SABURI 22
22
Kiiyo kya Mavavyo na Kyiimbo Kyeerumisha Iruva
1Iruva wakwa, Iruva wakwa,
Nkyiki elyi kwashira?
A nkyiki elyi kwakaa kwaasha kulakunde isheekya?
Kwaasha nnu na kiyyo kyakwa?
2Iruva Nndumi wakwa!
Shikefiira nsanyiny
Indi nkukeyaarannya-fo.
Shikekapa kyoorongye kio,
Nta shilakooye yaanguywa.
3Yewe mmbwe mweele
Kwaiindywa mmbandu va Israeli
4Vakuu veru vakakuvika nsia,
Vakakuvika nsia na yewe kwavakira.
5Vakakufuuya ukyiveny na yewe kwavatarama,
Vakusora nawo mmbalesuka-fo.
6Indi yeny mmbo shikee ikuru
Nta nshi nndu-fo,
Shateendwa na iipalwa ni wo nndu.
7Woose vekeeshilola vakashiseka,
Vakashisela veering'isaa mirwe yavo.
8Vakaamba, Nshi we kwemmbikyensia
Iruva Nndumi?
Nkyiki elyi alakukyiraany?
Kwakooya asennyo kyafo,
Naasany nakukyire.
9Indi yewe, Woi Iruva Nndumi,
Ni yewe kuleshuuta nsangeny wa maye wakwa,
Na ishiringa kyeeri shekee mwana n-du.
10Mmbo shilekuvika nsia kupookya mawonikyony akwa,
Kupookya llya shewonika yewe Iruva wakwa.
11Kulakae kwaasha na yeny-fo,
Mashika ukiva lwanserikya,
Kuve kufii na yeny,
Mashika elyi kulaiyo nndu wa isheekya.
12Vakiduva veengyi,
Vashisengetya sha nguleta
Vakashisisira sha nguleta titiri finya ta Bashani!
13Vakatarammbwa kana sha miiso,
Ikunndye iaratwa-ratwa.
14Shammisya sha mura wapusuka,
Mafwa akwa moose akateruka;
Nrima wakwa ukava sha muya weeka.
15Uroo lwakwa lwammuuma shawoyo
Ulumi lwakwa lukasangya na yuundu.
Kwanshira shifiiye kilulyiny.
16Vaala shia vanshisengetya;
Vakashilyingya sha fite,
Vakashidosha maako na marende.
17Vakashira shikee mafwa,
Vakiduva vakwa vakashilla na ishiteenda.
18Vakakwaavya sori takwa,
Na isaralyakwa vakalyikapya kura.
19Woi Nndumi Iruva, kulasalale kwaasha na yeny.
Yewe mmwekyi wakwa,
Osho sway kusheekye.
20Shikira muu wakwa
Kushiite kwaasha na fite efyi!
21Shuuta efo kaniny ka miiso,
Shitarama kwashuuta efo mbembeny ta mmboo-eti.
22Shavia vanavama kya mirundye yafo;
Shikurumishaa efo mwinindye wa siri yafo;
23Nrumisheny, eni varundi va Nndumi Iruva.
Yeni va mmba ya Yakobo, mwiindyeny
Arafuminy Iruva.
Mwiindyeny yeni vandu woose va Israeli.
24Mashika we nnashiila unana lwa ngwera-fo,
Nta ukiva lwawo-fo;
We mmbo aarannya fiterewo
Kavevarouwa swany.
25Ni yewe Iruva kwashiidimisya,
Shakurumisha nnang'ani a vandu;
Nshiindyaa kyaasa kyakwa,
Mbee ya valya vakwiindyaa;
26Valatiri mmbo valyaa valemwa
Neewo vakuruuya Iruva-mwitorya mmbo vamwiindya
Na ivikywa mbora llung'anu!
27Mmbo masanga moose ankummbwaa
Na iwuiya Iruva-mwitorya,
Mmba ta masanga moose vashemfirya-ndi.
28Mashika Iruva Mwitorya ni mangyi,
Nawe kashillya masanga moose.
29Yewo vakee mbafu woose,
Vashefiryaa ndi mbee yakwe
Woose vatiri mwiili vashemwinndyaa.
30Yewo vashaa numa vashendunndyaa
Na mbony ta Nndumi tisheambawa mmbandu.
31Mitannyi yakwe ya ukiro isheambawa,
Vandu valandewonike vashevywaa,
Iruva mmbwe atanyi fyoose.
Currently Selected:
SABURI 22: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
