Mitanie ya varumi 24
24
1Numa ya mikonu iraanu nkohani nnini Anania kainama I ariani na vasuṛi kiindi na nreri umwi irina lyamwi nTeritulo. Nawo vakaongoya mwitoṛo uu mboni ta Paulo. 2Nae ili andevaangwa, Teritulo kabooka indiinga eenumbuaa: 3Kwa finya yafo, nndumi Felikisi, tikooya unambwe nnu na kwa ulla lwafo uṛiti lu lweru lwansongosio̱ findo finuru fiingi. Ifi foose tafiwaria na ikwaana nnu na kundo koose. 4Kake amu ntakutuṛue mmwasi nakutereva kutiaranye firero feru faangu na uwoo lwafo. 5Amu tallolia nndu uu wwa myaandu kava mubooka ikuria myaandu kari ka Vayuda woose isangeń. Lingi ni nrwe wa kyama kya Vanasareti. 6Na lingi andeelelia iniinga numba ya Iṛuva nsindaṛa. Llyo tiwwara tikafura imwumisia kisumani na uvavaso lweru. 7Kake nshili nnini Lisia kafika-fo kamwuta maakoń eru na finya. 8Kavavasa valya vandendiinga vashe kwafo. Iwe ku muni kwa isokodasokoda kumakii ikooya mboni ta findo filya tikee indiingia. 9Vayuda nawo vakakaarisa firero famwi veenumbuaa sheeli nkuro da kikai.
10Neeli mwitoṛo andentukia uko amu arere, Paulo kaaṛua: Fulya niishi sheeli iwe kukee mfukya fikwena fa uṛiti lu kyeeri kya myaka miingi, nkee ikukabania kyakwa shi muni na nrima wa ifura. 11Amu kumakii imanya sheeli nta yamiira mmwasi wa mikonu ikumi na ivili ninrwa Yerusalemu indetereva Iṛuva ndi. 12Vandu va nta vashilolia ifo numba ya Iṛuva niireraa na nndu ana niitanaa kindo kya usanduru ifo isyamuń ana nta ifo numba ta iterevia ana ifo muṛiń ndi. 13Ana nta vamakii yawutia findo fo vakee ishiṛiinga nafo alli ndi. 14Kake kirero ki nkee irambua kwafo na baa sheeli shia ilya vakee ivaanga ya kyama yyo yakwa nkee iṛundia nayo Iṛuva wa vaande yeru niikusuraa filya foose fikee fitisiṛe uvavasoń na ifo fitabuń fa vaauya fisuku. 15Noore ikusura nkusurie nalyo Iṛuva sheeli livaa iṛuka lya vafu lya valya vasumani na lya valya vatakee vasumani, na akwaa ni iwo nawo valiveree. 16Nkyo kikangio nakwishivisa vve na nrima utawore ilomi mbele ya Iṛuva na mbele ya vandu mikonu yoose. 17Numa ya myaka miingi namfika nrwaye vandu va uṛiti lwakwa misimbika na miniingie. 18Vakashilolia numbeń ya Iṛuva niiatarikaa na findo fi nkee mwilise. Nań niiworee kikwena ana nta kiṛoṛongyo ndi. 19Kake valya vandeshilolia-fo nkinga kya Vayuda vaukie Asia. Iwo wwo kyeewwaraa vave ia mbele yafo na ishiṛiinga, kwakooya vawore kirero kiimba kyakwa. 20Ana vandu va veni vaiyo varere ukasha vandellolia lia nndesalala ifo kikweniń kyawo, 21kitaare nkiimba kya ununga ilu lumwi nndelurera ili nselele karikari kawo na inumbua: Kiimba kya iṛuka lya vafu nkyo nkee yumisio̱ mbele yanu nnu.
22Kyasia Felikisi kavaverisa, fulya eeishii mboni ya shia ilya kisumani deń kanumbua: Lisia nshili ulya nnini wa vasikari ili ainamaa na kunu mfukyaa firero fanu. 23Kavavasa nshili umwi sheeli Paulo aringwa. Kake ave na mwaanya, ana ataimi nta umwi wa ndoo tamwi veendundiaa.
24Yamiira mikonu kiindi Felikisi kasha ariani na nka wamwi Durusila akee nka Muyuda. Kavaanga Paulo kamwaranya eereraa kya ikusura Kristo Yesu. 25Neeli Paulo eekee yongoya mboni ta usumani na ta iiwukana na milangie na ta uumisio lushaa, Felikisi kasavaa kanumbua: Alli kukwendie, nań nankooya mwaanya nkuvaangaa lingi. 26Andu emwi na ifo eeveree sheeli aniingwa fesa mPaulo amu amboṛomue. Nkyo kiteveto kawaanga keengi kakaba usaṛe nae. 27Ili indesia myaka ivili Porikio Festo kawaria ushili andu a Felikisi. Na Felikisi eekundiee isenya Vayuda karea Paulo kifingioń.
Currently Selected:
Mitanie ya varumi 24: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
