Valevi 26

Mbora elyi Nndu Aindya Nndumi

(Nku 7:12-24; 28:1-14)

1Mulasongosye ifwanu lya ngata shose, nta mulasaleese ifwanu lyeepasha, nta ngo shaasha, nta mulasaleese iwe lyeepasha urukeny lwany lyive lya yiindya, mashika yeny ni Nndumi Iruva, Iruva waany. 2Indyeny sabato takwa, muvetiiya ando akee kweele wiindi, yeny ni Nndumi Iruva.

3Mukansora mavavaso akwa indo; 4llyo nshemwengyee mmbwa fyeeri fya vayo, na uruka luwone shoonga ya vayo na miri ivike ndunda shiingyi. 5Na yuulula fimu fya mbeu kutane kwafika kyeeri kya yuulula ndunda ta misabibu, na yuulula sabibu lyishefikya kya ivaaya mbeu, mulye shoonga yaany neewuura, neekaa na unabwe. 6Neeny shimuni nge ufoo urukeny, mulale kulaifoo nndu ashemweeresee, neeny shimaafo mafisi manyaasi urukeny kwany, nta fira nnyishemusheyaafo. 7Mmbo musheumbutaa vakiduva vany, vawaawa na usu. 8Vandu vany varaanu nsi voombute vandu, iyana, na vandu vany woombute vandu fiku ikumi, na vakiduva vany vatuulwa noosu. 9Neeny nshemuvikya miso akwa mufumbuke, neekarisa kyaasa kyakwa neeni. 10Neeni mmbo mushelya filya mwensuruma kasha, neefyo fya kasha muutefo feseiye fiiya 11Neeny mmbo nshekaa neeni, nta nrima wakwa mbushesukyoo nnyeni-fo. 12Shikae neeni, shive Iruva waany, neeni muve vandu vakwa. 13Yeny ni Nndumi Iruva, Iruva vaany, shilemweende shimuuta Misri, mulasheeva mashinga awo; neeny shafisha mise ilya yeemufingye, shamurwaa shieny ya usumanu.

Ngapo Elyi Nndu ara Iindya Nndumi

(Nku 28:15-68)

14Lyo mwanra mulashaaranya nta ilatya mavavasyo yaa moose, 15mukallema mavavasyo akwa, na mirima yaany ikusakyo mirumbuye yakwa, mukavefisha na kyaasa kyakwa; 16neeny mmbo nshemutaiyaa kindo eki, nshivavasyaa fimuting'aa fimusheye, ndwari shuumu, miso any ature finya na mirima irovyo, kive kya ruu mashika mmbo fishelyiwa ni nkiduva waany, 17Neeny shilole kwaasha na yoo mukai, mukabwa ni vakiduva vany, newo vamusuuye vamushillye murishe ing'ana kulaiyo nndu akeemuumbuta. 18Naasa mukammengera ilema ishyaarannya, llyo nshemukapaa kamfungare kyeendo ni ulyamari lwany. 19Neeny nshe nrovyo kya wiidimi lwany; neeny nsheumisa ngina yaany pony sha minya na sumbai ya vayo yuume sha minya ya arera, 20finya yaany ive ruu, ni elyi uruka lwany lulashendee shoonga, nta miri ya vayo nnyivikaa ndunda-fo. 21Kwakooya mwakukikisa neeny mukara mulashaarannya, mmbo nshemwengyee ngapo ka-mfungare, shaasa ngyulyamari tany tifye. 22Shimweengye mafisi amusoke vana vany, neemamita findo fyany fyeevikya, neemwaangura yeekyena lyany, na muu wany uve wa ukiva. 23Neeni kwakooya mulakundye ivikwa vaiya kya efyo fyoose, kyeendi mukaengera ikukikisa neeny tupu, llyo neeny nsheengeraa ikukyikyisa neeni; 24shimukape, yee, yeny sho, ka-mfungare kya ngyulyamari tany. 25Shivemweengye fira, kimutaiye elyi mwafisha kyaasa, mushekuumbya efo miriny yaany, sheende nafo ndwari shuumu, muvevikwa maakony a vakiduva vany. 26Kyeeri nshemusokaa shoonga yeyo mwiivikye nsia, vaka ikumi vashekoryaa mikate irikony lyimwi, numa vamweesye na fyeeso, ilya mulye, lyo mulawuura nta-fo.

27Numa yeefyo mukanra mulashaaranya mweengera ikukikisa neeny; 28llyo neeny nshemooraa unyafi lwakwa, shimukape kamfungare kya makasha any. 29Neeni mmbo mushelyaa vana vany nyama. 30Neeny nshelyamara ando any, a miindye, na mafwanu any a nkyeere shiwunduye si, na minying'a yaany shiituule uwe ya minying'a ya mafwanu yoo, na ngoo yakwa imuswe deny. 31Na miri yaany nsheyallwaa irama na ando kwany kweele shaalwe ukiva, nta nshisenywaa ni nrungo wa firaso fyany-fo. 32Na uruka elo lusherewaa ruu, na vakiduva vany yewo vasheikaa mmbo vashefulukyoo kya vayo. 33Neeny shimurarate efo masangeny na usu lumulatye yoo numa yaany, uruka lwany luve lwa ukiva, 34neeni elyi mushekaa efo ngyurukeny ta vandu vengyi, llyo uruka lushetiraa ufoo, neefura na sabato tawo. 35Kyeeri kya ukiva llyo kivaa sha kiimuyo, ekyo nkeifo kyeeri kya sabato fo, kyeeri mwekee urukeny lwany. 36Neewo maata vashesaau, mmbo nsheveengye weerei nrimeny, veekumbwaa vakiduva vawo, na naakwa ni imburu lyivivitwaa ni uraato lyisheveeresee, varishe, sha nndu akeerisha usu, vawe si ruu kulaiyo mwiivaarishisa. 37Vashekuwoyaa wo veni na veni, sheelyi vakee fireny, nta kulaiyo nndu akeevarishisa, nta mmushetiraa finya yeesalala na vakiduva vany-fo. 38Neeni mushearumyaa mbee ya vandu va masanga engi, ina uruka lwa vakiduva vany lushemumira. 39Na vandu va uruka lwany mmbo vashefirikaa kyeendwa ni uravi lwany, efo urukeny lwa vakiduva, vavefirika kyeendwa ni uravi lwa ndeye vawo, 40nawo vashelolyaa uravi lwawo na lwa vandeye vawo valwiirikye, vavemanya nkimaruma kya elyi valeshikukikisya, 41neeny sheengera ivakukikisya, shavavika maakony a vakiduva vawo, kyeendiny, yoo ng'u kwakooya ulaalu mirima yaawo ikunyisa, na yiirikya kya ngapo yeyo ya uravi lwawo; 42llyo nshekumbwaa kyaasa shilevikya Yakobo, na Isaki na Abrahamu, shivekumbwa na uruka lwawo. 43Na uruka nalo mmbo lusherewaa nalo lushefura na sabato tawo; vavelollya uravi lwawo; yee mashika llya valelema mavavasyo akwa, na mirima yaawo ikasua. 44Ando amwi neefyo fyoose, elyi vashekaa urukeny lwa vakiduva vawo, nshisheveraa sakyeny-fo, nta nshishevasuaa shivarumate deny-fo, nta ifisha kyaasa kyakwa-fo, mashika yeny ni Nndumi Iruva, Iruva waawo; 45nkimaruma kyawo nshekumbwaa kyaasa kyakwa na vande vawo valya shilevauta kulya urukeny lwa Misri, na vandu va masanga vakalollya, naambo shive Iruva waawo; yeny ni Nndumi Iruva.

46Yaa nng'u mavavaso na mirumbuye Nndumi Iruva alevikya vana va Israeli, alya Sinai, ifumbuny, eevavasyaa Mose.

Currently Selected:

Valevi 26: MAS2

Highlight

Copy