Imbombo zya Vapositili 21
21
Ukufuma mu-Mileti ukuvala ku-Tili
1Lwe twalehana navo, tuhandʼukujenda nimeli, tuhashulʼahinza ukufiha mu-Kosi, shandavi tuhafiha mu-Lodo. Ukufuma mumwo tuhafiha mu-Patala. 2Mwe tuhagʼimeli ye yihavalaga ku-Foyinike, mwe tuhayipashila, tuhashula. 3Ilelo lwe twalolʼinsungo ya Sipelesi, pe tuhayileha kumuhonʼumumongo, tuhajenda ukufiha mu-Sili, tuhafiha mu-Tili she mwe vahafumwaga amazigo ga mumeli. 4Ilelo lwe twavagʼavasundikwa, pe tuhizya navo amanda gasano nagavili. Ve vahayanga mwa Mupepo vahamuvuzyʼuPavuli vahati: Kwe ndali ukuzuva ukuvala mu-Yelusalemu. 5Ilelo lwe gasilʼamandʼaga kulinda mumwo pe tuhavuhʼukuvala. Avene nyene vahatusindishila vonti navantanda navana, vahatufumwa munkaya, pe tuhasugamila pansi kushipuma, tuhaputa. 6Ilelo pe tuhalagana navo. Iswe tuhayipashila mumeli, avene vahavwela kuhaya.
Ku-Kesaleya
7Tuhamalilizyʼukujenda mumeli ukufuma mu-Tili, tuhafiha mu-Putolomayi. Tuhavalamuhʼavamwitu, tuhalinda navo isiku lyoka. 8Shandavi tuhavuhʼukuvala mu-Kesaleya, mwe tuhinjila munyumba ya Filipu umukumusyi wa ntumʼinyinza, wʼali wamwavo wa vala vasanu navavili. Tuhadila mumwakwe. 9Amile navanʼavalindu vane avasitakusendwa. Ve vahakuvwaga. 10Ilelo lwe tudiliyʼamandʼaminji pupo, pʼahihʼukwinza kukwo umukuvwi woka wʼali wʼuAgabu izina wʼafumile mu-Yudayi. 11Atwinziyʼiswe, pʼahasendʼilamba lya Pavuli, ahayikunga muṿinama ninyove ahati: UMupepʼuMufinjile akuti: Umuhatilambʼili ṿwe valimuhonzya vovulo mu-Yelusalemu, inga pe vamuvishe kuvakunzi. 12Ilelo lwe viṿuye zinizi pe vahamulambilizya nkani, iswe navamumwo tuhati: Galushilaga, utahavale mu-Yelusalemu. 13UwenʼuPavuli ahamula ahati: Mukuhonzya vuli? Mukukuta shonu nukumṿunzʼumwoyo? Shʼine ntitisile kwe kukungwa kweka ndali, kwope nakwe kufwila mu-Yelusalemu pazyʼizina lya Mwene Yesu nitisilʼine. 14Ilelo lwe twaga agomile, pe tuhamuleha tuhati: ZyʼakasimʼuMwene zye zivombwaje.
Ku-Yelusalemu
15Amanda gala lwe gapitilila pe tuhayisenganya, tuhazuva ukuvala mu-Yelusalemu. 16Avasundikwa vamo ava mu-Kesaleya vajenzinye naswe. Vahatutwala kwa Munasoni uwa mu-Sipelesi wʼali musundikwa wope, ayanzite he hali we twadiliye kukwakwe.
17Lwe twafiha mu-Yelusalemu pʼavamwitu vahatuposhelʼahinza ukutusansamusya.
Umute wa Pavuli ukuvamanyanya avachilisiti avaYuda
18Shandavi lelo pʼuPavuli ahinjila kwa Yakobu poka naswe. Navasongo vonti valipo. 19Ilelo lwʼavalamuha pʼahavapempulila zyonti zyʼuMulungu ahavombelaga muvakunzi mula muvunyamata vwakwe. 20Avene lelo lwe viṿuye zyonti, pe vahamutimʼuMulungu, vahamuvuzyʼuPavuli vahati: Ukwenya nawe we wamwitu, avaYuda ve vitisile ukuti vinji nkani. Vonti vayikunguye kunkomelezyo zya Mose, vakuti pakuti tuzyimishe. 21Ilelo viṿuye nilya kuti vontʼavaYuda ve vasamiye muvakunzi mula, ukuvavuzyʼiwe ukuti mumuleshʼuMose navana vinyu mutavavolaje uvuvolwa, amiho ga vaYuda mutagalandataje. 22Amwe tuhonzye vuli lelo? Mwonti valiyiṿwa ukuti uyinzile. 23Ishi pʼuvombaje yiyo ye tukukuvuzyʼiswe. Tuli navantu vane panapa ve vali nimbombo ye valafile. 24Vʼuvasende lelʼiwe, uyizelufwe poka navo, uvalipile wenewe niṿwa kuvegulilʼinsisi. Pe vontʼavantu valimanya ukuti zyali zyʼilenga zye vakulonzile, ukuti ukulandila munkomelezyo nukuzilandata. 25Avene nyenʼavitisi ve vafumile muvakunzi ve twasimṿile twadumuye ukuti ye nyamʼimputile iya malungu, namavanda naye vabuzite, nuluvembu zye zizyo tuhavinda ukuti vazizile. 26Ilelo pʼuPavuli ahavasenda avantu vala shandavi, ahayizelufwa poka navo ahinjila mwa tempeli, ahataha amanda ga kuyizelufwa pe galisila inga pe vahatwalajʼimputile unʼiyakwe unʼiyakwe.
Ahapaka mu-Yelusalemu nukulemwa kwa Pavuli
27Ilelo lwʼamanda gasanu nagavili gala gandʼukusila, pʼavaYuda ve vafumile mw-Asiya vahamulola mwa tempeli, pe vahavahalambihʼavantu vonti vahamulemʼuwene. 28Vahapongomoha vahati: Mwe vana-Yisilayili imwe, mututule umuntʼuno we wuyo, wʼavantu vonti mwonti mwonti akutuvuzya ukuti valusufwajʼuluho lwitu ninkomelezyo, mpa vwelele. Ishi havili avinjizizyʼavaGiliki mwa tempeli nukuhandamanya pavufinjilʼipa. 29She vamuwenyi UTilofimo uwa mw-Efeso lwʼakujenda nawo munkaya. Vahati ngavanga UPavuli ayinjiye nawo mwa tempeli. 30Pʼinkaya yonti yihasambuha. Vahavunganʼavantu vonti, vahamulemʼuPavuli, vahamudendemulila kunzi kwa tempeli, vahigalilʼinyiji luvilo luvilo. 31Ilelʼavene lwe vakuti tumugoje, pʼumupiti wa vasikali ahiṿwa ukuti inkaya ya mu-Yelusalemu yonti yipezilʼahapaka. 32Uwene ahavavunganiha avasikali navalongozi vavo, ahashimbilʼukuvala pe vali, avene nyene lwe vamuwenyʼumupiti navasikali vakwe vahalehʼukumuhomʼuPavuli. 33Pʼumupiti wa vasikali ahafiha pe vali, ahamulema ahalajizya ukuti vamukunje namanyololo gavili, pʼahavavuzilizya ukuti wunanu wenewo havili atazile mulandu vuli? 34Avantu mumpuga vahazumʼahalanga, vamo vahayanga zimo, avamwavo vahayangʼizinji. Uwene lelo ahapotwʼukuzimanyinsanyʼahinza shʼahalanga halʼahapiti nkani, pʼahalajizyʼukuti atwalwaje mwilinga. 35Ilelo lwʼafisile pipanda lya mavwe aga kuzuvila pupo, pʼavasikali vahamunyatula shʼavantu vahalifile nkani. 36Shʼavantʼimpuga yonti ve valandite vahapongomoha vahati: Ukwo mumwefwe wenewo!
37Ilelo lwe vakuti vinjile nawo mwilinga, pʼuPavuli ahayanga numupiti wa vasikali ahati: Amwe nkuvuzyaje zimo? Uwenʼahati: Fwandi umanyilʼukuyangʼishiGiliki? 38Fwandi te we mwEgipiti ula wʼavusizyʼuvulugu mumanda ge gahapitilila, ula wʼavazile mulwugwa navantu vakwe 4000amapumaṿintu matupu? 39UwenʼuPavuli ahati: Ine ne muYuda, mfumile mu-Talisi, munsi ya mu-Kilikiya, ye nkayʼinkumusu ye tusamiye mumwʼiswe. Nkukulava ukuti injanje nimpuga ya vantu. 40Uwenʼahitiha. IlelʼuPavuli ahimilila pamwanya pipanda lya mavwe, ahavahandanizya numuhono avantu, pe vahapuma mwa. Ilelo pʼuwene ahayanga munjango yavo ya shiHebuli ahati:
Currently Selected:
Imbombo zya Vapositili 21: NYi1965
Highlight
Copy
Compare
Share
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
