Barua ya Varome 4
4
1Alli tikarerań are kya Abraamu nde yeru wa mbele? Na mitanie yamwi meni ya kivandu alolia ki? 2Amu kwakooya Abraamu aniingwa usumani kiimba kya mitanie yamwi, amakii ikushomba, kake mbele ya Iṛuva nkuro ndi. 3Naare mitisiṛie ikee irera? Yarera kuri: ”Abraamu eekusuriee Iṛuva, kwa ikyo ataalio̱ usumani“. 4Kake nndu akee iṛunda mashoṛa, maṛe amwi akee itaalwa sheeli ni illilia ndi, kake nsile. 5Kake nndu atakee iṛunda mashoṛa, kake akee ikusura ulya aniingaa varekwa usumani, ikusura lyantaalika ni usumani. 6Mfo kuro na Davidi arera, ulya akee wa ngoma ni nndu Iṛuva akee intaalia usumani kitaare nkwa mitanie. 7Kanumbua: ”Vva ngoma valya vantio̱ fikasha fawo na mareko a wo akasikio̱. 8Ulya akee wa ngoma ni nndu Nndumi atakee intaalia mareko amwi“.
9Kyasia naare? Ngoma yo nkwa iwo vakee varine tubu ana na nkwa iwo vatakee varine? Amu tanumbua sheeli Abraamu ye ikusura lyamwi lyataalio̱ sheeli ni usumani. 10Kyasia ataalio̱ are? Ni ilyo ammaa irinwa ana ni ilyo kitaare anrinwa? Nnuma ya urini ndi, kake ni ilyo kitaare anrinwa. 11Nae awaria kiringisio ki kya irinwa kive ngoṛa ya usumani lua lwa ikusura eekee nalyo kitaare anrinwa. Naamu ave nde wa woose vakusuraa na akwaa kitaare varinwa, amu nawo vataalio̱ usumani. 12Lingi ave na wa varine valya vatakee varine wiliń da, kake nawo vakee isoṛa mbayo ta ikusura lyamwi nde yeru Abraamu eekee nalyo kitaare eenrinwaa.
13Amu kirekio kilya sheeli avaa muyadiṅu ya isanga kyaniingwa Abraamu na kishuku kyamwi nta nkwa ivavaso ndi, kake nkwa ikusura eetaalio̱o̱ usumani. 14Amu kwakooya valya va mavavaso wwo vayadiṅu, ikusura lyawa kya ruu na kirekio kyankashaa. 15Amu ivavaso llyo linnde uvaave, kake liteefo ivavaso irekio liifo ndi. 16Kwa ikyo kirekio kilya kifingie ikusura kive kwa shia ya uwoo, naamu kirekio kilya kive na finya kwa fishuku foose, nta nkwa valya va mavavaso da ndi na akwaa nkwa valya va ikusura lya Abraamu ulya akee nde yeru ise ti woose. 17Nakyo kisumani na kilya kyatisiṛwa: ”Nankwaṛua kuve nde wa va isanga veengi“. Kasalala kisanguń kya Iṛuva uu andenkusura sheeli yye muṛuta vafu na isenda filya fiteefo sheeli fiifo.
18Nae kaira ba filya fitavaa iiria ba eekusuraa sheeli avaa nde wa va isanga lyoose. Fulya eemiiywaa ni Iṛuva: ”Mfo kuro na kishuku kyafo kivaa“. 19Ito ateekee ntanyari wa ikusura nta akusaṛa mikae ya vvili wamwi ito weemmaa iva sheeli wamfwa, nae eekee sha wa kiṛengo kya myaka iyana, nae nta akusaṛa sheeli Sara ankua ndi. 20Kake ili andelolia kirekio kya Iṛuva, andenunua alemwa ikusura ndi, kake andeniingwa finya ikusureń eeitikisaa Iṛuva. 21Kunu eemanyaa dede sheeli Iṛuva amakii itana filya anrekia. 22Kwa ikyo kindetaalika kwamwi sheeli ni usumani. 23Kake kindetisiṛwa kwa kiimba kyamwi da ndi, kindeva sheeli eentaalio̱o̱. 24Kake nna kiimba kyeeni neese, amu tindetaalio̱ kuro neese tikusurie ito andeṛuta Yesu Nndumi weru ifo kwa vafu, 25amu yye andeniingio̱ kiimba kya mareko eru na iṛutwa, amu tikooye itaalio̱ usumani lweru.
Currently Selected:
Barua ya Varome 4: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
