Lukasi 5
5
1Na yakwilaga aho vanhu vamufitaga mu kwigwa 2Muhayo gwa Mulungu, wimaga ha nguka ya nyanza Genezareti, na wagavonaga mawato avili gatulilwe ha nguka ya nyanza, alisi valovi valivafumagamo na vavagi valigusa mavukila gavo. 3Na aho wingilaga mu wato vumo, howene wavagi wamwa Simoni, wamulombaga asunegele hado kufuma ku nguka. Na wikalaga na kufuma mu wato wavahembekaga mbuto ya vanhu. 4Aho wamalaga kuyomba, wamuwila Simoni, Usunegele kusika ha vusihu wa minzi na mugaponezye mavukila ginwe kulova masomba. 5Na Simoni witavukaga, uhaya, Guku, twatumamaga vuziku pe na tukalovile kinhu, alisi ku muhayo gwako nkugaponezya mavukila. 6Na aho vitaga sisyo vagadimaja masomba mingi munogwene na mavukila gavo gatandukaga. 7Na vavapalizaja vichavo va mu wato vungi, vize vavagwasye. Na vizaga na vagokazaja mawato gose avili, sisyo gendaga kunwivila. 8Alisi Simoni wavonaga genaya, wagwaga ha magulu gamwa Yesu na wayombaga, Ufume kuwane, Guku, kwisi ndi munhu mukenaguzi. 9Kwisi kukumya kwamudimaga na viye vose kunguno ya vulovi wa masomba mingi hogene vagadimaja, 10na hangi savasava Yakobo na Yohana, vana vamwa Zebedayo, hovene vavagi viye vamwa Simoni. Na Yesu wamuwilaga Simoni, Uleke kogoha, kufuma lelo ukuvi mulovi wa vanhu. 11Na aho vamalaga kugaleta mawato ha nguka vagalekaga gose na vamulondaga.
12Na yakwilaga aho wavagimo mu kaya yimo, lolaga, wavagiho munhu ali na mbizi muvili gose, na aho wamuvonaga Yesu wakundamaga ha vusyu wakwe na wamulombaga, uhaya, Guku, ulu ulikova ulikovola kunezya. 13Na Yesu wagololaga kukono kwakwe na wamukumaja, 14wahaya, Ndikova, wele. Na itungo lili mbizi zyamufumaga. Na wamulagilaga aleke kumuwila umo, sumbwa uje ukiyoleche ku muhozya na ufumye mhezi ku kupiziwa kwako, kitisi Mose walagilaga, yive vusangilwaho kuwavo. 15Alisi mhola yakwe yasambalaga kingi munogwene, na vanhu vingi vivilingaga kumwigwa na kupiziwa mavulwile gavo. 16Alisi uyu wisundaga na wajaga mwibalangu na walombaga.
17Na yakwilaga lusiku lumo aho wavagi alihembeka, Vafarisayo na vamanicha ngʼhama vavagi valikala henaho, hovene vafumaga ku makaya ga Galilaya na Uyahudi na ku Yerusalema, na nguzu zya Mulungu zya kupizya zyavagiho. 18Na lolaga, vagosya vamuletaga ku vulili munhu walemala, na vakovaga kumwingizya mugati na kumutula hambele nawe. 19Na aho vakahawine hakumwingizya kunguno ya mbuto ya vanhu, valinaga ku mudaka na hagati na matofali vamwingizaja mugati hamohene na vulili wakwe hambele na Yesu. 20Na aho waluvonaga luhigi lwavo, wahaya, Mwichane, mavukenaguzi gako gatondolilwe. 21Na vamanicha fitabu na Vafarisayo vavukizaja kwitozya mu myoyo na vayombaga, Nani mwenuyu homwene aliyomba mafusano? Nani alikovola. kutondola mavukenaguzi sumbwa Mulungu inene? 22Alisi aho Yesu wagamanikaja miganiko gavo, witavukaga na wahaya, 23Muliganikaki mu myoyo yinwe? Muhayo ki mubuhu kuyomba, Mavukenaguzi gako gatondolilwe, ninga kuyomba, 24Uvuke na usimize? Alisi kigele mumaniche ati Mwana wa munhu ali na vukovozi kugatondola mavukenaguzi mu liwelelo, wamuwilaga mulema, Ndikuwila, uvuke na uvuche vulili wako na uje ku numba yako. 25Na itungo lili wavukaga hambele navo, wakivukaja icho walalilaga, na wajaga ku numba yakwe alimugongola Mulungu. 26Na kukumya kuhanya kwavadimaga vose, na vamugongolaga Mulungu na vokalaga na kogoha na vayombaga, Lelo twakiwine cha kukumya.
27Na hanuma na genaya wafumaga na wamuvonaga wʼihongo, lina lyakwe Lefi, ikalile hʼihongo, na wamuwilaga, 28Undonde! Na wagalekaga gose na wamulondaga. 29Na Lefi wamuvezezaja mayeye mahanya mu numba yakwe, vʼihongo vingi na vangi hovene vikalaga hakulila hamohene nawe. 30Na Vafarisayo na vamanicha fitabu vavo vavingʼungʼulilaga vahemba vakwe na vayombaga, Kuki inwe mulilya na kunwa hamohene na vʼihongo na vakenaguzi? 31Na Yesu witavukaga na wavawila, Vapanga vakafundile mufumu, sumbwa vasatu. 32Nene nkizile kuvitana vagololoku vapiluke moyo, sumbwa vakenaguzi.
33Na vamuwilaga, Vahemba vamwa Yohana valifunga na kulomba kingi, na sisyo savasava Vafarisayo vene, alisi vahemba vako valilya na valinwa. 34Alisi Yesu wavawilaga, Mulikovola kuvakungilizya viye va mutozi kufunga, kungi mutozi atali ali hamohene navo? 35Alisi nsiku zikwiza aho mutozi akwingiwa kuwavo, haho valafunge mu nsiku zyenizyo. 36Na wavawilaga mukolani, Kuduhu munhu alitandula kilaka ku mwenda mupya na kukisumilizya ku mwenda mulala, ulu alita sisyo aligutandula ugo mupya, na kilaka cha 37mwenda mupya kugelanila ngʼo ku ugo mulala. Na kuduhu munhu akuditilaga mvinyo mpya mu mbogolo zya kale, ulu alita sisyo mvinyo mpya yikuzitandula mbogolo na yikuseseka na mbogolo zikuvipa, kolaga mvinyo mpya yiditilwe mu mbogolo mpya. 38Na kuduhu munhu homwene wanwaga mvinyo ya kale akuyitamanilwa mpya, 39kwisi akuyomba, Iyo ya kale yilonsoga.
Currently Selected:
Lukasi 5: Nym51
Highlight
Share
Copy
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.