak ghoadaw haleanjeeda miyas, was dahaabu ea hideeni ng'andit ea buureata. 12Iidu nea sireekusa aba jeeda giirgweatka ea mabiiksiina Herode, ghwala nawa nuut ak gaweay ng'eang'da nyaawa.
Mang'awsiinda Misri
13Iing'ata nea niweay fugiga, ng'ula ghwahidu heeda Yosefu Malaykajeanda Ng'utamiida aba jeeda giirgweatka ak gwayeesha, “Ng'eada ak giyaadi baleanda ea ghaamwat, amng'awsiina Misri, ak goopiidi hoowa ea darukuneey, aba gideaba gagasa Herode gwanuus baleanda.” 14Ghang'eat ak ghwaat baleanda sea ghaamwat eawa, ak gawa Misri, 15goobiida hoowa ea ghami Herode. Nih gajeenung' gwasa ng'asheandida ghayi rugu Ng'utamiida aba ghuuta sibaneeda, “Geaguursi orjeedaanyi gwarina Misri.”
Geenuuseada diibiga
16Hean jeeng'u Herode gideaba nimulsa fugiga was weaghoodigean, ghwanyareas muuchi, hean goojeakta buuneeda gwanuuseada diibiga sean was orjooga aba Betlehemu ea gea mida jeedeaba ng'eanyiita bea gweanyeew iyeenya, ea gea hiing'aadawa, nea abeeda ea nisikteawa damanda rukusa weaghoodiga. 17Ak gwasa ng'asheanda ghayi rugu sibaneeda siguura Yeremiya nea gwayi:
18“Siyiiy ghuuta siida aba Rama,
shooka ea heareega raanya,
Raheli gooyeawda diibigaaschi;
Nea mamwasa eara hawdeayda,
aba gideaba mudugwanda.”
Sibiikna Misri
19Iing'ata miyeeda Herode, hean gabussa Yosefu Malaykajeanda Ng'utamiida aba jeeda giirgweatka aba Misri, 20Ak gwayeesha, “Ng'eada, aada baleanda ea ghaamwat, ak gibiikti ng'eanyiida Israeli, aba gideaba fuga ghayi gaseadayi laknooda eaweega baleanda nimeewa.” 21Ghang'eat ak ghwaat baleanda ea ghaamwat ak gabiikta ng'eanyiida Israeli. 22Iimuchu nea ghwayiiy gideaba Arkelao niimbal ng'eanyiida Yudeya ghoang'waay hoorgeeda ghwaan was Herode, hean ghoawal gawa hoowa, amadu nea sireekusa aba jeeda giirgweatka hean ghwayam geaw ak gawa ng'eanyiida Galilaya. 23Gawa ak goobiida mujiineeda siguura Nasareti, ak abeeda gwasa ng'asheanda ghayi rukuta sibanga, “Gajeeguura Nasarayajeanda.”
Currently Selected:
MATAYO 2: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.