SABURI 68
68
Kyiimbo Kya Ushilyi Kyeeri Lwavinga
1Iruva asalala, na vakiduva vakwe vanyanyaka.
Valya vansuuye woose vanyanyake.
2Ngata nsu wavivitwa ni uraato.
Niindo akeevavivita.
Ngata muuya weeka mbee ya muro
Niindo veetana ulyamari vakeemamika woose mbee ya Iruva.
3Indi yewo va usumanu mmbo vashefuraa elyi Iruva asheshaa;
Mmbo vakesaa na yiimba veefuraa.
4Imbyeny Iruva, rumisheny irina lyakwe;
Songosiyeny shia yakwe yeto mwiisaama mafishi;
We mmbwe Nndumi Iruva fureny mbee yakwe.
5Nde wa vana va ngwera mwiiringa vaka va dingu
Ni Iruva akee efo mmba yakwe sheele.
6Iruva kaniinga vaturi ando kwekaa;
Yewo vakee vafinge kavaporomwa,
Indi yewo valyang'a mmbo vasheerwa kasa koomu.
7Ee Iruva kasongoya vandu vafo,
Kwaveeta kulya nng'alo,
8Kidina-si kyikasha, yewe Sinai na nginii-u ikapuswa mmbwa,
Llya kweiyo yewe Iruva, Iruva wa Israeli.
9Kwaveengye mmbwa,
Mmbwa ya mwiina ikaniisa uruka na sumbai ikarelela.
10Vandu vafo vakawona kundo kwekaa;
Kwelyillya lyafo kwavaniinga kundo kwawo kwekaa.
11Nndumi kavika ishingo,
Na vaka vakavafitya mbony.
12Vamangyi va matorito vakarisha mwaala,
Vaka kulya kyeny vakakwaavya mifungwa.
13Lla neelyi valesaa efo ulaleny lwa moonri,
Mafwanu a mbita na mawe a fesa,
Na maaru awo amikaa sha saabu shisha.
14Kyeeri Iruva muni finya alevanyanyatya kwaasha
Mbyo ikooloka ifumbuu lya Salmoni.
15Yewe ifumbuu, ifumbuu lya Bashani;
Yewe ifumbuu lya fidoro fiingyi ifumbuu lya Bashani.
16A kyikyi elyi kwatirwa nkyififi,
Ifumbuu Iruva alelyisauwa ekee uwe ya-vayo?
Nndumi Iruva mfo kundo ashekaa llung'anu.
17Aryani na mamwiingyi wa vandu,
Fiku na mafiku a mitika ashoomwaa,
Ni Nndumi akeesha kyeny kwakwe kweele ooka Sinai.
18Mmbo akeesaama uwe ifumbuu, eerye mifungwa,
Neewarya findo fya pya fyuuka kwa vandu vafungwa sanda neewo valyang'a.
Naasa Nndumi Iruva andekaa-fo.
19Nndumi Iruva narumishwa!
Iruva mmbwe mweekyi weeru
Mmbwe mwiikira weeru.
20Iruva weeru mmbwe Iruva wa ukiro lweru!
We akee Nndumi kalukira ufu.
21Iruva mmbo ashefishaa mirwe ya vakiduva vakwe;
Yewo vakee valyang'a valakunndye yaalashika.
22Nndumi Iruva mmbo aamba,
“Mmbo shishevaviira vawuye wooka Bashani;
Mmbo shivaviira wooka efo ndilyiny-si ya yeeve
23kusangye marende afo efo samuny ya vakiduva vafo,
Nafyo fite fyafo filye-fo imutu lyavayo.”
24Yewe Iruva mamwingyi wa vandu na finya yaawo mmbo lulollywa,
Mamwiingyi wa vandu va Iruva wakwa mangyi yakwa kundefika yoo kweele kwakwe!
25Mbee yakwe, mmbo veefo veembi numa veekapa fivale;
Nnang'ani veefina mbasa.
26Rumisheny Iruva nnang'ani a vandu woose,
Rumisheny Iruva eni vana va Israeli.
27Kwiifo Benyamen, yeto n-du ya woose.
Kalatya vasongoru va Yuda na ironda lyawo.
Vakalatya vasongoru va Solomoni na vasongoru va Naftali.
28Woi Iruva ora finya tafo ndesa ting'ani;
Yeto kulerumata nato kyimaruma kyeru.
29Wooka efo mmba yafo Yerusalemu
Efo kundo vamangyi vashekweengye findo fya pya.
30Kyeemya Israeli mafisi yoo akaa efo makongyen
Na ikamba elyo lya shau na lya ngashe tavayo,
Kutani vandu va masanga yoo vakwiindya na ikuutya usanu.
Neewo veekunda myaandu kushevanyanyata.
31Vasongoru mmbo vasheshaa wooka Misri na Veesopia
Veengye Iruva findo fya pya.
32Eni mangyi ta ulana, imbyeny Iruva,
Imbyeny nndumi fiimbo fya inndumisha.
33Imbyeny yeto ashiiraa efo iruveeu,
iruveeu ta elyo na elyo,
Mwaarannyeny unyanga lwakwe lwa finya shiniini.
34Inndyeny finya shiniini ya Iruva.
Yeto mwiishillya Israeli
kutani wiidimi lwakwe lwafika nginiiu.
35Iruva mmbwa weeresi yoo kweele kwakwe,
Ee, we mmbwe mangyi ya Israeli.
Kaniinga vandu vakwe finya na wiidimi.
Iruva narumishwa.
Currently Selected:
SABURI 68: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
