SABURI 74
74
Kiterewo kya ikyira Isanga
1Woi Iruva, kyikyi elyi kwalweera kwaasha deny?
Nkyikyi elyi kwarooywa nnyashi kya vandu vafo kumuni.
2Kummbwa kya vandu vafo kulembasangirya ukya kasha,
Isanga kulenlyikapannya lyive masaa a dingu yafo!
Kummbwa ifumbu lya Sioni efo kundo kukai.
3Ira kunu maraminy yaandi, alellyamarwa mmbakiduva;
Vakiduva vakalyamara wo kindo efo mmba ya iterevya.
4Vakiduva vafo vammbinga vakakusoka mmba ya iterevya;
Vakasaleesa-fo bendera tawo ta ivinga.
5Vakavaka mwiimanya ngwi
Akemanya miri na kyaara kyakwe.
6Vakafisha-fisha myaango ya mmba ya iterevya,
Kwa kyaara na firia fyawo.
7Vakakora muro yoo ando kwafo kweele.
Vakareesa ando yoo kweele kwafo kweyiindywa.
8Venkufinga ilumamita loose ando amwi!
Vakakora muro ando koose ulaniny,
Kulya lweekwanannya ikwiindya yewe.
9Firingisyo fyeru fyeele llukifilollye lyingyi-fo,
Llukitiri nkisuku nta umwi-fo!
Nta llwiishi mmbo kyivaa indi kufike marika-ki-fo.
10Woi Iruva, vakiduva veru mmbo vakusekaa fika indii?
A mmbo vatatalaa irina lyafo llung'anu?
11Nkyiki elyi kwasuruma woko lwafo?
Nkyi-kyeema kulaorwe woko lwafo.
12Naakwa nnyendo, yewe mmbwe Iruva, mmbwe mangyi yeeru ukya kasha,
Mmbo kulentana findo fiingyi fya ukyiro ulaniny.
13Kwa wiidimi lwafo lung'ani kwaava yeeve
Kwapapara mirwe ya nkumbi efo yeeveny.
14Yewe kwakakasha mirwe ya dude Lewiyathani
Nnying'a wa vayo kwandeniingya mafisi a kasa koomu.
15Yewe kumuuta ngyusoka na fimura,
Na mira miniini.
16Ni yewe kuvikye-fo nsanyiny kwavika-fo kio;
Kwavika mwiiri na nkyeere wo kyimwi ando kwavayo.
17Ni yewe kuvikye minnyanu myoose ya ulaniny,
Kwavika-fo fyeeri fya nsaka na fyeeriyi fya mbeo.
18Kummbwa, Woi Nndumi Iruva; kyiila kya vakyiduva vafo.
Isanga irung'ani lyikatatala irina lyafo.
Neefo mmbo lukee vafwafwa sha mbeta.
19Kulasheeniinga mafisi manyaasi muu wa vakunde vafo,
Kulasherekywa muu wa ngwera vafo llung'anu.
20Kummbwa kyaasa kyafo kuvikye neese,
Uruka mmbo lwiishwe kiila wo andi kwa ireema!
21Kulashevara-fo valya vakeefotwa vasotwa!
Kuidimisye vaturi na valya valatiri varumishe irina lyafo.
22Kwiipo, woi Iruva kukapannye irina lyafo,
Kukummbwe ndesa vakeekwiipala wo nkonu, vandu valakwiishi.
23Kularekywa kyoorongye kya vakiduva vafo.
Na raa ta wo nkonu ta yewo vakee kilasha na yewe.
Currently Selected:
SABURI 74: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
