SABURI 66
66
Kyiimbo kyeerumisha na Yaarafuma Iruva
1Eni vandu va ulana woose kapyeny Iruva nndoro!
2Imbeny itumbe kya irina lyakwe!
Mwiimbyeny itumbe nemwaarafuma!
3Via Iruva, “Mashora afo aeresye!
Mmbo kutiri finya kwailannya vakiduva vafo vakashoiya mbee yafo.
4Vaulana woose vakamwiindya-we;
Vakamwiimbya fiimbo fyenndumisha rumisheny irina lyakwe.”
5Oshony mulole mashora Iruva atannyi;
Mashora akwe mmbo aeresye nnang'ani ya vandu!
6Kaallwa yeeve ikava ando kuumu,
Vandu vakakillya mura na marende;
Neese lukafura nawe.
7Yeto mwiishillya kwa wiidimi lwakwe llung'anu,
Na miso akwe akalola masanga moose.
Kulave-fo nndu atana kilasha nawe.
8Arafuminy Iruva weeru, eni masanga moose
Na unyanga lwa fiimbo fyany lwiitiwa.
9Eto muyamuu nnang'ani a vandu,
Kasaleesa marende eru lulasherendeya.
10Yewe Iruva, kwaluvika kyeesony,
Sha saabu isheeswa na muro.
11Kwalureeya nreyo wa makunga,
kwalweekyerya irio lyikalurovya.
12Kwara vandu vakalusaama nrweny.
Kukeera murony na mureny,
Indi ulaalu kwalluvika ando kwa urilalyi.
13Mmbo shishangaa mmba yafo na firaso fyeekora na muro
Shiinndye kyaasa kyakwa
14Kilya firomu fyakwa fyerera na kana kyakwa shavika kyaasa
kyeeri sheeke ngatareny.
15Mmbo shikweengye firaso fisha fyeekora na muro
Kiraso kya mfwaamu nsha kya ngurana ya suva,
Mmbo shiniingya kiraso kya ngoleta na ndafu.
16Oshony mwaarannye, eni moose mweereiye Iruva,
Neeny shimuvieny findo efyo alenshitannya.
17Shammbanga ashitarami,
Shawuya imwaarafuma.
18Kukooye sheekusarye nriminy itana fya ulyamari,
Nndumi Iruva, nnyeeshaarannya-fo.
19Indi kya dede, Iruva aleshaarannya,
Ee, kaarannya marero a kiterewo kyakwa.
20Iruva narumishwa, mashika nnyalelema kiterewo kyakwa-fo,
Nta nnyaleshiima olyillya lyakwe-fo.
Currently Selected:
SABURI 66: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
