FYAASO 15
15
1Irouwa na ufoo mmbo lyifweerisaa unyafi,
Indi marero a unyaasi mmbo eengeraa unyafi.
2Ulumi lwa nndu atiri urango usha llukwaanisaa umanyo,
Indi vandu varung'ani mmbo veishywe utondo shapu.
3Miso a Nndumi Iruva mmbo alollyaa wo kindo,
Akamanya nndu nsaari na nravi.
4Ulumi ufoo mmapookyony a muu,
Indi uravi lwa vayo llufiishaa nrima.
5Nrung'ani mmbo ainyalaa ufundo lwa nde vakwe,
Indi mwi-irikya mavavaso atiri urango.
6Mmbeny kwa nndu nsaari nkwiifo masaa meengyi,
Indi masaa a varavi mmbo asiyyaa rengeny.
7Kana kya nndu atiri urango usha mmbo kyikwaanisa umanyo;
Indi nshi indo ikai mirima ya varung'ani-fo.
8Firaso fya varavi ni weesi mbee ya Nndumi Iruva.
Indi kiterewo kya nndu nsaari nkifurisaa Iruva.
9Mikaaye ya vakasha ni uravi mbee ya Nndumi Iruva,
Indi Iruva mmbo akundaa vevallya na mbony ta usumanu.
10Kwiifo ngapo shuumu kwa yewo valasheenda shaasa kisumani.
Yeto moose asuuye iikimbwa mmbo ashefwaa.
11Kimmba Nndumi Iruva eeshi efyo fikee kwa vafu na kwa varumu,
Makusaro a nndu wa vandu ashiidimaa inda ikusuruma mbee yakwe!
12Nndu wa kiila nnyakundaa wikimbi-fo,
Nta nnyaruuya makusaro a vandu varango tusu-fo.
13Nrima wa ifura mmbo uilisaa kisangu;
Indi kivawo nkifishaa nrima.
14Nndu ntele mmbo aruuya urango,
Indi varung'ani vakakuishura mweelu.
15Kwa mwikunarya wo nkonu kwakwe ni nkasha;
Indi kwa yeto atiri ifura ni nkonu nniini.
16Ni kyeni iva na kyaangu na inndya Nndumi Iruva,
Ngota itira masaa meengyi ando amwi na ngatara.
17Ni kyeni shoonga ya nkwaany ya kiroora na ukundi,
Ngota ilya nyama tivanndye ando amwi na myaandu.
18Nndu wa unyafi ukasha mmbo endee mwaandu;
Indi nalakee mwaangu irooywa nngoo mmbwe aletaa mwaandu.
19Shia ya nndu nroko mmbo iishwe miinga shapu;
Indi shia ya nndu nsaari mmbo irambalali ikava niini!
20Mwana atiri urango usha mmbo eengye nde akwe ifura;
Indi yeto akee isembo mmbo ailaa maaye.
21Urung'ani ni ifura kwa nndu nalatiri urango;
Indi nndu nrango nnyasauwaa shia ya usumanu.
22Mashora alatiri veallua mmbo alyamarikaa;
Ando veallua veengyi vakai mashora mmbo aviraa.
23Kirouwo kya songosiny nkyendee ifura;
Irero lisumani kwa kyeeri kya vayo ni kindo kisha deny!
24Shia ya nndu atiri urango usha nnyeendaa na uwe kundo kukee muu;
Naambo naturunye yaanga si kwa varumu.
25Nndumi Iruva mmbo awundwaa ando vandu variiti vakai,
Indi karinga minyanu ya vaka vading'u.
26Makusaro a vakasha ni uravi mbee ya Nndumi Iruva,
Indi marero mesha akanniinga ifura.
27Mwilanga mbusha ya ulembi mmbo eengye va kyeny kwakwe waatariso,
Indi mwisua findo fya ntambo mmbwe akaa na muu.
28Ngoo ya nndu nsaari mmbo ikusaraa kulaore anrouwo,
Indi kana ka nravi kikapusua uravi.
29Nndumi Iruva akee kwaasha na vandu varavi,
Indi akee kufii na vandu vasaari kaveva arannya.
30Miso a illilya nnyaengye ngoo ifura;
Mbony shaantu ikasennya mwiili.
31Nndu mwiarannya wiikyimbi usha,
Mmbwe atiri mwaannya nsha mbee ya vandu vatiri urango usha.
32Yeto asuuye iloshwa mmbo akwiila we muni;
Indi mwiirikya wiikimbi mmbo awonisaa urango.
33Iindya ni kiloshyo kya urango usha;
Kulaore kwammiindyo kuti kuwe nndu mwikunyiisa.
Currently Selected:
FYAASO 15: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
