MEEKYENA 10

Maranda a Fesa

1Kyasia Nndumi Iruva karera na Mose kammbia, 2“Songosieny maranda avii a fesa, ni ishora lya mfuuru, tive teevaanga vandu vakwaanannye, 3Na kyeeri vakabaa maranda yoo, ironda lyoose mmbo lyishekuummbyaa, yoo mwaangony wa yeema yeele lya ikwanannya. 4Elyi vakabaa iranda lyimwi nsi, vasongoru yewo vakee vaniini va mafiku yoo mmbo vasonngwaa ikusora yewe. 5Mukankapa unyanga lweematwa deny llyo maronda akee taari ya ngama vashipoo kyaaro, na lwa kavii lweematwa-da, valya va taari ya sinde vashiipo kyaaro 6Vashekapaa ngyunyanga teematwa kimaruma kyawo fyaaro fyaawo, 7indi elyi ikwaanu lyikwaanisywa amwi, mukapaa iranda, nshi kwa unyanga-fo. 8Vana va Aron wo makohani, mmbo vakapaa maranda yoo nang'u ave nng'u mushelatyaa marika any moose. 9Na kyeeri mushendaa fireny urukeny lwanyi ikapa nkiduva yeto akeemusisa, llyo mushekapaa unyanga lweematwa, naambo Nndumi Iruva namukummbwe, we Iruva waany mukooye yaauwa maakony a vakiduva vany. 10Na elyi nkonu wa ifura na nkonu wa sukukuu tany tikee shivavasye, neelyi lya mwiiri mwiiya, mmbo mushekabyaa firaso fyany fyeemamita maranda, na firaso efyo fya unapwe, five fyeekummbwa mbee ya Iruva waany, yeny mmbwe Nndumi Iruva shikee Iruva waany.”

Vana va Isreli Veepo Kyaaro

11Naasa mwaaka wa kavii, mwiiri wa kavii, nkonu makumi avii wa mwiiri, ifishi lyilya lyikauka alya uwe ya ando alya 12Vana va Israeli vakeepoo kyaaro, uka alya kasa ka Sinai, lyikandefika alya kasa ka Parani. 13Nawo vakateterwa, ni Mose shaasa Nndumi Iruva alevavasya. 14Bendera ya vana va Yuda ikeera mbee ya matorito awo, na Nashoni mwana wa Aminadabu mmbwe aleva nniini waawo. 15Na mwitetera itorito lya vana va Isikari kava Netaniel mwana wa Suari. 16Na mwiitetera vana va Zabuloni ni Eliabu mwana wa Heloni. 17Na yeema lyikaolotwa, na vana va Gerson na vana va Merari, yewo valekamara yeema, vakaipoo kyaaro. 18Naasa bendera ya ulale lwa Ruben ikeepoo kyaaro na itorito vawo, na Elisuri mwana wa Shedeuri mmbwe yeto eevasongoye. 19Na nsongoru wa vana va Simion ni Shalumiel mwana wa Shuri-shadai 20Na vana va Gadi vakasongoywa ni Eliasafu mwana wa Deueli. 21Naasa Vakohani vakepoo kyaaro mmbo yewo veepoo fiiya fyeele, neewo vengyi vakasaleesa yeema kulare wo vansha. 22Naasa bendera ya yeema lya vana va Efraimu ikeepoo kyaaro na matorito awo, veesongoyo ni Elishama mwana wa Amihudi. 23Na matorito a vana va Manase vakasongoyo ni Gamaliali mwana wa Pedasuri. 24Na matorito a vana va Benyaminy vakasongoyo ni Abidani mwana wa Gidion. 25Naasa bendera ya yeema lya Dani, yewo vekee numa ya vengyi woose, ikeepoo kyaaro na matorito awo, na mwivasongoya ni Ahieseri mwana wa Amishadai. 26Na valya valesongoywa ni vana va Asheri ni Pagieli mwana wa Okrami. 27Na matorito a vana va Naftali ni Ahira mwana wa Enani. 28Niindo fyaaro fya vana va Israeli fileva matorito awo vakeengera yeenda na mbee.

29Naasa Mose kavia Hobabu, we mwana wa Reueli Mmidiani, ndeyanka wa Mose, Yese mmbo lurye kyaaro kya yeenda ando Nndumi Iruva aleluvia indi, mmbo nshemuningaa yoo, kushe ando amwi neese lushekutannya mesha, mashika Nndumi Iruva aluvikye kyaasa yese Vaisraeli kyeewona mesha efo kwakwe. 30Kammbia, yeny nshishendaa-fo, lyo mmbo shiwuyaa urukeny lwakwa, na vandu vakwa. 31Nawe kammbia, kulalakane neese-fo, shakutereva, mashika ni yewe kwiishi shaasa lushetanaa efo kasa, neewe mmbo kuvaa iriso lyeru. 32Naasany, kwakooya kwannde neese, mesha yoo Nndumi Iruva ashelutannyaa neese mmbo lukutannyaa indo.

Vana va Israeli Vakwipoo Sinai

33Naasa vakepoo kyaaro uka alya ifumbuny lya Nndumi Iruva kyikee kyaaro kya mikonu iraru, na isanduku lya Nndumi Iruva llya lya mavavaso lyikavasongoya mikonu yeyo iraru naambo vakooye ando a yiimuya. 34Na ifishi llya lya Nndumi Iruva lyikavavikya ifweera elyi nsanyiny, kyeeri vakee kyaarony.

35Kyeeri isanduku lyilya lyileira mbee, llyo Mose kaamba kwiipoo, woi Nndumi Iruva naambo vakiduva vafo vanyanyake ewo vakusuuye vakurishe. 36Kyeeri isanduku elyo lyilesalala kaamba woi Nndumi Iruva, wuiyase fiku ikumi, fiku fya vana va Israeli.

Currently Selected:

MEEKYENA 10: MAS2

Highlight

Compare

Copy