Valevi 24
24
Ngata ya Ideesya Taa
(Yuu 27:20-21)
1Naasa Nndumi Iruva karera na Mose, kammbia, 2Vavasya vana va Israeli vakweengye mafura a misenefu, mesha asongosye ave a taa, naambo yaake kyeeri kyoose. 3Yoo poo ya kyiri eko kya ureeki, neefo mmba ya yeema elyo. Aron ayaate uka ngama fika nkwaany ni ivavasyo lya llung'anu marika any moose. 4Nasongosye taa yeto nativike yoo ngony ta vayo, mbee ya Nndumi Iruva.
Nkate Waniinngywa Iruva
5Ipoo nswa mmamiri, kukore mikate ikumi na ivii, fyengaa fivii fya ikumi fya kipapa, 6vika ngyuramba ivii, mikate irindaru uramba lumwi, yoo uwe ya mesa ya Nndumi Iruva. 7Wo uramba kuvikeu ubani luve kindo kyeekumbwa kya mikate yeyo, kive kiraso kya Nndumi Iruva kyeekora na muro. 8Wo nkonu wa Sabato nkuti naale-u mikate yeyo ya Nndumi Iruva, nkimaruma kya vana va Israeli ya kyaasa kya llung'anu. 9Nayo mmbo ivaa ya Aron na vasero vakwe; nawo vailyiiye yoo ando eele, ni elyi ikee myeele nnu ya firaso efyo fyeserisyo Nndumi Iruva na muro, lyive ivavaso lya llung'anu.
Kyaaso kya Ngapo Ilatiri Kidengo Nta Ikunndya
10Naasa mwana wa nka mwiisraeli, maye va Kisraeli, avaangwa shelemethi ndeeye Mmisri, mwana yeto kakapana na Mwiisraeli umwi, yoo ulaleny, 11naasa mwana yeto wa nka mwiisraeli kaarara irina elyo, neelya mboo; nawo vakamweende kwa Mose. Nka yeto mmbo evangwaa shelomiti mfu wa Dibiri wa ufyari lwa Dani. 12Vakanraya mmba, naambo vavereye shaasa Nndumi Iruva ashambaa kyakwe. 13Nndumi Iruva karera na Mose kammbia, 14Somuta nndu yeto amina na poo ya ulale, na valya woose valeita ekyo alerera vaekere maako awo yoo nrony wakwe, naasa ironda lyoose lyimbwae na mawe. 15Neewe rera na vana va Israeli kuvavie, nndu yeto asheararaa Iruva wakwe mmbo akurikaa ulyamari lwakwe muni. 16Na yeto ashedengaa irina lya Nndumi Iruva nkuti nawaawa, ironda lyoose mmbo lyinkapaa na mawe, kava muny, ao muni poo, elyi aarara irina lya Nndumi Iruva nawaawa. 17Na nndu akapa ungyi kutane afwa, nkuti da nawaawa, 18na nndu akapa kindo kikafwa natae, kindo na kindo. 19Na kwakooya nndu avika ungyi ivina, indo shaasa aletana nawe natannyo indo; 20kishavere kitawa nkishavere, iriso neeriso, iyoo neeyoo, indo shaasa aletannya yeto ungi nawe natanyo indo. 21Na nndu kawaa kindo nkuti natae neeto awaa nndu e mmbo ashewaawa nawe. 22Ivavaso mutiraa llyimwi nsi, kwa yeto akee muny, neeto muni kyeny, mashika yeny ni Nndumi Iruva, Iruva waany. 23Mose karera na vana va Israeli nawo vakasomuta yeto alelyisa mboo yoo poo ya ulale, vakankapa na mawe vakambwaa. Vana va Israeli vakatana shaasa Nndumi Iruva alevavasya Mose.
Currently Selected:
Valevi 24: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
