Imbombo zya Vapositili 13
13
Ishivanza sha mu-Antiyokiya
1Ilelo mushivanza sha mw-Antiyokiya mwe vali navakuvwi navasambilizi; uBalinaba nuSimeyoni, we vahamutahaga nilya Nigeli, nuLukiyo uwa mu-Kileni nuManaheni, umusugwa poka nuHelodi umwene, nuSavuli. 2Ilelo lwe vakumwimbilʼuMwene nukufunga, pʼuMupepʼuMufinjile ahayanga ahati: Muvasavule uBalinaba nuSavuli, vambombelʼimbombo ye mbaseveye nzilʼine. 3Ilelo lwe vakufunga nukuputa pe vahavavihʼinyove inga pe vahavasogozya.
UBalinaba nuSavuli mu-Sipelesi
4Avene inza shʼuMupepʼuMufinjile avatumile vahiha ukuvala mu-Seloyikiya, mwe vahafuma ukulambʼusumbi ukuvala mu-Sipelesi. 5Lwe vafishe mu-Salami pe vahakumusyʼinongwa zya Mulungu mumasinagogi ga vaYuda. Vali nuYohani umutuli wavo. 6Vahapanguzyʼinsungo yonti, vahafiha mu-Pafu, mwe vahamwagʼumuntu umwelesi, umukuvwi wʼilenga, umu Yuda. Izina lyakwe ali uBali-Yesu. 7Wali kwa Seligi Pavuli umusungansi, umuntu wa njele. Wʼahavita nuBalinaba nuSavuli shʼasungwilwʼukwiṿwa Izwi lya Mulungu. 8UwenʼuYelima nyene lye likuti umwelesi ukuligalulʼizinʼili, ahalinga ukumugalusyʼumusungansi ukuti atahitishe. 9UwenʼuSavuli nyene, we wʼuPavuli, umwizula MupepʼuMufinjile ahamutontomela, 10ahayanga ahati: We mwizula shifumbo nuvuvivi vwontʼiwe, mwana wa Setano, we mulugu wa vugolosu vwonti, utakuleha ukuzezyʼamadala ga Mwene ge gagolosile? 11Yenya, umuhono wa Mwene akukwaga, kwʼuve we wantonko umusitakwenyʼizuva kumanda gamo. Pʼahamṿuve nishisi shihamugwila pe pala, ahapulumba ukulondolʼuwakumulemʼumuhono. 12Lwʼaziwenyi zinizi umusungansi, pʼahitiha shʼasukumiye insambilizyo zya Mwene.
Ku-Antiyokiya mu-Pisidiya: UPavuli akukumusya kuvaYuda
13Ukufuma mu-Pafu vonti ve vali nuPavuli vahalamba usumbi ukuvala mu-Pelige ya mu-Pamfiliya. NkandʼuYohani ahavaleha ukugaluha ku-Yelusalemu. 14Avene vahepa mu-Pelige vahapanguzya munsi, vahafiha mw-Antiyokiya ya mu-Pisidiya, vahinjila musinagogi pisiku lya sabati, vahatendama mumwo. 15Ilelo lwe vamazilʼukuvazya mwa kalata wa nkomelezyo nuwa vakuvwi, pʼavapiti va sinagogi vahatuma wumo uwakuyanga navo ahati: Mwe vamwitu inga muli nizwi limo ilya kuvatontelʼavantʼiva, mulyanje. 16PʼuPavuli ahavuha ahavahandanizya numuhono ahati: Mwe vayaya mwe va-Yisilayili namwe mukunyilʼuMulungu, tejelezyi. 17UMulungu wa luho lwa Yisilayili ulu, wʼavasavuyʼavatata vitu, ahalwimihʼuluhʼulu muvushintizi munsi ya mw-Egipiti, havili ahavusyʼumuhono wakwe ahavalongozya ukufuma mwenemwo, 18amaha amashumi gane ahavatontela mulwugwa. 19Ilelo lwʼazitupuyʼinkolo zisano nazivili munsi ya mu-Kanani, pʼahavapwanizya munsi yavo ukuti ivanje ya vupwano vwavo kumaha 450. 20Lwʼahonzizye vovulo ahavapa navalonzi ukufiha kwa Samweli umukuvwi. 21Pʼavene vahalavʼumwene, pʼuMulungu ahavapʼuSahuli umwana wa Kisi, umuntu wa luho lwa Benyamini, wʼahadila amaha amashumi gane. 22Ilelo lwʼamwefizye wununo, pʼahavimishilʼuDavidi ukuva wʼumwene wavo, wʼamutasile lwʼahatinji: ImwazilʼuDavidi umwana wa Yisayi, umuntu wʼahondeye Mumwoyo wane, wʼalivomba zyonti zyenga nkumulajizyʼine. 23Mumbeyu ya wununo mwe uMulungu ahavatumpushizyʼuMuposhi uYesu avana-Yisilayili, inza shʼafinzile navo. 24Wʼahaloleha lwʼuYohani atalisile ukuvakumusizyʼavana-Yisilayili ulwozyo lwa lupinduho. 25LwʼuYohani amakumalʼimbombo yakwe pʼahati: Imwe mukusiva mukuti ne nanu? Ine nte ne wuyo. Nkandi, yenyi, uwene akwinza mwisinda mumwane wʼine ntahondeye ukusatula indyato zya muṿinama ṿwakwe. 26Mwe vayaya mwe vamwitu, mwe vana va luho lwa Abulahamu nave vakumunyilʼuMulungu mumpuga yinyu, izwi lya vuposhi lyʼatutumiye sweneswe. 27She vala ve vasamiye mu-Yelusalemu navasongo vavo vatamanyile, gope namazwi ga vakuvwi ge gakuyangwa shima pisabati vatagamanyile, vahagalunjisya lwe vakumulonga. 28Nashenga vazile numʼumulandu uwa kumugojela vahalambilizya kwa Pilati ukuti amugoje. 29Lwe zyalunjiha zyonti zye zikumuyanga mwa kalata, pe vahamusatula pikwi, vahamuviha mumbipa. 30UwenʼuMulungu nyene ahamuzyusya kuvafwe. 31Pʼahavitushizyʼamandʼaminji vonti ve vafumile nawo mu-Galilayi ukuvala mu-Yelusalemu, ve ishi ve vahome vakwe kuvantu. 32Naswe she tuhonzizye, tukuvavuzya namwe ulumfingwi lwʼuMulungu afinzile navatata, 33ukuti ulu uMulungu avalunjisizyʼavana vitu lwʼamuzyusizyʼuYesu, inza she lilyo lisimvilwe mulwimbo lwa vuvili lye likuti:
We mwana wane iwe, nkupafile umusanyʼuno,
34ukuti amuzyusizye kuvafwe umusitakuvuyila kuvuvozu, inza shʼayanzile lwʼatili:
Ndivapʼimwe izya vufinjile vwa Davidi zye zitakugalunkana nalumo.
35Mwemumwo namulwamwavo akuti:
UMufinjile waho utaliyitiha ukuti amanyaje uvuvozu.
36Uwene nyenʼuDavidi lwʼavomṿile zizyo zyʼamutumilʼuMulungu pamaha gakwe pʼahakatʼutulo twa vufwe. Pe vahamuviha kuvayise, pe ahenyʼuvuvozu. 37Uwene nyenʼuno wʼuMulungu amuzyusizye wʼatahenyʼuvuvozu. 38Mwe vayaya mwe vamwitʼimwe, mumanyinsanye lelo ukuti muli wuyo tukuvakumusizyʼimwe uvuswila vwa malandu, nuvwa gonti ge gavaposite ukutashilwʼuvugolosu munkomelezyo zya Mose. 39Muli wuyo umuntu wonti wʼakwitiha akutashilwʼuvugolosu. 40Mwandaje lelʼimwe zitavinzilaje zye ziyanzilwe muvakuvwi zye zikuti,
41Mwenye mwe vasinganʼimwe, musukumile nukuvelenguha,
she ndivavombelʼimbombo mumanda ginyu, imbombo ye
mutaliyisajila nashenga wumo akuvapanjilʼahinza.
42Lwe vakwepa pʼavantu vahalambilizya ukuti vahavavuzyʼinongwa zinizi nohavili pisabati ilyamwavo. 43Ilelo lwe vasavaliye ava musinagogi pʼavaYuda avinji navinjizilwa ve vahamunyilagʼuMulungu vahamulandatʼuPavuli nuBalinaba. Pʼavene vahayangana navo vahavalambilizya ukuti vasyelemetele muvwila vwa Mulungu.
Avapositili vakuvasogolela avakunzi
44Ilelo pisabati ilyamwavo pʼavantʼavinji avamunkaya vahaswevuha ukuti viṿwʼizwi lya Mulungu. 45Avene nyenʼavaYuda lwe va wenyʼimpuga ya vantu, pe vahaṿitwa ukuvagulumwa, vahatupuzyʼamadali kumazwi ga Pavuli, vahamutona namatona. 46PʼuPavuli nuBalinaba vahavavuzya apazelu vahati: Twasinjilizilwa ukuti izwi lya Mulungu ntalisile ukuyangwa kumwinyu. Ishi lelo she mukulitaga, havili mukuyilonga ukuti mutahondeye kuvulanzi vwa shimashima, yenyi, tukulungama kuvakunzi. 47She lyʼatulajizizye linili uMwene atili:
Nkupiyʼukuva we luhozyo lwa vakunzi ukuti uvanje
we wa kuvapoha ukufiha nakuvusilo vwa nsi.
48Ilelo lwe viṿuye zinizi avakunzi pe vahaseshela, vahatinihʼuvupiti vwʼizwi lya Mulungu, pe vahitiha vonti vʼuMwene avalulumiye kuvulanzi vwa shimashima. 49Pʼizwi lya Mwene lihakwila mwonti munsʼila. 50Avene nyenʼavaYuda vahasambulanya navantandʼavapiti ve vahamunyilagʼuMulungu navahombe avahatankaya, vahavavusyʼukushimbizyʼuPavuli nuBalinaba, vahavefwa mumpaho yavo. 51Pʼavene vahavakunyuntilʼulusuto lwa kuṿinama, vahavala mw-Ikoniyo. 52Avene nyenʼavasundikwa vahizula nuluseshelo nuMupepʼuMufinjile.
Currently Selected:
Imbombo zya Vapositili 13: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
