MEEKYENA 18

Mashora a Vakohani na Valevi

1Nndumi Iruva kavia Aron, Yewe na vana vafo na va mmba ya ndoo mmbo mukurikaa uravi lwa ando eele, yewe na vana vafo mwiiboo uravi lwa ukohani lwany. 2Na vana va mau nawo, ufyari lwa Levi, llo lwa ndoo, vavike kufii neewe valungwa neewe vakufurukannye, llyo yewe na vana vafo mmbo mushekaa mbee ya yeema lya ukureki. 3Neewe vavavasye varinge yeema lyoose, lyo valasheserikya fiiya fyeele fo, nta fitara fyeerasya-fo, naambo valashefwa ando amwi neeni 4Wo mmbo vasangaa neewe kya uringyi lwa yeema elyo na urundi lwa vayo, na nndu muny nalaserikye kufii-fo. 5Yeni mmbo muringaa ando eele, na kitara kyeerasya, vana va Israeli valashe iwooyo lyingyi ni unyafi. 6Na yeny manyiny mmbo shilesauwa Valevi efo kwany, vave sha kiraso kyautwa kwa Nndumi Iruva varundye yoo yeemeny lyekwaanannya. 7Yewe na vana vafo ando amwi mmbo mukallyaa ukohani lwany, na wo kiiya kya kitara kyeerasya, na filya fikee efo kimmba, yeni murundye-u. Mmbo shamuniinga ukohani luve simbo yaany, muny yeto asheserikyaau mmbo awaawaa.

Waavi lwa Vakohani

8Naasa Nndumi Iruva kavia Aron, Lola yewe mmbo shakuniinga uringyi lwa firaso fikwa filya filakorwaa na muro, findo efyo fyoose fikee fyuute kiraso, mmbo shakuniinga yewe na vana vafo kimaruma kya isauwa lyany, five usumanu lwany llung'anu. 9Findo efyo mmbo fivaa fyafo fyuuka efo findony fyeele, filakorwa na muro-fo, firaso fyoose na firaso fya nswa, kiraso kya ulyamari, na kiraso kya urekwa, mmbo fivaa feele deny kimaruma kyafo na vana vafo. 10Findo efyo mmbo kufilyaa five fyeele deny kwafo. 11Firaso filya filakorwaa na muro mfyafo, na firaso fingi mfyafo na vana vafo, ni usumanu lwany lwa llung'anu, nndu wafo moose nalakee ntefusu nalye. 12Firaso fisha fya mafura, misabibu, na fya mbeu fya mbee fishuutwa kwa Nndumi Iruva mmbo shakuniinga. 13Na ndunda toose ta mbee urukeny tisheengywa Nndumi Iruva n'tafo, nndu wafo yeto nalakee ntefusu nalye. 14Wo kindo kikeekivike wakifu kunu Israeli mmbo kivaa kyany. 15Wo kindo kyafewa kya mbee, mmbo kishuutwa kwa Nndumi Iruva, niindo kwa findo na vandu, m'fyafo, lyo kwakooya ni nndu we kuti na wouwa, na findo efyo fikee fitefusu nafyo da fiwouwa. 16Na findo efyo fiwouwaa efo findony efyo ni kubookya efyo fimaye mwiiri umwi, shaasa kulolaa, fiwouwa na fesa ya shekeli isaanu, kyeeso kya fesa ya ando eele. 17Lyo ng'umbe yeyo shivee, ao ngurana ya yoonri ya mbee, ao ya mburu, filawouwa-fo, mashika yeto nsheele, to mmbo kushoshotyaa samu yaawo kitareny kyeerasya neemamita mafura a vayo na muro ive kiraso kyeeserisya Nndumi Iruva na muro kiveva nrungo nsha. 18Yo nyama ya vayo mmbo ivaa yafo yewe, sha kitari kilya, na kisouwa kya taari ya woko usha. 19Firaso fyoose fya vana va Israeli vashengyee Nndumi Iruva mmbo shakuniinga yewe na vana vafo woose, na vefu ando amwi neeve ni usumanu lwany fika llunganu, ni kyaasa kya llung'anu kyooka kwa Nndumi Iruva kwafo na ngyeeri yafo. 20Naasa Nndumi Iruva kavia Aron, Yewe nkutiraa ding'u efo urukeny-fo, nta waavi lumwifo, waavi lwafo ni yeny, na ding'u yafo, efo Israeli.

Waavi lwa Valevi

21Na Valevi mmbo shavaniinga firaso fyoose fya kyenga kya ikumi Israeli vaniingyaa ive ding'u yaawo, kimaruma kya urundi lwawo lwa yeema elyo yeele. 22Ulaalu vana va Israeli valakiserikye yeema yelyo yeele-fo, mmbo vawonisaa-u ulyamari, vafwe. 23Lyo Valevi wo mmbo varunndyaa yoo yeemeny, lyekwanannya vakurike ulyamari lwawo, neelyi mmbo lyivaa ivavasyo lya llung'anu efo marikeny any moose, nnang'ani ya vana va Israeli valatire ding'u shoose. 24Firaso fya kyenga kya ikumi fya vana va Israeli efyo vashenngyee Nndumi Iruva mmbo shaniinga Valevi five ding'u yaawo, nkyo shilevavia efo kwa Vaisraeli mmbatiri-fo ding'u ingyi-fo.

Kyenga kya Ikumi kya Valevi

25Naasa Nndumi Iruva karera na Mose, kammbia, 26Na lyingyi rera na Valevi, kuvavie, Elyi mushewaryaa firaso fya kyenga kya ikumi five ding'u yaany, llyo neeni musheutyaa-u Nndumi Iruva kiraso, kive kiraso kya kyenga kya ikumi kya ding'u eyo yaany, 27Na kiraso ekyo kyany mmbo kishevaa sha kiraso kya mbeu, kiishwe kyuuri ekyo kyeekabya sabibu. 28Nkyo neeni muniinngye firaso kwa Nndumi Iruva fyuuka efo ding'uny yaany, efyo muwaryaa kwa vana va Israeli, nkyo muniingye Aron firaso efyo fya Nndumi Iruva. 29Findon efyo muwonisaa wo kimwi muutye-u Nndumi Iruva, kiraso, kimaruma kya usha lwakwe loose, waavi yelo mmbo lukee weele. 30Kimaruma kya vayo vavie indi, Kyeeri mushewonisaa findo fisha, mmbo na Valevi nawo vawonisaany, sheelyi mwawonisa fimu fya mbeu na sabibu. 31Kulyiiyeny shoonga tany na vana vany, ni waavi lwany ando a urundi yelo lwa yeema yeele lyekwanannya. 32Yeni mmushiboo ulyamari kimaruma kya vayo-fo, kyeeri mushewonisaa mesha yoo, lyo mulatefuse findo efyo fyeele fya vana va Israeli-fo, naambo mulasheefwa.

Currently Selected:

MEEKYENA 18: MAS2

Highlight

Compare

Copy