SABURI 51
51
Itereva Ifwaayo
1Shifwaya, Woi Iruva,
Kwi isarya lyafo,
Kushuute ulyamari lwakwa,
Kyeendwa ni isarya lyafo kumuni.
2Kushisangye deny uravi lwakwa,
Kushisangye ulyamari lwakwa loose.
3Shiishi deny uravi lwakwa
Kyeeri kyoose mmbo shilollye ulyamari lwakwa.
4Nshilekulyamarya yewe kumuni;
Shatana findo fikasha mbee ya usangu lwafo.
Ni usumanu deny elyi kwashuutya uvingo,
5Ukya iwonika lyakwa, mmbo shikee llyamari
Kulaore shammbonika mmbo shekee llyamari.
6Yewe mmbo kwasennyo na nrima ukunyiisye,
Yewe mmbwe kushimanyisya waarya kirika.
7Kushisangye na miisi, na yeny shiile peru,
Kushisangye na yeny shive mwaa ngota kyaamwi.
8Kushallwe shikwiite ifura na ikyesa;
Maffwa akwa akooye ivanga.
9Kulalole ngyulyamari takwa.
Kurekyo deny meesi akwa moose.
10Woi Iruva shyuumbya ngoo sheremutu.
Kushiniinge nrima mwiiya nsongovisi.
11Kulashisurumi usangu lwafo,
Nta kulashisoke mumuyo wafo mweele.
12Kushiviirye ifura lya ukiro lwafo,
Kushivangise na ngoo shaantu
13Shiloshe veetana makasha usumanu lwafo,
Na ewo vatiri ulyamari vakuwuuye.
14Woi Iruva, Iruva wa ukiro lwakwa,
Kushikire samu ilashepusuka,
Na ulumi lwakwa lusheimba usumanu lwafo.
15Woi Nndumi Iruva tarambwa firomu fyakwa,
Na kana kyakwa karere usuri lwafo.
16Mashika nkukundye irasyo-fo sherasaa,
Yewe nkukundye kiraso kya ikora-fo.
17Kiraso kya Iruva ni nrima ukunyiisye,
Ngoo ikunyisye itirwa mbwiiri,
Woi Iruva nkuiminaa-fo.
18Kutannyi Sayuni mesha kya ikunda lyafo
Kuseleese muri wa Yerusalemu.
19Llyo kusennyo mfiraso fya usumanu
Firaso fya ikora fyerasya
Llyo vasheniingya ngumbe uwe ya kitara kyafo kyeerasya.
Currently Selected:
SABURI 51: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
