Lukasi 7
7
1Aho wayimalaga mihayo yakwe yose hambele na matwi ga vanhu, wingilaga mu Kapernaumu.
2Na mukumba wa mutwale mbati wavagi mulwile na bihi na kufwa, na uyu wavagi mutoneke wamwa gukuye. 3Na aho wigagwa mhola kunguno yamwa Yesu, wavatumizaja vanamhala va Vayahudi kuwakwe kukamulomba ize na amupizye mukumba wakwe. 4Alisi aho ava vafikaga kumwa Yesu vamwigongelaga muno, vuhaya, Uyu alisika isima veve umuvezezye yeniyi, kwisi alitutogwa kwigongo liswe na watuzengelaga sinagogo. 5Na Yesu wajaga navo. 6Alisi aho wayegelezaja numba, mutwale wavatumizaja vanwaniye, alihaya, 7Guku, uleke kwiducha, kwisi nkasikile isima veve wingile hansilili na vukumbo wane, kunguno navonaga mwenekili ati nkasikile isima kwiza kuwako, alisi uyombe muhayo gumo duhu, na mukumba wane akupila. 8Kwisi nene mwene ndi munhu watulagwa hansilili na vukovozi, na ndi navo hansilili na nene valugaluga, na ndimuwila uyu, Jaga, nawe uja, na ungi, Nzugu, nawe uwiza, na mukumba wane, Uyite yeniyi, nawe uyita. 9Aho Yesu wayigagwa yeniyi wamukumizaja na wavikevelaga avo vangi vamulondaga, uhaya, Ndimuwila inwe ati mugati nʼIsraeli nkaliwine isanizyo lyenili ihanya. 10Na aho venavo vatumizivilwe vasyokaga ku numba, vamusangaga mukumba wapilile.
11Na haho yakwilaga Yesu wingilaga mu kaya, lina lyayo Naini, na vahemba vakwe vingi vamulondaga hamohene na mbuto nhanya ya vanhu. 12Na aho wagwegelaga muvita gwa kaya, lolaga, mufu wavagi alifumiwa hanze, wavagi mwana umo inene duhu kumwa nina, homwene wavagi musimbe, na vanhu vingi va mukaya vavagi hamohene nawe. 13Na aho 14Guku wamuvonaga wavagi na lusungu kuwakwe, na wamuwilaga, Kuduhu ulile! Na wegelaga bihi na walikumaja isanduku, na ava valisombaga vimaga, na 15wahaya, Musumba, ndikuwila uvuke! Na mufu wavukaga na wavukizaja kuyomba, na Yesu wamupaga nina. 16Na kogoha kwavadimaga vose, na vamukumukaja Mulungu, vuhaya, Mufumbuzi muhanya wavukile mugati niswe, na Mulungu wavilolelaga vanhu vakwe. 17Na mhola yeniyi kunguno yakwe yasambalaga mu Uyahudi vose na mu magunguli gose ga bihi.
18Na vahemba vamwa Yohana vamuletelaga mhola ya gose genaya. 19Na Yohana wavitanaga vavili va vahemba vakwe na wavatumizaja kumwa Yesu vamuvuzye, Hoveve uli mwenuyu alize, ninga tumulindile 20ungi? Aho vagosya vafikaga hawakwe, vuhaya, Yohana Moja watutumaga kuwako na alihaya, Hoveve 21uli mwenuyu alize, ninga tumulindile ungi? Na mwitungo lyenilo wavapizaja vingi mavulwile gavo na mavulema na migavo mivi, na wavapaga vahofu vingi vavone hangi. 22Na witavukaga na wavawila, Jagi, mukamutanizye Yohana genaya mwagavonaga na mwagigagwa: vahofu valivona hangi, valema valisimiza, va mbizi valipiziwa, vakiva matwi valigwa, vafu valihembukiwa, vapina valitaniziwa Mhola ya Chelu. 23Na welukilwa homwene akavile kungayilizya nene.
24Alisi aho vatumwa vamwa Yohana vafumagako, wavukizaja kuvawila mbuto ya vanhu kunguno yamwa Yohana. Mwafumage kuja kwibalangu kukilolelaki? 25Idete lilihungeziwa na muyaga? Ninga mwafumage kuja kukavonaki? Munhu azwalile myenda mikondu? Lolagi, avo valizwala myenda ya lukumo na valilya filunge valimo mu manumba ga vatemi. 26Alisi mwafumage kukavonaki? Mufumbuzi? Ahene, ndimuwila inwe, 27homwene alimukila mufumbuzi. Kwisi uyu ali mwenuyu yitonilwe kunguno yakwe,
Lolaga ndimutuma mutumwa wane hambele na vusyu wako,
Homwene akuyigelanizya nzila yako hambele naʼho.
28Ndimuwila inwe ati mugati navo vavyalilwe na vakima kuduhu mufumbuzi muhanya kukila Yohana; alisi homwene ali mudo muno mu vutemi wa Mulungu ali muhanya kukila mwenuyu. 29Na vanhu vose na vʼihongo, aho vamwigagwa, vavuzumaja vugolozi wa Mulungu, kwisi vogivagwa na kogiwa kwamwa Yohana. 30Alisi Vafarisayo na vamanicha ngʼhama vakingaja kikowa cha Mulungu kuwavo, kwisi vakogivilwe nawe. 31Navikolanizye naki vanhu va vuvyalwa wenuvu, na 32valimwikola nani? Valivikola vana hovene valikala hʼigulilo na valiwiyitana na valiyomba, Twamufulilaga inwe filimbi na mukanegulile; twalilaga makungwi na mukalilile. 33Kwisi Yohana Moja wizaga, akalile mukate na akanwile mvinyo na muliyomba, Ali na mugavo. 34Mwana wa Munhu wizaga alilya na alinwa, na muliyomba, Lolaga, mwenuyu wa kalya na munwi wa 35mvinyo, munwani wa vʼihongo na vakenaguzi. Alisi ngelo yiligololwa na vana vayo vose.
36Na umo wa Vafarisayo wamulombaga alye hamohene nawe, na uyu wingilaga mu numba ya Mufarisayo na wikalaga hakulila. 37Na lolaga, wavagiho mukima mu kaya, mukenaguzi. Na aho wamanikaja ati Yesu alikala hakulila mu numba ya Mufarisayo, waletaga nsupa ya alabastro yokalile mugazu, na wimaga hanuma yakwe ha magulu gakwe alilila, 38na wavukizaja kumutonyekezya minsozi ku magulu gakwe, na wagapyagulaga na nzwili zya ku mutwe gwakwe, na waganonelaga na wagavilaga magulu gakwe na mugazu. 39Alisi aho Mufarisayo, homwene wamwitanaga, wayivonaga, wayombaga mu moyo gwakwe, wahaya, Ulu mbe mwenuyu wavagi mufumbuzi, mbe wamanikaja ali nani na wa mutindo ki mukima mwenuyu homwene 40alimukumya, ati ali mukenaguzi. Na witavukaga na wamuwila, Simoni, ndi na muhayo gwa kukuwila. Na 41uyu wayombaga, Muhembeki, yombaga! Mukopesya wavagi navo vatondwa vavili, umo watondagwa madenari magana atano, 42na ungi makumi atano. Alisi aho vavagi vakavile nago ga kumulipa, wavatondolaga vose vavili. Nani mugati navo akumutogwa muno? 43Simoni witavukaga, uhaya, Ndiganika mwenuyu homwene wamutondolaga mingi. 44Yesu wamuwila, Veve wayangulaga sisoga. Na wamwikevelaga mukima, wamuwilaga Simoni, Ulimuvona mukima mwenuyu? Ningilaga mu numba yako na ukampile minzi ku magulu gane, alisi uyu wantonyekezaja minsozi ku magulu gane na wagapyagulaga na nzwili zyakwe. 45Veve ukaninonelile, alisi uyu vukumbu ningilaga akoyile kuganonela magulu gane. 46Ukaguvilile mutwe gwane na maguta, alisi uyu wagavilaga magulu gane na mugazu. 47Kunguno yeniyi ndikuwila, mavukenaguzi gakwe mingi gatondolilwe, kwisi watogagwa kingi. Alisi homwene alitondolwa kido alitogwa hado. 48Na wamuwilaga 49mukima, Mavukenaguzi gako gatondolilwe. Na avo vavagi valikala hakulila hamohene nawe vavukizaja kuyomba mu myoyo yavo, Nani mwenuyu homwene 50alitondola mavukenaguzi? Alisi wamuwilaga mukima, Isanizyo lyako lyakupizaja, jaga na kuhola.
Currently Selected:
Lukasi 7: Nym51
Highlight
Share
Copy
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.