Yohana 13
13
1Hambele na sikukulu ya Pasaka aho Yesu wamanikaja ati, itungo lyakwe lyafikaga afume ku liwelelo lyenili kuja kumwa Vava, kitisi wavatogagwa vanhu vakwe vavagimo mu liwelelo, sisyo wavatogagwa kusika ha mhelo. 2Na mwitungo lya chakulya cha mhindi, aho Shetani wamalaga kwingizya mu moyo gwamwa Yudasi, mwana Simoni Iskariote, malome ga 3kumugamba, na Yesu amanikizye ati Vava wamupaga gose mu makono gakwe, na ati wafumile kumwa Mulungu na ajile hangi kumwa Mulungu, 4alivuka hakulila na alizula nhanzo yakwe, wasolaga kitambala na winyepaga mwenekili. 5Haho aliditila minzi mwibakuli na wavukizaja kugagusa magulu ga vahemba vakwe na kugasyutula na kitambala hochene winyepaga nacho. 6Aho alifika kumwa Simoni Petro, uyu wamuwilaga, Guku, veve uligusa magula gane? 7Yesu witavukaga, umuwila, Cheniki ndivezya ukamanikizye lelo, alisi ulakimaniche haho. 8Petro alimuwila, Veve kungusa ngʼo magulu gane kusika hanahana. Yesu wamwitavukaga, Ulu nkavile kukugusa, veve ukavile na lusangi na nene. 9Simoni Petro wamuwilaga, Guku ngʼo magulu gane duhu, sumbwa na makono na mutwe gwene. 10Yesu wamuwila, Homwene wogivilwe akafundile hangi kuguswa sumbwa magulu duhu, alisi welaga vuliko; 11na inwe mwelaga, alisi ngʼo vose. Kwisi wamumanikaja uyo mugambi wakwe; kunguno yeniyi wayombaga, Inwe mukelile vose.
12Aho wamalaga kugusa magulu gavo, wazwalaga myenda yakwe, wikalaga hangi na wavawilaga, Mulimanicha cheniki namuvezezaja inwe? 13Inwe mulinitana nene Muhembeki na Guku, na muliyomba sisoga, kwisi nene ndi mwenuyu. 14Haho ulu nene Guku na Muhembeki nagagusile magulu ginwe, yilimudima inwe vene kwigusa magulu. 15Kwisi navolekizye inwe lumeho, kigele inwe muvezye kitisi namuvezezizye inwe. 16Yalole, yalole ndimuwila inwe, mukumba akavile muhanya kukila gukuye, na mutumiziwa akavile muhanya kukila uyo wamutumizaja. 17Ulu muliyimanicha yeniyi, mwelukilwa inwe ulu muliyivezya yeniyi. 18Nkavile kuyomba sisyo kunguno yinwe vose; ndivamanicha avo navasogolile; alisi kigele vutone vufikile, Homwene alilya mukate hamohene na nene wambukizaja kisinzila chakwe. 19Lelo ndimuwila inwe yitali kukwila, kigele musanizye ulu yakwila ati nene ndi mwenuyu. 20Yalole, yalole ndimuwila inwe, homwene alimwanukula uyu ndimutumizya nene, mwenuyu alinanukula nene; alisi homwene alinanukula nene alimwanukula mwenuyo wantumizaja nene.
21Aho Yesu wayombaga genaya watinginivilwe mu Roho na wasangilagwa, uhaya, Yalole, yalole ndimuwila Inwe ati, umo mugati ninwe akungamba nene. 22Na vahemba vilolaga na visusihanaja kunguno yamwa nani aliyomba sisyo. 23Umo wa vahemba vakwe wasendamilaga ha kikuva chamwa Yesu, uyo Yesu amutogilwe. 24Haho Simoni Petro wamupalizaja mwenuyo 25amuvuzye, Ali nani alimuyomba. Haho mwenuyo wasendamilaga ha kikuva chamwa Yesu wamuvuzaja, ali nani mwenuyu? 26Yesu witavukaga, Homwene ndimukozezya itonge na kumupa. Na walikozaja itonge na alimupa Yudasi, mwana Simoni Iskariote. Na hanuma na itonge Shetani wingilaga muwakwe. 27Na Yesu wamuwilaga, Cheniki veve ulita, wite wanguwangu. 28Alisi kuduhu umo wa venavo vikalaga hakulila wamanikaja ngunoki wamuwilaga yeniyi; 29kwisi vamo viganikaga ati, kunguno Yudasi wagusombaga mufuko gwa mapesa, Yesu wamuwilaga, Gulaga cheniki tulikifunda ha sikukulu, ninga avape vapina kinhu kimo. 30Aho wamalaga kulisola itonge, wafumaga hanze itungo lyenilo; alisi wavagi vuziku.
31Aho uyo wafumaga Yesu alihaya, Lelo Mwana wa Munhu wakumukivagwa, na Mulungu wakumukivagwa mugati nawe. Ulu Mulungu wakumukivagwa mugati nawe, Mulungu mwene akumukumucha mugati nawe 32mwenekili, na akumukumucha itungo lili. Vana, katungo kado duhu ndiho mugati ninwe; inwe mukunkova, 33na kitisi navawilile Vayahudi, Uko nene ndija inwe mukakovolile kufikako, sisyo savasava ndimuwila inwe. Ndimupa inwe mukumo mupya, inwe mwitogwe hamohene, kitisi nene namutogilwe, sisyo sisyene inwe mwitogwe. 34Mwenumo vose vakumanicha ati inwe muli vahemba vane, ulu muli nako kwitogwa.
35Simoni Petro wamuwilaga, Guku, ulija kuhe? Yesu witavukaga, Uko ndija nene ukakovolile kundonda lelo alisi ulandonde haho. 36Petro wamuwilaga, Guku, kuki nkakovolile kukulonda lelo? Nkuyipana myuye yane kunguno yako. 37Yesu witavukaga, Kinahe, ukuyipana myuye yako kunguno yane? Yalole, yalole 38ndikuwila veve ati, ikungulume kuhila ngʼo kusika wamalaga kunkana kadatu.
Currently Selected:
Yohana 13: Nym51
Highlight
Share
Copy
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.