NEHEMIA 13

Ikwiisa na Veny

1Nawo llya valesoma efo uvavasony lwa Mose vakakooya ando kukee kureiye Vaamoni na Vamoabu valasasange na Vaisreli ando kwa yiindya Iruva fo. 2Nakyo nkimaruma kya llya valelema yaambya vana va Israeli, llya valevika Balaamu navasenge, nawe Iruva kareveta kidengo kilya kyikava mbora kwawo. 3Kyeeri kilefikya niisoma Uvavaso llyo Israeli woose vakavarauwa na vandu vengi woose.

Findo Nehemia Asongossya

4Nawe Eliashibu ekee nkohani mwiisalallya firya fya mmba ya Iruva weeru esheekyoo ni Tobia, 5Kadeesyan kirya kiniini kuve ando kweevika nswa na mbani na fiiya fingi, na firaso fya fimu, na mfinyo na mafura, filya fyekeefivavasye finiingyo Valevi na veembi, na veekallya ngiri, amwi na firaso filya fivavasye fya vakohani. 6Lyo kyeeri ekyo kyoose yeny nsheefo kulya Yerusalemu-fo, Mashika llya wekee mwaaka wa makumi araru na kavii wa mangyi Artashasta wa Babilony mmbo shilewuya na kwakwe. Numa ya mikonu mive indi, shatereva lyingi mangyi muumu nasheekeye shyeende. 7Shashefika Yerusalemu, shashemanya ukasha llwa Eliashibu aletanya Tobia, llya alenniinga kiria kulya mmba ya Iruva. 8Mmbo shilesukyo nnu shandeerya findo fya Tobia fyoose efo poo. 9Shavavasya firya fyoose fisangyo. Shaviira-fo fiiya fyoose fya mmba ya Iruva, ando amwi na firaso filyo fya nswa na ubani.

10Na lyingi shashekooya Valevi mmbaleniingwa waavi lwawo shaasa kisumani-fo, Valevi na Veembi vakarafo mashora awo vakeenda wo umwi ireminy lyakwe. 11Llyo shilesakira vasongoru shavavia, “Mmbo kileva inda mashora a mmba ya Iruva akarewau?” Shooka-fo shavaviira mashoreny awo. 12Nalyo Vaisraeli woose vakeende firaso fya fimu, na mfinyo na mafura mmba ya Iruva. 13Llyo shilevika vangari veekallya umasi elo lwa mmba ya Iruva, nawo ni Nkohani Shelemia, na Sadoki mmwiireiya, kwa Valevi ni Pedaya, na Hanani mwana wa Sakuri, mwana wa Matanaia, mashika veeshiwa ni vandu vasaari, wovasalallye findo fyoose neyaavya vengi.

14Kushikumbwe kya efyo woi Iruva wakwa, nta kulashisoke isarya lyafo kya efyo shiletana fya mmba ya Iruva wakwa na uramba lwa vayo.

15Fyeeri efi shalollya kunu Uyuda vandu veekamaa ndunda ta nsabibu nkonu wa Sabato, na vengi vakeepoo makakashi a vayo mishungu ikurike, ando amwi na mario a wo ngata a mfinyo, na misabibu na fingi vakeende Yerusalemu. Neeny shanderera nawo shiiwooraa ukasha lwawo alya singereny veekumbaa findo fyawo. 16Na vandu va Tiro nawo mmbo veerye makunga na findo fyeekapa mbusha nkuka vakakumbya Vayuda elyi nkonu wa Sabato efo Yerusalemu kweni. 17Llyo shilesakya na vandu va Yuda, shavavia, “Nkyololeny uravi elu mukeetana mukaimbwa sabato. 18A vakuu vany nawo nshi indo-da valetana, nawe Iruva kalweekenya uravi elo na kunu muriny yeu? Na mmwasi ulaalu-se mbo mukundye yeengye Israeli unyafi lwa Iruva elyi mwaimbwa indo sabato yakwe!” 19Neelyi kweefo kushiilaa kulore sabato yampooka, shavavasya ngiri tirayo, tikaa indo kutani sabato yeera, kyikava indo naambo kulave nndu eende nafo mario a findo fyeekumba. 20Nalyo veekaba mbusha va wo ngata vakarayo 600 valaange Yerusalemu ando a mikonu ivii ao iraru indi. 21Llyo shilevalosha, shavavia, “A nkiki elyi mulelala yoo mmbombony? Mukatana lyingi indo mmbo shivavasyaa mutirwa.” Ukalyo valakishe-se kwiikee nkonu wa sabato. 22Shavavasya Valevi vakwiilyise, vasheringa ngiri toose, naambo sabato yiindyo deny. Shatereva Iruva indi, “Woi Iruva wakwa, kushikumbwe kya efyo neeshilyillya kya isarya lyafo.”

23Fyeeri efi fyeni shakwaananya na Vayuda valya veerye vaka va Ashdodi, na Amoni na Moabu. 24Na vana vawo vakarera veesasandaa kishomu kya Ashdodi, nta valaidimi irera Kiyuda. 25Shasakya nawo, shaveenyala deny, shavakaba, shavamushwa fiitawo, shavalyisa mboo, shavavia, “Mulaorise vasoro vawo vefu vany-fo, nta vasero vany woore vefu vawo-fo, nta yeni muveni mulatani indo-fo. 26A mmbo mulakumbuye shaasa Solomon mwana wa Davidi alelyamara elyi aletana indo? Lyo nkulekaafo mangyi ungi efo masangeny engi ammbakkye-fo. Lyo Iruva kankunda, kambika nashillye Israeli. Lyo vaka va masanga engi mmbo valemweeveta kalyamarya Iruva. 27A ulaalu mmbo mukundye lumure indo mulyamarye Iruva mwiishooraa vaka veny?”

28Nafo kweefo mwana umwi wa Yoyada, wa Eliashibu, ekee nkohani nniini, nawe ekee nkwe wa Sambalati, Mhoroni Yeu mmbo shilemfuna kooka kwakwa. 29Nkyekumbwa woi Iruva wakwa shaasa vandu yeva valetefu-sa ishora lya ukohani, na kyaasa kya vayo kulekivikya Valevi. 30Naasa shavaterevya shavailyisa vakamaa-fo findo fyoose fya veny. Shavika uramba lwa yaala makamba a vakohani na Valevi, wo umwi na ikamba lyakwe. 31Na firaso fya ngwi fyuuto kyeeri kisumani, ando amwi na fimu fya mbee. Kushikumbwe, woi Iruva wakwa kushitannyi fyeesarya.

Currently Selected:

NEHEMIA 13: MAS2

Highlight

Copy

Compare