Mariko 9
9
1Nae kavaia: Nkya dede namuia: Veefo vandu kari ka iva vaselele ia vataloliaa ufu kutu kumande vallolia umangi lwa Iṛuva lwishaa na finya. 2Numa ya mikonu irindaru Yesu kakurika Petiro na Yakobo na Yohane. Kavarosa uroń waasha kundo vakee kyaanya kyawo wo veni. Kailashika fwana yamwi mbele yawo. 3Na miseto yamwi ikavarama ikava myeelwa fyu, ateefo nta musangya umwi wa urukefi amakii iilisa kuro. 4Vakashewa ni Elia andu emwi na Mose. Nawo vakarera na Yesu. 5Petiro kaia Yesu: Llosha, neendo ise tikee ia. Neese titani matengo araru, limwi lyafo na limwi lya Mose na lya Elia limwi. 6Amu eeishii kilya akee irera ndi, fulya vawarwa wweṛei. 7Lia eni iṛumbe likasha likavaendie nruve. Na ununga lukauka iṛumbeń lia lwireraa: Uu mMwana wakwa ninkundie, mwaranyiń ye! 8Lia eni ili veeiṅuṛuṅuṛuu, nta ilolia nndu kita Yesu muni da akee nawo.
9Neeli veeolokaa uroń kavavavasa vataongoye nndu kilya valolia kumande Mwana wa nndu aṛukaa kwa vafu. 10Vakawara kirero kilya veeuṛanaa wo veni: A iṛuka li kwa vafu misendie yayo nkiki? 11Vakamwuṛa vakanumbua: Nkiki ili vaaṛia va mitisṛie vanumbua: Kyawara Elia ashe mbele? 12Kaaṛua kavaia: Nkya dede Elia ashaa mbele aaṛue findo foose fiiya. Kake andu emwi na iki naare kiti-siṛień kya Mwana to wa nndu, sheeli atuṛulwaa nnu na iilwa? 13Kake niń namuia: Elia ammaa isha, nawo vakantania sheeli veefuriee, sheeli atisiṛyo̱.
14Ili vandefikia vanalosho valya vengi, kalolia isyamu inini livalengetie na vaaṛia va mitisiṛie veeaṛuyanaa nawo. 15Lia eni isyamu lyoose ili vallolia, vakaṛiika. Vakanrishia vakamwisana. 16Nae kavauṛa: Nkiki mukee yaṛuyana nawo? 17Na nndu umwi kari ka isyamu lia kamwaṛua: Llosha, naminnde mwana wakwa kwafo aworwa mmumuyo nkasha untumuye tumu. 18Na kyeeri wammukwimboyo untuulaa si. Na mwana kannde mavia na irafunia mayoo na inaanaa kanaanaa deń. Nań nanrera na vanalosho vafo vauumbute, nta imakii. 19Yesu kaaṛua kavaia: Ini kishuku kitaare ikusura, nkaa neeni kumande iri ki? Mmusisiriaa kumande iri ki? Munndeń na ia nkai! 20Vakamunnde na kwamwi. Neeli mumuyo ulya Tindelolia Yesu, lia eni ukasikasika mwana. Nae kawa si kakwalaala eenndee mavia. 21Yesu kauṛa vaava wamwi: A nkuuka iri ki wawwara? Kanumbua: Nkuuka utiń lwamwi. 22Na keengi umwe-eṛaa muroń na mureń amu unrete. Kake kwakooya iwe kumakii kindo, teelekie kwitililiaa! 23Yesu kamwia: Ili kwanumbua: Kwakooya kumakii! Manya findo foose fivaa kwa ulya akusuraa. 24Lia eni ndee wa mwana ulya karosa ununga kanumbua: Nkusurie, na alya llemyo̱o̱ ikusura sheelekia mbee! 25Ili Yesu andelolia sheeli vandu kinga vakee yengeṛia inrishia, kanaya mumuyo ulya nkasha kauia: Iwe mumuyo uteeshi irera na uteesile, niń nakuvavasa mwuke, nta kutakimwuiye lingi ndi. 26Ukaṛoṛongya ukansikasika nnu ukamwuka. Na mwana kava sheeli amfwa. Na akwaa wengi vakanumbua: Ankumba muu. 27Kake Yesu kawwara uko kamwimboo. Nae kasalala. 28Neeli andeaka numba, vanalosho vakamwuṛa kya-miń: Naamu ki ise titamakii yuumbuta? 29Kavaia: Mikae yo imakii yumbutwa na kindo ndi kita na kiterewo tubu.
30Vakakwimboo ifo vakaira kari ka Galilaya. Nae afura nndu amanyi ndi. 31Amu eekee ilosha vanalosho vamwi eevaiaa: Mwana wa nndu arambikyo̱o̱ maakoń a vandu, nawo vawwaa. Nae kammaa iwalwa, numa ya mikonu iraru aṛukaa. 32Nawo nta yaṛu-kyo̱ nkirero kyo. Vakaeṛea imwuṛa.
33Vakafika kulya Kaperinaumu. Neeli ansha na kyeń, kavauṛa: Nkiki mwikee ivingania kulya shień? 34Vakasia do. Fulya kindo vandevingana wo veni na veni vakee shień ni ulya akee nnini kari kawo. 35Kakaa rembo kavaanga valya ikumi na vavili kavaia: Kwakooya nndu afurie iva wa mbele, kyawara ave wa numa kita woose na muṛundia woose. 36Nae kannde mwana kanseṛeesa karikari kawo. Kanshukuṛa kavaia: 37Nndu awwaria kimwana kimwi sha iki eeshikumbuaa niń, ito anshiwaria niń. Na nndu ashiwaria niń, nniń ashiwaria ndi, kake ni ulya andeshiruma.
38Yokane kamwia: Llosha, tindelolia nndu eeumbutaa mimuyo mikasha eesendaa irina lyafo, nae atakee nndu alungani neese. Neese tikamwima. 39Yesu kanumbua: Manya mutamwimi! Amu eefo nndu atanaa kindo kinini eesendaa irina lyakwa na imakii ishirera lingi kikasha ndi. 40Nndu atatileye, ito wwa taari yeru. 41Amu ulya woose amurita mura na umbata kiimba kya ishikumbua niń, fulya mukee va Kristo, nkya dede namuia: Akaa atuṛe isina lyamwi kutu ndi. 42Na ulya woose atevetaa umwi wa iwo vannya vashikusurie, llyo ṅwana afingyo̱ isewe sungoń yamwi na yeeṛwa nruveń. 43Na uko lwafo lukankuteveta, luminyi! Llyo ṅwana yaka muuń kutuṛie yeeṛo limwi kita iva na maako avili na yeeṛwa muroń utarunyikaa. 44Nafo mfo sava yawo itafwaa ana muro utarunyikaa. 45Na urende lwafo lukankuteveta luminyi! Llyo ṅwana yaka muuń kutuṛie urende lumwi kita iva na marende avili na yeeṛwa iriniń lya muro utarunyikaa. 46Nafo mfo sava yawo itafwaa ana muro utarunyikaa. 47Na iriso lyafo likankuteveta liiṛue-fo kulikumbe! Llyo ṅwana yaka umangiń lwa Iṛuva kukee iboosho kita iva na miso avili na yeeṛwa iriniń lya muro. 48Nafo mfo sava yawo itafwaa na muro utarunyikaa. 49Amu munyu wa ilorisa nndu mmuro. 50Munyu nkindo kisha. Kake munya ukavva kyoongio, muulorisaa na kiki? Veń na munyu kari kanu, mukaa na unambwe ini mu veni na mu veni.
Currently Selected:
Mariko 9: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
