SABURI 96
96
Iruva Mmangyi Aitorye
(1 Fye 16:23-33)
1Imbyeny Nndumi iruva, kiimbo kiiya!
Imbieny Nndumi Iruva, uruka loose!
2Imbieny Nndumi Iruva, na yaarafuma irina lyakwe.
Vambiseny ukyiro lwakwe mikonu myoose.
3Ongoyeny vandu va masanga mbony ta Weele lwakwe.
Vieny vandu woose mbony ta ngyende takwe.
4Mashika Nndumi Iruva ni nniini yaarafumwa nnu!
Na wa yeerewa ngota maruva moose.
5Mashika maruva moose a vandu nshe kindo-fo,
Indi Nndumi Iruva mmbwe aleumba ngina.
6Wiidi na itumbe mfikee usanguny lwakwe;
Finya na usha mmbo fikee ando eele kwakwe.
7Niingeny Nndumi Iruva, yeni mmba ta vandu;
Niingeny Nndumi Iruva weele na finya.
8Niingeny Nndumi Iruva weele lwa irina lyakwe!
Endeny firaso mwaange poo takwe.
9Indyeny Nndumi Iruva kwa usha lwa weele.
Uruka loose lureremi usanguny lwakwe.
10Rereny efo kwa vandu va masanga sheelyi Nndumi Iruva akee ishillya.
Ee-da ulana lukee waakare lluringinaa-fo.
Mmbo asheletaa vandu kwa worotu.
11Ngina tifure, uruka lukape ndoro!
Yewe ndilyi amwi na fyoose fiishwe-fo!
12Marema nakape ndoro amwi na fyoose fiifo!
Miri myoose iimbe kwa ifura
13Mashika Nndumi Iruva akee isha!
Ee, mashika akee isha iutya uruka uvingo!
Ashiutya ulana uvingo kwa usumanu
Na vandu va masanga kwa usaari lwakwe.
Currently Selected:
SABURI 96: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
