Mariko 7
7
1Llyo Vafarisayo na vaana va mitisine kiindi vakakusandia io akai vauka kulya Yerusalemu. 2Vakalolia kiindi kya vanalosho vamwi veelyaa shoonga na maako a kiṛinda atakee masangye. 3Amu Vafarisayo na Vayuda woose veelyaa shoonga kitaare vasangya maako ndi. Fulya veekuworee na milimu ya vakuuku vawo. 4Neeli veeukaa singiṛeń veelyaa shoonga kitaare vakusangya ndi. Fiifo na findo fingi fiingi vandewaria na ifiringa, sha isangya mbata na ndima na nungu. 5Kyasia Vafarisayo valya na vaana va mitisiṛie vakamwuṛa: Naamu ki ili vanalosho vafo kitaare vakee isoṛa milimu ya vakuuku naań? Na ilya vakalya shoonga na maako a kiṛinda. 6Nae kavaia: Yesaya aauya kisha kisumani neeni ini vamakavili, sheeli kyatisiṛwa: ”Vandu va vakee ishiitikisa na fiṛomu da, kake mirima yawo ikee kwaasha nań. 7Wo vakee ishaarafuma kya ruu veeloshaa miloshie ya mavavaso a kivandu“. 8Ini mukee itia ivavaso lya Iṛuva mukawara milimu ya kivandu. 9Kavaia: Nkuro kikai: Ivavaso lya Iṛuva llyo mwali fuluta, amu mumakii iringa milimu yanu. 10Amu Mose anumbua: India ndeo na maa, na ulya ammaa ndee na mae afwe. 11Neeni mukanumbua: Nndu kammaa iia ndee ana mae kurubani (nkimwi sheeli kyaio̱: Ifo mwiwariaa kwakwa fa imweleka, nammaa ifirwaa five nsimbika wa Iṛuva) 12mukimwotoṛaa atanie ndee ana mae kindo ndi. 13Mukaaṛua kirero kya Iṛuva sha kindo kya dua kiimba kya mifundie ilya yanu munderewa wakuuku mukaifitia vandu. Lingi mukatana findo fiingi fivakani nafo.
14Kavaanga lingi isyamu lia lindekusandia io akai kavaia: Shaaranyiń mu woose na imanya! 15Kiifo kindo kikee kiwooṛo ya nndu kikaaka neefo karikari kimakii imwaṛua nkasha ndi. Kake kilya kyukaa kari kamwi nkyo kimwaṛuaa nkasha. 16Ulya awore marwi a yaranya aaranye!
17Neeli andeaka numba, karea-wo isyamu lia. Na vanalosho vamwi vakamwuṛa mboni ta sumu ilya. 18Kavaia: Amu neeni muwore nta uṛango se? Mwishi se sheeli kindo kyoose kikee kiwooṛo ya nndu kikamwaka, kimakii inniinga ukasha ndi. 19Amu kimwakaa nrimiń ndi, kake ndewuń da. Kikauka-fo kikaenda iriniń. Neeli arera kuro, aaṛua shoonga toose tikava shinuru. 20Kanumbua: Kilya kikee yuka nnduń nkyo kikee iniinga nndu ukasha. 21Amu ifo mirimiń ya vandu mfo aukaa makusaṛo makasha na waaisi 22na unini na iwaa na yaaika na ilanga ikasha na nkuru na ntambwe na ureti na iiria iriso na firumu na ikuṅinisa na utondo. 23Ifi foose fikee fikasha fuukie kari, nafo mfo fikee iniinga nndu ukasha.
24Kakwimboo ifo kaenda kafika miyanuń ya Tiro na Sidon. Kaaka numba kafura kitamanyike ni nndu. Kake andemakii ikufisa ndi. 25Amu lia eni nndu nka, eeworee mwana wamwi wa kika aworwa mmumuyo nkasha, kaita mboni tamwi kasha nafo kawwoya marendeń amwi. 26Na nka ulya eekee Ngiriki aukye Foinike ya kulya Siria. Kantereva amu aumbute mumuyo ulya nkasha uuke mwana ulya wamwi. 27Nae kamwia: Tia vana vawuure mbele! Amu nkisha isoka vana shoonga na yeeṛia makite ndi. 28Nae kaaṛua kamwia: Ee Nndumi, na akwaa mmakite akee kwa si ya kiraa kya iliya alyee fibeṛeshu filya fisaa fa vana. 29Llyo amwia: Kiimba kya kirero kyo kwendie! Mwana wafo ammaa yukwa mmumuyo nkasha. 30Kaenda kyeń kwamwi kakooya mwana ulya aaṛie kiraań na mumuyo ulya nkasha wammaa imwuka.
31Yesu kauka kulya miyanuń ya Tiro eeiraa urukeń lwa Sidon. Kafika nruveń ilya ya Galilaya alya muungoń wa miri ikumi. 32Mfo vandu vamwendee nndu afiye marwi na uṛoo lwamwi nalo lwifiyee kutu. Vakantereva amwekeṛie uko lwamwi. 33Nae kallakanisa na vandu wo kanrwaa kyaanya kyamwi. Llyo anrwaya inini marwiń amwi kamisha mare kabaana ulumi lwa nndu ulya. 34Kalla na ule iṛuvewu kadia eemwiaa: Efata! Nkimwi na: Taṛambuka! 35Lia eni marwi a nndu ulya akaruuka na ulumi lwamwi lukatambashuka, kabooka irera kisumani. 36Na Yesu kavaima veeongoyaa vandu vengi. Kake ye aengeṛia ivaima, nawo vakaengeṛia ikwanisa. 37Vakariika koṛoń veenumbuaa: Anshiisa foose deń. Valya vafu marwi avaaṛua vaite na vafu uṛoo avaaṛua varere.
Currently Selected:
Mariko 7: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
