Valevi 9

Firaso fya Aron

1Naasa wekee nkonu wa nyanya, Mose kavaanga Aron na vasero vakwe ando amwi na vamiku va Israeli; 2kavia Aron, Yeve ipoo ngashe ya shau ive kiraso kya ulyamari, na suva ive kiraso kyeekora na muro, tive shisha, kutiserisye mbee ya Nndumi Iruva. 3Neewe mmbo kushereraa na vana va Israeli, kuvavie, Endeny mburu ya kyuumi ive kiraso kya ulyamari; na shau, na suva, toose ta mwaaka umwi, tilatiri teve, tive kiraso kyeekora na muro; 4Shau na suva, tive firaso fya ufoo, naambo tishishwa mbee ya Nndumi Iruva; na kiraso kya nswa ukensande na mafura; mashika, ni inu yeni Nndumi Iruva ashekooraa neeni. 5Nawo vakeende efyo filevavasywa Mose vakafika yoo mbee ya yeema lyeekwaananya; naasa na ironda lyoose lyikasha ishekwanannya na Nndumi Iruva. 6Naasa Mose kaamba, kindo Nndumi Iruva alevavasya mukitane nkyo eki, na itumbe elyo lya Nndumi Iruva lyishemusheyaa. 7Mose kavia Aron, sembeya na yoo kitareny, kuute kiraso kyafo kya ulyamari, na kiraso kyafo kyeekora na muro, kuvike usandi kimaruma kyafo kumuni, na kya vandu kuveniingya na kiraso kya vandu, kuvike usandi kimaruma kyawo, shaasa Nndumi Iruva alevavasya. 8Naasa Aron kasembeya na yoo kitareny ekyo, kashisha shau yeyo ya kiraso kya ulyamari yeyo ikee kimaruma kyakwe. 9Naasa vasero va Aron vakanserisya samu ilya, nawe koolotafo nni vakwe, na iyaamba efo mbai ya kitara kyeerasya, kawuya kaletya samu yeyo yoo kwasi ya kitara, 10lyo mafura, na syo, na uvambu elo lwa irina lya kiraso ekyo kya ulyamari, kafikorya yoo kitareny, shaasa Nndumi Iruva alevavasya Mose. 11Na nyama na shony kafikora na muro yoo poo ya ulale. 12Nawe kashisha kiraso kyeekora na muro, na vasero va Aron vakanserisya samu ilya, nawe kaishoshotya efo kitareny taari toose. 13Nawo vakamwengye kiraso ekyo kyeekora, fyenga-fyenga, na nrwe, nawe kafikorya yoo uwe ya kitara. 14Numa kasangya maala, na marende, neefikorya yoo uwe ya kiraso ekyo kyeekora yoo kitareny. 15Numa kaserisyau kiraso kya vandu, kawarya mburu yeyo ya kiraso kya ulyamari yekee kwa vandu, kaishisha, kayuuta kimaruma kya ulyamari sha ilya ya kipooka. 16Numa kaserisyau kiraso kyeekora, kayuuta kikwaani na ivavasyo. 17Numa kaserisyau kiraso kya nswa, kootau ng'umbe imwi kaikorya yoo kitareny, ando amwi na kiraso kya ngama kyeekora. 18Na shau yeyo kaveishisha, na suva yeyo-da ni kiraso kya ufoo, kimaruma kya vandu; na vasero va Aron vakanserisya samu ilya, nawe kaishoshotya efo kitareny taari toose, 19na mafura a shau, na a suva, nkya va vayo wa mafura, neefyo fisikye maala na syo, ta vayo, na uvambu lwa irima; 20nawo vakavika mafura yoo uve ya kidari, nawe kakorya mafura yoo uwe ya kidari, 21na fitariti efyo, na urende usha, Aron kafiringisa naambo five kiraso kyeeringisa mbee kwa Nndumi Iruva, shaasa Mose alevavasya. 22Naasa Aron ekyimaa iniingya firaso fyoose kiraso kya ulyamari, kiraso kyeekora na muro na kiraso kya ufoo, keepo maako kavikya vandu mbora, naasa kaoloka si. 23Naasa Mose na Aron vakaangany neefo yeemeny lyeekwanannya, numa vakasomukafo, neevikya vandu mbora, na itumbe elyo lya Nndumi Iruva lyikasheya vandu woose. 24Naasa muro ukauka yoo mbee ya Nndumi Iruva, ukakora kiraso kilya kyeekora, na mafura alya yoo uwe ya kitara kyeerasya, kyeeri vandu woose valelollya muro ulya vakakapa ngaya vakawa si kifulufulu.

Currently Selected:

Valevi 9: MAS2

Highlight

Copy