OBADIA 1

Nndumi mmbo Akabaa Edomu

1Elu ni ukisuku lwa Obadia, yoora kilya Nndumi Iruva Mwitorya fyoose

arera kya Vaedomu.

Nndumi Iruva mmbo arika varumi vakwe kwa vandu

na masanga lukeeta nrumi yeyo yakwe, kyeyaamba,

“Kwiipony-te, ndifony lweende fireny lundekaba Veedomu”

2Nndumi Iruva kavia Vaedomu nawo,

“Mmbo ushekufofisaa, wo nndu nakumini,”

3Ikusaro lyafo mmbo lyilekulemba

Muri wafo nniini nturuve ya mawe moomu

Na mmba yafo ikavikwa uwe mafumbu-u.

llyoony kwakusara efo nriminy wafo kwaamba,

“Mmbi ashidimaa ishoondwa kunu uwe shikai”

4Lyo naakwa mmba yafo yakaa uwe ngota kifuri kya uviri,

ikava sheelyi ikoyaa kulya nyinyiriny

Llyo nkuti shikoondwe-fo kuwe si.

5“Kwakooya manyinyi asheya nndu kyeeri kya kio

mmbo arakwaa-u kilya kivatiny.

Na kyeeri vandu vayaya sabibu, mmbo vasaara-fo maata

Kyeendi vakiduva vafo mmbo valekusallwa vakakumaa piny.

6Yeni vana va Esau, masaa afo a usuri ankamarwa moose.

7Vambuya vafo nawo vakakwiita ntambo

vakakuumbuta efo urukeny lwafo.

Valya vekee noofoo neewe, mmbo yewo vakeekushingillya vakakuvinga

Vambuya valya kweelyaa nawo, mmbo yewo vakuvikye nreiyo,

vakarera kyafo vakaamba, ‘Urango lwakwe loose nkwi lukai?’”

8Nndumi Iruva mmbo aamba nkonu yeto nshisheraa shilamamita vandu varango va Edomu-fo. 9Na vandu vatiri finya, mmbo Vatemani vakooye isavaa na wo umwi efo mafumbuny a Esau nawaawa.

Kimaruma kya ngabo ta Edomu

10Kyeendwa ni uravi yelo mwanany Yakobo aletannyo, usutu mmbo lushekurayaa kumamitwa kulakupoo-se-fo, llung'anu. 11Kyeeri yewe kulefura kwasalala mbai kwakallya veny vesokaa mwanamau findo fyakwe, na vakiduva vakwe veshangaa mmba kwakwe neewekwaakannya Yerusalemu, kwava sha umwi waawo. 12Kyeendi lyo kulafure elyi mwanamau awonnywa mmakasha, nta kularere vana va Yuda uvishwa kyeeri vakeesisyo. Nta kulashekutuula kyeeri wo vakee ukiveny. 13Na kyeeri vandu vakwa vafiiywa nta kulaange kwawo, nta kulavaimaiye-fo, nta kulaipoo kindo kyawo-fo. 14Nta elyi veefo varishaa ngatara yaawo kulashesalala yoo shia kweengere ivakapa, nta yewo vaturunya kulashevapaana-fo.

Nndumi Iruva asheutaa Uvingo

15Mashika nkonu yeto wa Nndumi Iruva ushesheyaa masanga moose. Wo nndu nataiywa kilya aletana. Wo nndu neekeryo iryo lyakwe efo nrony. 16Mashika shaasa mulena kulya ifumbuny lyakwa yeele, niindo vandu va masanga vashengeraa ina. Ee vani neesavaa vave ruu.

Itumbe lya Israeli

17Lyo kulya ifumbuny lya Sioni mmbo vashekaafo yewo vankia nto muri mweele, nnyo mmba ya Yakobo ya veni ding'u. 18Nayo mmba ya Yakobo neeyo ya Yosefu tishevaa muro ukoraa. Lyo mmba ya Esau ive mamburu moomu, naake neevamamita, kuleefo nndu ashekiaa. Ni Nndumi Iruva arera ekyi. 19Ifumbu lya Esau mmbo lyishetirwa ni vandu va Negebu kuve kwawo. Na vandu va Shefela natire uruka lwa Vafilisti. Vashetira marema a Efraimu na a Samaria. Nawe Benyaminy natire uruka lwa Gileadi. 20Lyo itorito eva va Vaisraeli vakee nnang'ani Vakanani mmbo vashetiraa Sarepta. Na valya va Yerusalemu vekee vakamare vakakaa Sefaradi vashetiraa miri ya Negebu. 21Na valya veekabanya vengyi mmbo vashesaama ifumbuny lya Sioni wootye Esau uvingo. Elo llo luvaa umangyi lwa Nndumi Iruva.

Currently Selected:

OBADIA 1: MAS2

Highlight

Compare

Copy