Mariko 16
16
1Kyasia ili nkonu wa Sabato undemaa iira, llyo Maria wa kulya Magidala na Maria mae wa Yakobo na Salome vakandeuṛa mafura a kisaamu a indemwamba. 2Na nkonu wa mbele ngama kio vakakwimboo vakafika mbangeń ili kundetaṛakana. 3Vakakurera wo veni na veni vakanumbua: Ni i andetibiṛingitiaa-wo iwe lia liraye mbanga? 4Ili vandella, vakakooya iwe ni ibiṛingite-wo, amu likee inini nnu. 5Ili vandeaka mbangeń, vakalolia mwana nkoo akee rembo io taari ya uko usha aṛee miseto myelwa fyu. Vakaawukwa mmuu. 6Nae kavaia: Manya mutaawukwa mmuu! Mukee iṛuya Yesu wa Nasareti ulya andekabio̱ nsalabeń. Akiifo ia ndi, anduka. Lleń te alya veemwaṛiee. 7Neeni endeń mundeia vanalosho vamwi na Petiro, sheeli amwiriaa mbele yenda Galilaya. Ifo mfo mundelloliaa sha lia amuia. 8Vakasomuka mbangeń veenshaa, fulya veeworwaa wweṛei na utaṛawu, nta iia nndu kindo, fulya veeṛee nnu.
9Ili Yesu andemaa iṛuka ngama kio ya nkonu wa mbele usoṛie Sabato, kakworusa lya mbele Maria Magidalena, ni ulya amwuta mimuyo ilya mikasha mfungare iiwworee. 10Nae kaenda kandeongoya valya veekee andu emwi na Yesu veeishiṛaa na iiya. 11Neeli vandeita sheeli eefo na muu na ilolio̱ yye, nta imwirikia. 12Numa yayo kakworusa vaaroe vengi vavili kwa fwana ingi. Nawo vairiee shia ya yenda nremiń. 13Nawo vakaenda vakandeongoya vaaroe valya vengi, nta nawo ivairikia. 14Lya ifurumia Yesu kakworusa vaseṛo vamwi valya ikumi na umwi ili veelyaa shoonga. Kavakandara, fulya ikusura lyawo likee yaangu na ngoo tawo tikee shuumu, fulya valea iirikia valya vallolia, ili aṛuka kwa vafu. 15Kavaia: Endeń masangeń woose mundelosha vandu woose mboni shinuru ta ivakiṛa. 16Na ulya woose akusuraa Iṛuva na ibatiswa, ito akiṛwaa, na ulya atankusuraa aumisio̱o̱ amamie. 17Na myorusie ilya ya finya ilunganaa na valya vakusuraa yyo ii: Na irina lyakwa vaumbutaa mimuyo mikasha, vareraa na mirerie miiya. 18Vaimboo shoka na maako. Na kwakooya vanwaa kindo kifisie kya ivawaa, kivakasheesaa ndi. Vaekeṛiaa vandu valole maako nawo vakiaa.
19Kyasia ili Nndumi andemaa irera nawo kuri, kasaamiswa iṛuvewu kakaa rembo taari ya uko usha lwa Iṛuva. 20Na vaseṛo vamwi vakaenda vakakwanisa mboni shinuru ta Iṛuva koose. Na Nndumi katana mashoṛa andu emwi nawo kakaarisa firero filya fawo na myorusie ilya ya finya iilunganii nawo.
Currently Selected:
Mariko 16: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
