Vagalatia 5
5
1Kristo watukomolaga tuve vanamiko; kunguno yeniyi mujame na muleke kutungwa hangi mu kifungo cha vusese. 2Lolagi, nene Paulo ndimuwila inwe ati, ulu mulitahiriwa, Kristo akavile kumuvelela inwe kinhu kimo. 3Hangi ndisangilwa hambele na kila umo homwene alitahiriwa ati, alitondwa kuyimazya ngʼhama yose. 4Inwe mwingikaga hamwa Kristo, inwe hovene mulikova kupiwa vugololoku mugati na ngʼhama, inwe mwingikaga ku kisa. 5Kwisi iswe mugati na Roho tulililindila isigizyo lyenili ati, tukupiwa vugololoku mugati na kusanizya. 6Kwisi mugati na Kristo kutahiriwa ninga kuleka kutahiriwa kukakovolile kinhu, sumbwa isanizyo holyene lilitumama mugati na kutogwa. 7Inwe mwagangadikile sisoga, nani wamuhangilizaja kuyidonhoka hanayene? 8Kwibembelezya kwenuku kukafumile ku mwenuyo homwene wamwitanile inwe. 9Itumbyo lilitumbya itonge lyose. 10Ndi na isanizyo lyenili kuwinwe mugati na Guku ati, inwe mukuleka kuloma masala gangi; alisi homwene alimutavanya inwe akupiwa luduko lwakwe. 11Alisi nene vadugu, ulu ntali nditanizya vutahiriwa, kuki ntali ndidukiwa? haho kugayilizya kwa musigiti kwamalaga kwingiwaho. 12Yavelaga ninga vigulazye venekili hovene valimutavanya inwe!
13Kwisi inwe vadugu mwitanilwe muve vanamiko, alisi muleke kuvutumila vunamiko mu kuvukuzya wivonya wa muvili, sumbwa mwitumamile hamohene mugati na kutogwa. 14Kwisi ngʼhama yose yilimaziwa mugati na muhayo gumo, nago guli gwenugu;
Umutogwe muzenganwa wako kitisi uliwitogwa veve mwenekili.
15Alisi ulu muliwiluma na muliwilya ungi ku ungi, mwikomye muleke kwimila ungi ku ungi.
16Alisi ndiyomba: musimize mugati na Roho, haho 17inwe kuvumazya ngʼo wivonya wa muvili; kwisi muvili gulitamanilwa kumulasa Roho, na Roho aligulasa muvili, kwisi zyenizi ivili zililasana, sisyo mukakovolile kwita genaya mulikova. 18Alisi ulu inwe mulitongwa 19na Roho, haho mukavile hansilili na ngʼhama. Milimo ya muvili yiligela hape, kitisi: vulava, zoma, wivonya, 20kufisenga fimbulimbuli, vulogi, wanisi, wikenya, ivuva, 21kisila, nsika, vulekane, vutagane, kagomwe, vukozya vulanda walwa, na gangi gene ga mutindo gwenuyu; ndiyomba hagisi kitisi nayombaga kale ati, venavo 22valita genaya kusalika ngʼo vutemi wa Mulungu. Alisi fyenifi fili fisumo fya Roho: kutogwa, kudeha, kuhola, vulembezu, kigongo, vusoga, vujamu, vudekanu, wilengu; 23kuduhu ngʼhama kwigulya na genaya. 24Alisi venavo vali vamwa Kristo vagukomelile muvili ku musigiti hamohene na malome mavi na wivonya wago. 25Ulu tulizuvuka mu Roho, haho tusimize savasava mugati na Roho. 26Tuleke kulikova isima lya gele na kwigomela na kwivuvila umo ku ungi.
Currently Selected:
Vagalatia 5: Nym51
Highlight
Copy
Compare
Share
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.
