SEKARIA 8
8
Yerusalemu shiyya
1Irero lya Nndumi Iruva muni matorito lyikasha kwakwa lyishaamba ule, 2Nndumi Iruva muni matorito, mmbo aamba ule; Nrima wakwa mmbo ulangye yeekya Sioni kyimaruma kya ikunda lya vandu vakwa. Na lyingyi mmbo shitirwa nnyashi ing'ani kimaruma kya vakiduva vandu vakwa Sioni. Ni yeny Nndumi Iruva muni matorito shaamba. 3Yeny mmbo shiwuya muriny wa Sioni shishevikaa marembo akwa yoo Yerusalemu nnang'ani. Yerusalemu mmbo ushevaangwa muri wa usumanu, na ifumbuu lyakwa yeny Nndumi Iruva muni matorito, mmbo ushevaangwa ifumbu Yeele. 4Yeny Nndumi Iruva muni matorito, mmbo shaamba; Vandu vakuu, vomi na vaka, mmbo vashelollywa veeke rembo efo mbaa-mbaa ya shia ta Yerusalemu, wo umwi na nsengye wakwe weekusibira kimaruma kya muu mwaasha. 5Shia shoose ta muri wa Yerusalemu, tishelollywa tishwe-fo vana va kyika na va kyuumi veekukyelaa efo shia. Ni Nndumi Iruva muni matorito aamba. 6Yeny Nndumi Iruva muni matorito, kwa vandu eva vasaae-fo, mikonu yei, ni kindo kilashiidimikaa. Indi yeni mmbo mukusarie ni kindo kilashiidimikaa kwakwa yeny Nndumi Iruva muni matorito? 7Ni yeny Nndumi Iruva muni matorito shaamba, “Mmbo shishekira vandu vakwa wooka urukeny lwa taari ya ngama, na wooka urukeny lwa taari ya nkwaany. 8Nawo shishevavika yoo Yerusalemu nnang'ani, vasheva vandu vakwa, na yeny shisheva Iruva waawo, wa kikusiryo na wa usumanu.”
9Nndumi Iruva muni matorito mmbo aamba: “Kaarye-ny! Yeni vandu, elyi mwiifo mwushiita mbony tuuka kaniny ka vakisuku, kupookya nkonu ulya nsuka wa mmba ya Nndumi Iruva muni matorito weveywa, naambo ikooye itanwa wiiya. 10Mashika yefo kwambee, vandu nta mafisi mmbekeeniingwa weesi-fo, nta nkweifo wiitanu nnang'ani ya nndu na nndu-fo, mashika shemeengye vandu usumanu vakasakya wo veni na veni. 11Indi vandu vasaaye-fo ulaalu nshishevatannya sha valya va mikonu ileera-fo, ni Nndumi Iruva muni matorito aamba. 12Ulaalu, mmbo kushevaa-fo urilalyi urukeny, sabibu mmbo tishevikaa ndunda ta-vayo, na sumbai isheende shoonga, na mmbwa ta mwiina tuuka iruveeu, vandu vashesaa-fo mmbo nshevaniinga findo efyi fyoose five fyawo. 13Naasa yeni vandu va Yuda, na vandu va Israeli, kyeeri kileira mmbo mwelollywa sha vandu vadenge nnang'ani ya vandu va masanga, indi ulaalu mmbo nshemukiraa neemuvikya mbora. Kaarieny! Mulaereye-fo.”
14Nndumi Iruva muni matorito mmbo aamba: “Ndesa llya sheekunndye imweengye ngapo kyeeri kilya vamiku vany, veshiteere shanyafu-kwa, nta shilaalashike tara. 15Kweekyo mmbo shanrummbwa shila itana mesha kwa muriny mbwa Yerusalemu na mmba ya Yuda, kulaereye-fo. 16Efyi mfyo findo mushetanaa, wo umwi navie ungyi ekyo kikee kya dede. Efo makwaanuny any a irummbwa myaandu, muutye vandu fya usumanu na urilalyi. 17Kulave-fo nndu nnang'ani yaany akusara itannya mwanamaye kindo kikasha, nta imfingya kindo kya wongo, mashika findo efyi fyoose mmbo shifisuuye, ni Nndumi Iruva aamba.”
18Nalyo irero lya Nndumi Iruva lyikasha kwakwa, lyikaamba: 19Nndumi Iruva muni matorito mmbo aamba; Ikootoya lya mwiiri wa kaana, wa karaanu wa mfungare, na lya mwiiri wa ikumi mmbo ishevaa yefo mmba ta vandu va Yuda, ni sukukuu mikonu ya ifura miniini, kweekyo kuve-fo ukundi, udede na urilalyi. 20Nndumi Iruva muni matorito mmbo aamba indi: Vandu veengyi va masanga engyi vasheshaa na vengyi wooka miriny ya kwaasha. 21Vandu va muri umwi, mmbo vashesengetyaa muri ungyi vaambe, Lwaangusye uviny lweende loose, lundetereva mbora kwa Nndumi Iruva muni matorito. 22Na yeny shimuni nsheendaa, na vandu veengyi na masanga atiri finya mmbo vashaa iruuya Nndumi Iruva muni matorito kunu Yerusalemu naambo vawonise mbora ya Nndumi Iruva. 23Ni Nndumi Iruva muni matorito aamba; Kyeeri ekyo, vandu ikumi wooka masangeny a fishomu fya wo ngata mmbo vashenanavya ikendu lya soori ya Myuda, veeshaamba, ndifony lweende loose, mashika mmbo lwiitye sheelyi Iruva mmbo akee kyaalu kyany.
Currently Selected:
SEKARIA 8: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
