Valevi 4
4
Firaso fya Itereva Ifwaayo
1Nndumi Iruva karera na Mose, kammbia, 2Kyasia rera na vana va Israeli kuvavie, “Kwakoyaa nndu moose atana ulyamari nalakusarye, kya kindo kyoose Iruva alevavasa kilatanwa, nawe kaimbwaa kindo kya ngata yeyo; 3kwakooya nkohani akeemwaambe mafura atana ulyamari kutani eengye vandu urekwa; mmbo asheniingyaa kimaruma kya ulyamari lwakwe alelutana, neeserisya Nndumi Iruva ng'umbe ya shau shikoo ilatiri teve, kive ni kiraso kimaruma kya ulyamari.” 4Nawe mmbo asheendee ng'umbe yeyo na yoo mwaangony wa yeema yoo mbee ya Nndumi Iruva nawe nashevika woko lwakwe yoo nrony wa ng'umbe yeyo, na yiishisha mbee ya Nndumi Iruva. 5Numaany nkohani yeto akee mwaambe mafura naiboo-u samu ya ng'umbe yeyo neeyaata neefo yeemeny yeele; 6numa nkohani naolote nni wakwe efo samuny neeshoshotya samu mbee ya Nndumi Iruva kamfungare, yoo yeema yeele lyikeeirumbwe kavii. 7Numa ya vayo nkohani napusuye samu ndumba toose ta kitara kyeerasya ekyo kyeefumirya nrungo mbee ya Nndumi Iruva, yoo yeemeny yeele; numa ya vayo samu shoose ya ng'umbe yeyo nasheipusuya yoo si ya kitara kyeevika firaso fyeekora na muro, yoo mwaangony wa yeema elyo. 8Numa ya vayo mafura moose yoo a ng'umbe yeyo ya kiraso kya ulyamari mmbo ashuuta-u, yoo asikye maala, na mangau moose, 9na syo ta vayo ivii, na mangau yoo akwaambye-fo, akee kufii na kisi, ando amwi na syo yeto, yefyo fyoose nafyuute-fo, 10indo-da shaasa ootwaa-fo kwa ng'umbe ya kiraso kya ufoo, naasa numa ya vayo nkohani nafirumate yoo uwe ya kitara ekyo kyeekorya firaso. 11Numa shonyi yeyo ya ng'umbe, na nyama ta vayo toose, ando amwi na nrwe wa vayo, ando amwi na marende a vayo, na maala a vayo, na mura wa vayo, 12mashika lyo ng'umbe yeyo mmbo asheisomutaa kiboo ya ulale fika ando esha, yoo ifu lyiingyoo, nasheikorya-u na muro wa ngwi; yoo ifu lyipusuyoo ng'u ashekoryaa na muro.
13Na kwakooya ironda lyoose lya Israeli lyatana ulyamari lulakusarye, na kindo ekyo kilalollyo paa misony awo, kyeendi lyo mmbo valeimbwau kya efyo Nndumi Iruva alevavasa sheelyi valatani, nakyo kikavatefusany, 14kyeeri ulyamari yelo valelutana lushemanyikaa, llyo ironda elyo lyishentaa shau shikoo ive kiraso kya yuutwa ulyamari neyeende yoo mbee ya yeema yeele. 15Naasany vamiku va ironda elyo vaekere maako awo yoo nrony wa ng'umbe yeyo usanguny lwa Nndumi Iruva, 16numa ng'umbe yeyo ishishwa mbee yaa Nndumi Iruva. Naasany nkohani akeemwaambe mafura neepo samu maata ya ng'umbe yeyo nayeende neefo yeemeny yeele; 17numa nkohani noolote nni wakwe efo samuny neeishoshota ka mfungare usanguny lwa Nndumi Iruva, mbee ya yoo kukee kwaave. 18Na samu ingi naivike efo ndumbeny iinya ta kitara kyeerasya kikee mbee ya Nndumi Iruva, ekyo kikee yeemeny yeele, numa samu shoose naipusuye yoo si ya kitara kyeele ekyo kya firaso fyeekora, kikee yoo mwaangony wa yeema yeele. 19Numa naipoo mafura a vayo moose naakorye yoo uwe ya kitara kyeerasya.
20Niindo ashetanaa kya ng'umbe yeyo, shaasa aletana kya ng'umbe ilya ya kiraso kya ulyamari, natane indo kya yei; nawe nkohani ashevavikyaa usandi nawo vasaryo. 21Numa nasomute ng'umbe yeyo kipoo ya ulale, na yiikora na muro indo-da shaasa alekora ng'umbe ilya ya mbee; nkyo kiraso kya yuutwa ulyamari lwa vandu.
22Elyi nshilyi antana ulyamari, katana kindo nalakusarye kya efyo Nndumi Iruva, wafo alevavasya filatanwa, nawe kawonisa uvingo; 23kamaa yoorwa ulyamari lwakwe atannyi, mmbo ashendee mburu ive kiraso kyakwe, mburu shisha ya kyuumi; 24naasa navike woko lwakwe yoo nrony wa mburu, neeishishya yoo vashishyaa firaso efyo fyeerumata na muro, mbee ya Nndumi Iruva; nkiraso kya ulyamari. 25Naasany nkohani naipoo samu ya kiraso ekyo kya ulyamari, nashoshotye efo mbai ya kitara kya firaso fyeekora na muro, na samu yeyo ingi naipusuye yoo kwasi ya kitara ekyo kyeekora firaso. 26Na mafura a vayo moose mmbo asheakoryaa yoo kitareny ekyo shaasa llya alekora mafura alya a firaso filya fya yeende ufoo; nawe nkohani nammbikye usandi kimaruma kya ulyamari lwakwe, nawe nasarywa.
27Na kwakooya nndu moose wa kunu urukeny atana ulyamari nalakusarye, kyayiimbwa kindo kyoose kya efyo Nndumi Iruva alevavasa filatanwa; nawe kaona utefusu; 28kwakooya amanyisyo ulyamari lwakwe alelutana, llyo ashendee mburu ya savana shisha, ive kiraso kya ulyamari lwakwe alelutana. 29Nawe mmbo ashevikaa woko lwakwe yoo nrony wa kiraso ekyo kya ulyamari, na ishishya kiraso ekyo yoo ando eekorya firaso. 30Naasa nkohani mmbo ashiipoo samu ya vayo na nni wakwe, neivika efo mbai ya kitara kyeerasya, na samu ya vayo shoose mmbo asheiletyaa yoo kwasi ya kitara kyeerasya. 31Numa noote-fo mafura moose indo shaasa aleuta-fo mafura a firaso filya fya yeende ufoo, naasa nkohani naarumatye yoo kitareny kyeerasya, uve nrungo nsha usennyi Nndumi Iruva; na nkohani mmbo ashevikaa usandi kimaruma kya vayo, nawe mmbo asarywa.
32Nawe kameende ngurana ikee kiraso kya ulyamari, mmbo ashendee ilatiri teve, 33Nawe navike woko lwakwe yoo nrony wa kiraso kya ulyamari, naasa naishishe ive kiraso kya ulyamari, yoo firaso fyeekora na muro fishishywaa. 34Naasany nkohani naipoo samu ya kiraso ekyo kyeekora na muro na nni wake a aivike efo mbai ya kitara kyeerasya, numa samu shoose naipusuye efo mbai ya kitara ekyo kyeerasya; 35numa nootefo mafura a vayo moose, shaasa mafura alya a ngurana aleutwa-fo alya kirasony kya ufoo;numa nkohani naakorye yoo kitareny, shaasa firaso fya Nndumi Iruva fitanyoo eto teenserisya na muro; na nkohani mmbo ashembikyaa usandi kimaruma kya ulyamari elo alelutana, nawe mmbo ashesarwa.
Currently Selected:
Valevi 4: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
